ಕವನ

ಸ್ಥಳೀಯರ  ಕವನಗಳಿಗೆ ಈ ಪುಟ ಮೀಸಲು.
ತಮ್ಮ ಕಥೆ ಕವನಗಳನ್ನು horanadachilume@gmail.com ಗೆ ಕಳಿಸಿ.

 ದಸರಾ

 - ವಿ.ಎಂ.ಎಸ್.ಗೋಪಿ   ಬೆಂಗಳೂರು.

     ನವ ರಾತ್ರಿಗಳು

ಮೈಸೂರ ದಸರಾಗಳು

ನವರಾತ್ರಿ ಉತ್ಸವಗಳು

ಎಷೊಂದು ಸುಂದರವು

ಹಬ್ಬದ ಸಡಗರವು

ನವ ಅವಾತರಗಳು 

ನವ ಬಣ್ಣಗಳು

ಹಳದಿ ಬಣ್ಣಗಳು

ಶೈಲಪುತ್ರಿ ದುರ್ಗೆ 

ಹಸಿರು ಬಣ್ಣಗಳು

ಬ್ರಹ್ಮಚಾರಿಣಿ  ದುರ್ಗೆ

ಬೂದು ಬಣ್ಣಗಳು

ಚಂದ್ರಘಂಟಾ  ದುರ್ಗೆ

ಕೇಸರಿ ಬಣ್ಣಗಳು

ಕೂಷ್ಮಾಂಡದೇವಿ  ದುರ್ಗೆ

ಬಿಳಿ ಬಣ್ಣಗಳು

ಸ್ಕಂದಾ ಮಾತಾ  ದುರ್ಗೆ

ಕೆಂಪು ಬಣ್ಣಗಳು

ಕಾತ್ಯಾಯಿನಿ  ದುರ್ಗೆ

ನೀಲಿ ಬಣ್ಣಗಳು

ಕಾಳರಾತ್ರಿ ಮಹಾಮಾಯೇ 

ಗುಲಾಬಿ ಬಣ್ಣಗಳು

ಮಹಾ ಗೌರಿ  ತಾಯಿ

ನೇರಳೆ ಬಣ್ಣಗಳು

ಸಿದ್ಧಿಧಾತ್ರಿ ತಾಯಿ 

ದೇವಿಯ ಅವತಾರಗಳು 

ನವರಾತ್ರಿಯ ದಿನಗಳು

ಆಯುಧ ಪೂಜೆಗಳು 

ವಿಜಯದಶಮಿ ಹಬ್ಬಗಳು 

ದಸಾರ ಹಬ್ಬದ ಸಂಭ್ರಮಗಳು. 

  **************************        

ಗುರುವಂದನ

ರಚನೆ - ಆದಿತ್ಯ ಕುಲಕರ್ಣಿ (ಸಿಡ್ನಿ, ಆಸ್ಟ್ರೇಲಿಯ)

ಹಂಬಲಿಸಿತು ಎನ್ನಯ ಮನ

ಬೆಂಬಲಿಸಿದ ಗುರುಗಳಿಗೆ ಭಕುತಿಯ ನಮನ  ॥ ಪ ॥

ಜನುಮವ ನೀಡಿ ಜೋಪಾನ ಮಾಡಿ

ಅಕ್ಕರೆ ಮಮತೆ ಪ್ರೀತಿಗಳ ಮೋಡಿ

ಲಾಲನೆ ಪಾಲನೆ ಪೋಷಣೆ ಮಾಡಿ

ಮೊದಲ ಗುರುಗಳಾದ ತಾಯಿ-ತಂದೆಯರಿಗೆ     ॥ ಹಂಬಲಿಸಿತು ॥

ಪಾಠವ ತಿಳಿಸಿ ಶಿಕ್ಷಣ ಕಲಿಸಿ

ಆಟಗಳಾಡಿಸುತಾ ನೀತಿಗಳ ತಿಳಿಸುತ

ವಿದ್ಯಾಧಾರೆ ಮಾಡುತ ಬೆಳೆಸಿದ

ಜೀವನ ದಾರಿಯ ತೋರಿದ ಗುರುವೃಂದಕೆ     ॥ ಹಂಬಲಿಸಿತು ॥

ವ್ಯಾಸಂಗ ಮುಗಿಸಿ ನೌಕರಿ ಅರಸಿ

ಏಳು ಬೀಳಿನ ಪಯಣದಿ ಸಾಗುತ

ಕಷ್ಟದಿ ಸುಖದಿ ಜೊತೆಯಲಿ ನಿಂತ

ಆಪತ್ಬಾಂಧವ ಸ್ನೇಹವೃಂದಕೆ    ॥ ಹಂಬಲಿಸಿತು ॥

ಸೋದರ-ಸೋದರಿಯೊಡನೆ ನಲಿಯುತ ಬೆಳೆಯಲು

ಬಾಳ ಸಂಗಾತಿ ಸಿಗಲು, ಬಾಳು ಹಸನಾಗಲು

ಬಂಧು-ಬಾಂಧವರ ಪ್ರೀತಿ ಹೆಚ್ಚಾಗಲು

ಜೀವನದ ಪಾಠ ಮುಂದುವರಿದಿರಲು    ॥ ಹಂಬಲಿಸಿತು ॥

ಮುಂದಿನ ಪೀಳಿಗೆಯ ಬೆಳೆಸುತ ಆಡುತಾ

ಮಿಕ್ಕ ಪಾಠವ ಅವರೊಡನೆ ಕಲಿಯುತ

ಅವರ ಉನ್ನತಿ ಕಾಣುತ, ತಾವೂ ಉನ್ನತರಾಗುತ

ಹಿರಿಯರು ತೋರಿದ ಮಾರ್ಗದರ್ಶನದಿ ಬದುಕುತಾ    ॥ ಹಂಬಲಿಸಿತು ॥

ಸೂರ್ಯ-ಚಂದ್ರರ ಪರಿಸರದೊಳಿರಲು

ಪ್ರಕೃತಿ-ಚರಗಳ ಕಾಳಜಿ ವಹಿಸಲು

ಮೌನದಿ-ಧ್ಯಾನದಿ ಆದಿಯೋಗಿಯ ಪ್ರಾರ್ಥಿಸಲು

ಮುಕ್ತಿ ಮಾರ್ಗದಿ ಧರ್ಮಗುರುಗಳ ಚರಣಕೆ ಬಾಗುತಿರಲು    ॥ ಹಂಬಲಿಸಿತು ॥

*****************

ಚಿಕ್ಕವನು ದೊಡ್ಡವನು

ರಚನೆ  - ದೀಪಿಕ ಜೈಕುಮಾರ್

ಮನೆಯಲ್ಲಿ ನಾನೊಬ್ಬನೇ ಮಗನಾಗಿದ್ದೆ,

ಅಪ್ಪ ಅಮ್ಮನಿಗೆ ಅತೀ ಮುದ್ದಿನವನಾಗಿದ್ದೆ.

ಅಜ್ಜಿ ತಾತನ ತೊಡೆಯ ಮೇಲೆ ಆಡಿದ್ದೆ,

ಚಿಕ್ಕಮ್ಮ ಚಿಕ್ಕಪ್ಪನ ಹೆಗಲೇರಿದ್ದೆ.

ಮನೆ ತುಂಬಾ ನನ್ನದೇ ನಗು, ನನ್ನದೇ ಆಟ,

ಗೋಡೆ ಮೇಲೆಲ್ಲ ನಾನು ಬರೆದ ಗೀಟು.

ರಾಜಕುಮಾರನಂತೆ ಮನೆಯೆಲ್ಲಾ ಓಡಾಡಿ ಕೊಂಡಿದ್ದೆ

ಒಂದು ದಿನ ನನ್ನ ತಮ್ಮ ಹುಟ್ಟಿದ.

ಆ ದಿನದಿಂದ ಎಲ್ಲವು ಬದಲಾಯಿತು,

ಎಲ್ಲರ ಕಣ್ಣು ತಮ್ಮನ ಮೇಲೆಯೇ ನಿಂತಿತು.

"ಮುದ್ದು ಕಂದ" ಅಂತ ಈಗ ಅವನಿಗೆ ಕರೀತಾರೆ,

ನನ್ನ ಎದೆ ಯಾಕೋ ಚುರ್ ಎಂದಿತು.

ನನ್ನ ಆಟಿಕೆಗಳು ಅವನ ಪಾಲಿಗಾಯಿತು.

ಅಮ್ಮ ಹೇಳಿದಳು "ನೀನು ದೊಡ್ಡವನಲ್ಲವಾ?"

ನನಗೆ ತಿಳಿಯಲಿಲ್ಲ ನಾನೆಂದು ದೊಡ್ಡವನಾದೆ ಎಂದು?

ನಿನ್ನೆ ತನಕ ನಾನೂ ಚಿಕ್ಕವನೇ ಆಗಿದ್ದೆ,

ಇಂದು “ಅಣ್ಣ" ಎನ್ನುವ ಹೆಸರು ಬಂತಲ್ಲವಾ !

ತಮ್ಮ ದಿನ ದಿನವೂ ಬೆಳೀತಾನೆ,

ಆದರೆ ಎಲ್ಲರೂ ಅವನನ್ನ "ಚಿಕ್ಕವನು" ಅಂತಾರೆ.

ನಾನು ಐದು ವರ್ಷದವನು, ಆದರೂ "ದೊಡ್ಡವನು" ಅಂತಾರೆ,

ಈ ಲೆಕ್ಕ ನನಗೆ ಅರ್ಥವೇ ಆಗಲಿಲ್ಲ.

ಆಟ ಆಡುವ ವಯಸ್ಸಲ್ಲಿ ಜವಾಬ್ದಾರಿ ನೀಡಿದರು.

ತಿಳಿಯದ ವಯಸ್ಸಲ್ಲಿ "ಕಾಪಾಡು" ಅಂದರು.

ತಮ್ಮ ಎಷ್ಟು ದೊಡ್ಡವನಾಗಿ ಬೆಳೆದರೂ ಮನೆಯಲ್ಲಿ ಚಿಕ್ಕವನು,

ನಾನು ಚಿಕ್ಕವನಾಗಿದ್ದರೂ ಎಲ್ಲರಿಗೂ ನಾನೇ ದೊಡ್ಡವನು.

ಕೊನೆವರೆಗೂ ನನಗೆ ಒಂದೇ ಪ್ರಶ್ನೆ,

ನಾನು ದೊಡ್ಡವನಾದೆನೋ? ಮನದಲ್ಲಿ ಇನ್ನೂ ಚಿಕ್ಕವನಾಗಿಯೇ ಉಳಿದೆನೋ?

ಚಿಕ್ಕಮಗ ದೊಡ್ಡವನಾದರೂ ಚಿಕ್ಕವನಾಗಿದ್ದ ದೊಡ್ಡಮಗ ಚಿಕ್ಕವನಾದರೂ ದೊಡ್ಡವನಾಗಿದ್ದ

*********

ಕರತಾಡನದಿ ಕನಕ ನಮನ

ರಚನೆ - ಆದಿತ್ಯ ಕುಲಕರ್ಣಿ  (ಸಿಡ್ನಿ, ಆಸ್ಟ್ರೇಲಿಯ) 

ವಾರಾಂತ್ಯದ ಸಂಜೆಯು ರಂಗೇರಿದಾಗ

ಕರುನಾಡ ದಾಸವರೇಣ್ಯರ ಪದಗಳ ಚಿಲುಮೆಯು ಚಿಮ್ಮಿದಾಗ

ಶಾಸ್ತ್ರೀಯ ಸಂಗೀತ ಸುಧೆಯು ಮೂಡಿಸಿದ ಇಂಪಾದ ಕಂಪನ

ನಮ್ಮಯ ಸಿಡ್ನಿ ಕನ್ನಡ ಶಾಲೆ ನಡೆಸಿದ ಕನಕ ನಮನ

ದಾಸರೆಂದರೆ ಪುರಂದರದಾಸರಯ್ಯ ಎಂಬಂತೆ

ಅವರ ನಂತರ ಅವತರಿಸಿದ ದಾಸ-ದಾಸಿಯರ ಕುರಿತಂತೆ

ಅಂದು ಅವರು ಹಾಡಿ ಪಸರಿಸಿದ್ದ ಹರಿಭಕ್ತಿ ಕೀರ್ತನೆಗಳ ಮೆಲಕು ಹಾಕಲಂತೆ

ಇಂದು ಅದರ ಸಾರವ ಅರಿತು ಬಾಳಲೆಂದು ಸೇರಿದ್ದ ಅಬಾಲವೃದ್ಧರ ಸಂತೆ

ಹದಿನೈದನೇ ಶತಮಾನದಲ್ಲಿ ಡೀ ಡೀ ಆಡ್ಯಾನೆ ಹಾಡಿನಿಂದ ರಂಗನ ವರ್ಣಿಸಿದ ವಿಜಯದಾಸರು

ಹೊನ್ನು ತಾ ಗುಬ್ಬಿ ಎಂದು ಹಾಡು ಕಟ್ಟಿ ರಂಗನ ಕೊಂಡಾಡಿದ್ದ ಹೆಳವನಕಟ್ಟೆ ಗಿರಿಯಮ್ಮನವರು

ಗುಬ್ಬಿಯಾಳೋ ಗುಬ್ಬಿಯಾಳೋ ಗೋವಿಂದನ ಮೊರೆ ಹೋಗಲು ಸಾರಿದ ವಾದಿರಾಜತೀರ್ಥರು

ಇತ್ತೀಚಿನ ಶತಮಾನದಲ್ಲಿ ರಚನೆಯಾದ ಸ್ವೀಕರಿಸೆನ್ನಯ ಪೂಜೆಯ ತುಳಸಿ ಎಂದ ಸೋಸಲೆ ಮಠದ ಶ್ರೀವಿದ್ಯಾಪ್ರಸನ್ನ ತೀರ್ಥರು

ಇನ್ನೂ ಹತ್ತು ಹಲವು ದಾಸಪದಗಳು ನಾದ-ಗೀತೆಗಳಾಗಿ ಹೊರಬರುತಿರಲು…

ತೋರೆ ಬೇಗನೆ ಸಖಿ ತೋರ ಮುತ್ತಿನ ಹಾರ ಎಂಬ ಹಾಡಿನಿಂದ ಶುರುವಾಗಿ

ಸಾಕು ಸಾಕು ಮನುಜ ಸೇವೆ ಎಂಬ ಹಾಡಿನಿಂದ ಮುಕ್ತಾಯವಾಗಿ

ಸುಮಧುರ ಕನಕ ದಾಸರ ಪದಗಳು

ಸುಶ್ರಾವ್ಯದಿ ರಾಗಮಾಲಿಕೆಯಲ್ಲಿ ಮೂಡಿಬರಲು!

ದಶಕ ತುಂಬಿ ಕೊಂಚ ದಾಟಿರಲು ತನ್ನ ಹನ್ನೊಂದರ ಸಂಭ್ರಮ

ನಮ್ಮ ಸಿಡ್ನಿ ನಗರಿಯ ಕನಕ ನಮನ

ಸೆಳೆಯುತಿದೆ ಸಂಗೀತ-ಸಾಹಿತ್ಯ-ರಸಪ್ರಿಯರ ಗಮನ

ನಿರಂತರ ಸಾಗಲಿ ಹೀಗೆ ಹೊರನಾಡ ಕನ್ನಡಿಗರ ಅದ್ದೂರಿ ಸಮಾಗಮ 

**********

ಬನ್ನಿ ಬನ್ನಿ ಮಕ್ಕಳೇ.. 

- ವಿ.ಎಂ.ಎಸ್.ಗೋಪಿ ✍️

                 ಲೇಖಕರು, ಸಾಹಿತಿಗಳು,  ಬೆಂಗಳೂರು

ಬನ್ನಿ ಮಕ್ಕಳೇ ಶಾಲೆಗೆ ಹೋಗೋಣ

ಬೇಸಿಗೆ ಹೋಯಿತು ಮಳೆಗಾಲ ಬಂತು

ಹಚ್ಚ ಹಸಿರಿನ ಗಿಡಗಳು

ಶಾಲೆಯ ಸುತ್ತಮುತ್ತ ಹೂವಿನ ಗಿಡಗಳು

ಹೊಸ ಪುಸ್ತಕಗಳು ಹೊಸ ಬ್ಯಾಗ್ ಗಳು

    ಹೊಸ ಸಮವಸ್ತ್ರಗಳು

ಗೆಳತಿ ಗೆಳೆಯರ ಮಾತುಗಳು

ಹೊಸ ಹೊಸ ವಿಚಾರಗಳು

ಆಡುತಾ ಓದುತ ನಲಿಯುತ

ಹೊಸ ಪಾಠಗಳನ್ನು ಕಲಿಯೋಣ 

ಓದುತ ಬರೆಯುತ ಒಂದಿಷ್ಟು ಸಾಧಿಸೋಣ

ಬನ್ನಿ ಮಕ್ಕಳೇ ಶಾಲೆಗೆ ಹೋಗೋಣ. 

*********************      

                        .

ಗೂಳೆಹರವಿ ರಂಗ

- ಸಿಡ್ನಿ ಸುಧೀರ್

ಗೂಳೆಹರವಿಯ ಶ್ರೀ ರಂಗನಾಥ

ಲಕ್ಷ್ಮೀ ಸಮೇತ ಶ್ರೀನಿವಾಸ

ಶೇಷ ಶಯನ ಕರುಣಾ ಸಾಗರ

ಕಾಪಾಡು ನಮ್ಮ ಓ ಜಗದೀಶ ||

ಅಜ್ಜಿ ಹೇಳಿದ ಕಥೆ ಮರೆಯಾಗಿಲ್ಲ

ಬಾಗಿಲಲಿ ನಾಗ ಸುರುಳಿ ಸುತ್ತಿ ನಿಂತಿತ್ತಲ್ಲ

ಪೂಜೆಗೆ ಹೊತ್ತಾಯ್ತು ಬದಿಗೆ ಸರಿ ಎಂದರಲ್ಲಿ

ನಾಗ ಮೆಲ್ಲಗೆ ಸರಿಯಿತು, ಆ ಭಕ್ತಿಗೆ ಸಾಟಿಯೆಲ್ಲಿ ||

ಇನ್ನೂರು ವಸಂತಗಳ ಮೌನ ಹೊತ್ತು 

ಕಲ್ಲು ಕಲ್ಲು ಉಸಿರಾಡುತಿದೆ ಇಲ್ಲಿ 

ಗೂಳೆಹರವಿಯ ಗುಡಿಯ ಮೆಟ್ಟಿಲಲ್ಲಿ 

ನನ್ನ ಪೂರ್ವಜರ ಹೆಜ್ಜೆ ಗುರುತು ಅಳಿಸಿಲ್ಲ ||

ಗುಡಿಯ ಬಲಬದಿಯಲ್ಲಿ ರಂಗನ ಪಾದರಕ್ಷೆ ನೋಡಿ

ಶಿಲೆಯ ಮೇಲೆ ದೇವರ ಹೆಜ್ಜೆ ಮೂಡಿ

ಕಾಲು ತೊಳೆದು ಮನಸು ಶುದ್ಧ ಮಾಡಿ

ಒಳಗೆ ಹೋಗು ರಂಗ ಕಾಯುತಿಹನು ನೋಡಿ ||

ಒಂದು ಬದಿ ಲಕ್ಷ್ಮಿ ಕರುಣೆಯ ಕಣ್ಣಲ್ಲಿ

ಇನ್ನೊಂದು ಬದಿ ಆಂಜನೇಯ ರಾಮನ ಧ್ಯಾನದಲ್ಲಿ

ನಡುವೆ ರಂಗ ಶೇಷನ ಮಡಿಲಲ್ಲಿ

ಮೂವರ ಸನ್ನಿಧಿ ಒಂದೇ ಸೂರಿನಲ್ಲಿ ||

ಮೇಲೆ ಶೇಷಶಯನದಿ ಒರಗಿ ನಮ್ಮ ನೋಡುತಲ್ಲಿ

ಜಗವ ಕಾಯುವ ಕರುಣೆ ಆ ಕಣ್ಣಿನಲ್ಲಿ

ಕೆಳಗೆ ನಿಂತಿಹನು ಮತ್ತೊಂದು ರೂಪದಲ್ಲಿ

ಎರಡು ರೂಪದಲಿ ನಿಂತು ಕಾಯುವನು ನಮ್ಮನಿಲ್ಲಿ ||

ಎತ್ತರಕೆ ನಿಂತ ಗರುಡ ಕಂಬ ಗುಡಿಯ ಮುಂದಲ್ಲಿ

ಕೆಡುಕು ಬಾರದಂತೆ ಕಾಯುತಿದೆ ನಿತ್ಯದಲ್ಲಿ

ವರ್ಷಗಳೇ ಕಳೆದರೂ ಆ ಕಾವಲು ಕುಂದಿಲ್ಲ

ರಂಗನ ರಕ್ಷಣೆಗೆ ಗರುಡನಿಗೆ ಬೇರೆ ಲೋಕವೇ ಇಲ್ಲ ||

ಶನಿವಾರದ ಸಂಜೆ ಘಂಟೆ ಮೊಳಗಿದಾಗ

ಗಾಳಿಯಲ್ಲೂ ರಂಗನ ಹೆಸರು ಕೇಳುವಾಗ

ನೂರಾರು ಭಕ್ತರು ದರ್ಶನಕೆ ಬಂದಾಗ

ಕಣ್ತುಂಬ ನೋಡಿ ಧನ್ಯರಾದೆವು ಎಂದರಾಗ ||

ತುಳಸಿ ಘಮ ಚಂದನದ ತಂಪು ಸೋಕಿದಾಗ

ಮಂಗಳಾರತಿ ಬೆಳಕು ಕಣ್ಣ ತುಂಬಿದಾಗ

ಈ ಜನ್ಮ ಸಾಕು ಮುಂದಿನದೂ ಸಾಕೆನ್ನುವಾಗ

ರಂಗ ನೀನಿದ್ದರೆ ಬೇರೇನು ಬೇಕು ಹೇಳುವಾಗ ||

ಹೊರಗೆ ಅರಳಿಕಟ್ಟೆಯ ತಂಪು ನೆರಳಲ್ಲಿ

ಮಕ್ಕಳ ನಗು ಮುದುಕರ ಕಣ್ಣೀರು ಒಂದೆಡೆಯಲ್ಲಿ

ಪ್ರಸಾದ ಸವಿಯುತ ರಂಗನ ನೆನೆಯುತ ಮೌನದಲ್ಲಿ

ಒಂದೇ ಕಡೆ ಸೇರುವುದು ಎಲ್ಲ ರಂಗನ ಸನ್ನಿಧಿಯಲ್ಲಿ ||

ಅರ್ಧಾಂಗಿ

ರಚನೆ : ಆದಿತ್ಯ ಕುಲಕರ್ಣಿ  (ಸಿಡ್ನಿ, ಆಸ್ಟ್ರೇಲಿಯಾ)

ಬೆದರು ಬೊಂಬೆಗೆ ತೊಡಿಸಿರುವ ನಿಲುವಂಗಿ 

ಬಿನ್ನಾಣದಿ ಸನಿಹಕೆ ಬಂದಿಹಳು, ಹಚ್ಚಿಕೊಂಡು ಮದರಂಗಿ

ದಸರಾದ ಪಟ್ಟದ ಗೊಂಬೆಗಳಂತಾದವು ರಂಗ-ರಂಗಿ

ಊದಿದಾಗ ಮಂಗಳ ವಾದ್ಯಗಳ ಪುಂಗಿ

ಆಸೆ ಆಕಾಂಕ್ಷೆಗಳ ಮರವೇರಿದ ಲತಾಂಗಿ

ಏಳು ಬೀಳಿನೊಂದಿಗೆ ಜೊತೆಯಾದ ಕೋಮಲಾಂಗಿ 

ಮುಂದೆ ಸಾಗಿರಲು ಜೀವನ, ಕಷ್ಟದುಃಖಗಳ ನುಂಗಿ

ಮಿಂದಿರಲು ಲೌಕಿಕದಿ ಜೋಡಿಯಾಗಿ ಲಂಗ-ಲುಂಗಿ

ಜನುಮ ನೀಡುವಳು ಕೃಪೆಯಲ್ಲಿ ಮಾತಂಗಿ

ಮರುಜನ್ಮ ಪಡೆಯುವಳು ಪ್ರಾರ್ಥನೆಯಲಿ ಭಜರಂಗಿ 

ಸಂಗಾತಿಯ ನಿಲುವಲ್ಲಿ ನಿಲ್ಲುವಳು ನೀಲಾಂಗಿ 

ಜೀವಕ್ಕೆ ಜೀವಾಳವಾಗುವಳು ಪ್ರೀತಿಯ ಅರ್ಧಾಂಗಿ

********************

ಸಿಡ್ನೇಶ್ವರ ಶತಕದಿಂದ ಎರಡು ಪದ್ಯಂಗಳ್

ರಚನೆ : ದತ್ತು ಕುಲಕರ್ಣಿ ಸಿಡ್ನಿ

1

 ಕೆಲವಂ ಗೂಗಲ್ ನಲ್ಲಿ ಹುಡುಕಿ ಕೆಲವಂ ಯುಟ್ಯೂಬ್ ನಲ್ಲಿ ನೋಡಿ 

ಕೆಲವಂ ಬನ್ನೀಂಗ್ಸ್ ನಲ್ಲಿ ಕೇಳಿ ಕಲಿತು

ಕೆಲವಂ ಡು ಇಟ್ ಯುವರ್ಸೆಲ್ಫ್ ರಿಂದ ಅರಿಯಲ್

ಸರ್ವಜ್ಞನಪ್ಪ ನರಂ

ಜಾಕ್ ಆಫ್ ಆಲ್ ಟ್ರೇಡ್ ಆಗಿರ್ಪ್ಪಂ ಹರಾ ಹರಾ ಶ್ರೀ ಚನ್ನ ಸಿಡ್ನೇಶ್ವರ

2

 ಸಣ್ಣ ಸಾಲದ ಚೊಕ್ಕ ಗ್ರಹ ಸಿಡ್ನಿಗೆ ಭೂಷಣಂ 

ಕಣ್ಣು ಕುಕ್ಕುವ ವಿನ್ಯಾಸದ ಬ್ಯಾಕ್ ಯಾರ್ಡ್ ಗ್ರಹಕ್ಕೆ ಭೂಷಣಂ 

ಮಣ್ಣು ಕಾಣಿಸದ ಹಸಿರು ಹುಲ್ಲು ಬ್ಯಾಕ್ ಯಾರ್ಡ್ ಗೆ ಭೂಷಣಂ 

ಇಷ್ಟಿದ್ದು ಎರಡು ವಾರಕ್ಕೊಮ್ಮೆ ಲಾನ್ ಮಾಡದ 

ಆಲಸಿ ಆಸಿ ಮಾತ್ರ ನಭೂಷಣಂ ಹರಾ ಹರಾ ಶ್ರೀ ಚನ್ನ ಸಿಡ್ನೇಶ್ವರ

(ಸೋಮೇಶ್ವರ ಶತಕದ ಕವಿ ಪುಲಿಗೆರೆ ಸೋಮನಾಥ ಅವರ ಕ್ಷಮೆ ಕೋರಿ)

**************************

ಗ್ಯಾರೆಂಟಿ ಯೋಜನೆ

- ಸರಸ್ವತಿ, ಸಿಡ್ನಿ

ಬಂತು ಬಂತು ಕೆಂಪು ಬಸ್ಸು

ಅದರ ತುಂಬ ಮಿಸ್ ಮಿಸೆಸ್ಸ್

ಮಿಸ್ಟರ್ ಗಳಿಗೆಲ್ಲಾ ಸೀಟು ಮಿಸ್

ಅವರು ಕೋಪದಿಂದ ಬುಸ್ ಬುಸ್

ಗ್ಯಾರೆಂಟಿ ಸಿಕ್ಕಿ ಹೆಂಗಸರು

ದಿನ ನಿತ್ಯ ಟೂರೋ ಟೂರು

ಧರ್ಮಸ್ಥಳ ಹೊರನಾಡು

ಸಿಕ್ಕಿದ ಸ್ಥಳಕ್ಕೆಲ್ಲಾ ದೌಡೋ ದೌಡು

ಮಂಜುನಾಥ ಬೆಚ್ಚಿ ಬಿದ್ದ

ಯಾರು ಹೀಗೆ ಮಾಡಿದ ಪೆದ್ದ

ನನಗಿಲ್ಲ ಒಂದು ಘಳಿಗೆ ಪ್ರೈವೆಸಿ

ಅಣ್ಣಪ್ಪ ಕೇಳೋ ನನ್ನ ಕಸಿವಿಸಿ

ಹೇಳಿದಳು ಅನ್ನಪೂರ್ಣೆ ಹೊರನಾಡು

ಶ್: ಸದ್ದು ಮಾಡಬೇಡಿ

ಇದು ಸಿದ್ದನ ಹೊಸ ಮಾಟ ಮಂತ್ರ

ಜನಗಳೆಲ್ಲಾ ಒಪ್ಪಿದ್ದಾರೆ ಈ ತಂತ್ರ

ತೆರಿಗೆ ಕಟ್ಟಲು ಗಂಡಸರು

ಮೋಜು ಮಾಡಲು ಹೆಂಗಸರು

ಇದೆಂಥ ಸರ್ಕಾರ ಎಂದು ಜರೆದರು

ಕಂಗೆಟ್ಟ ಎಲ್ಲಾ ಪತೀ ದೇವರು

ಕರೆಂಟು ಚಾರ್ಜು ಕಟ್ಟಂಗಿಲ್ಲ

ಹಗಲು ಹೊತ್ತೂ ಲೈಟು ಉರಿಯಿತಲ್ಲ

ನನ್ನ ಕಡೆಗಣಿಸಿದರೆಲ್ಲ

ಎಂದು ಕಣ್ ಕಣ್ ಬಿಟ್ಟ ಆಕಾಶದ ಮಲ್ಲ

ಅಕ್ಕಿ ಮಾತ್ರ ಬಿಟ್ಟಿಯಂತೆ

ರಾಗಿ ಜೋಳ ಅತ್ತಿತಂತೆ

ವೈದ್ಯರುಗಳು ಬೀಗಿದರಂತೆ

ನಮಗೆ (ಅಕ್ಕಿ ಮಾತ್ರ ತಿಂದ) ಪೇಷಂಟುಗಳ ಸಂತೆ ಸಂತೆ

ಸಿರಸಿಯ ಮಾರಮ್ಮ

ಬಾದಾಮಿಯ ಬನಶಂಕರಮ್ಮ

ಗುಡ್ಡದ ಯಲ್ಲಮ್ಮ

ಜನ ಜಂಗುಳಿಯಿಂದ ಕಂಗೆಟ್ಟರಮ್ಮ

ನಂಜನಗೂಡಿನ ನಂಜುಂಡ ಕೆಂಡ ಕೆಂಡ

ಮೇಲುಕೋಟೆಯ ಚಲುವಣ್ಣ ಕಣ್ ಕಣ್ ಬಿಟ್ಟನಣ್ಣ

ಕುಕ್ಕೆಯ ಸುಬ್ಬಪ್ಪ ಬುಸುಗುಟ್ಟಿದನಪ್ಪ

ಎಲ್ಲರೂ ಕೂಗಿದರು ಅತಿಯಾಯಿತು

ಹುಸಿ ಭಕ್ತರ ಕಣ್ ದೃಷ್ಟಿ

ಸರ್ಕಾರದ ಈ ಗ್ಯಾರಂಟಿ ಯೋಜನೆ

ಖಾಲಿಯಾಯ್ತು ಸರ್ಕಾರದ ಖಜಾನೆ

ಅಧಿಕಾರಿಗಳ ಜೇಬು ಮಾತ್ರ ಝಣ ಝಣ

ಅಭಿವೃದ್ಧಿಯ ಮಂತ್ರ ಕೇಳಿಸದಣ್ಣ

ಕಲಿತುಕೋ ಪಾಠ ಓಟು ಹಾಕಿದ ಪೆದ್ದಣ್ಣ.

 ಜನ್ಮದಾತ - ನಿನಗೊಂದು ನಮನ

- ಸಿಡ್ನಿ ಸುಧೀರ್

ನಾನು ಹುಟ್ಟಿದ ದಿನ ಹರ್ಷದ ಹೂವಾಯಿತು ನಿನ್ನ ಮನ,

ಎರಡು ಸಿಹಿ ಹಂಚಿ ಸಂಭ್ರಮಿಸಿದೆಯೆ — ಅದೇ ನನ್ನ ಭಾಗ್ಯರತ್ನ !

ಬಾಲ್ಯದ ಬೆರಳ ಹಿಡಿದು ದಾರಿಯ ದೀಪವಾದೆ ನೀನು,

ಬಿದ್ದ ಕ್ಷಣದಲ್ಲಿ ಎಬ್ಬಿಸಿ ಧೈರ್ಯದ ತಾಪವಾದೆ ನೀನು !!

ಹೇ ಜನ್ಮದಾತಾ ನಿನಗೊಂದು ನಮನಾ,

ನನ್ನ ಉಸಿರಿನೊಳಗೆ ಉಳಿದಿರುವೆ ಚಿರಸ್ಮರಣಾ !!

ಸಹೋದರ-ಸಹೋದರಿ, ಹೆಂಡತಿ-ಮಕ್ಕಳ ನಗುವಿನಲ್ಲೇ ಕಂಡೆ ಅಮೂಲ್ಯ ಧನ,

ಬದುಕಿನ ಸಮೃದ್ಧಿ-ಸೌಭಾಗ್ಯವೆಂದು ಆರಾಧಿಸಿದ ಮನೋಜೀವನ !

ವಂಶಪಾರಂಪರ್ಯದ ಆಸ್ತಿಯ ಹಿಂದೆ ಓಡದ ಉದಾತ್ತ ಮನ,

ಕುಟುಂಬವೇ ನಿನ್ನ ಐಶ್ವರ್ಯವೆಂದು ಕಂಡ ಮಹೋನ್ನತ ಧನ !!

ಹೇ ಜನ್ಮದಾತಾ ನಿನಗೊಂದು ನಮನಾ,

ನನ್ನ ಉಸಿರಿನೊಳಗೆ ಉಳಿದಿರುವೆ ಚಿರಸ್ಮರಣಾ !!

ಕ್ಷಮಿಸಿ-ಮರೆತೇ ಬಿಡುವ ಮಧುರ ಜೀವನ ತತ್ವ ನಿನ್ನದು

ಸಹನೆಯ ನೆರಳಲ್ಲಿ ಅರಳಿದ ಆ ಜೀವನಮಾರ್ಗ ದಯಪಾಲಿಸು !

ನಿನ್ನ ಹೆಜ್ಜೆ ಗುರುತುಗಳಲ್ಲಿ ನನ್ನ ಬದುಕಿನ ಹಾದಿ,

ನಿನ್ನ ನಂಬಿಕೆಯ ನೆಲೆಯಲ್ಲಿ ನನ್ನ ಯಶಸ್ಸಿನ ನಾಡಿ !!

ಹೇ ಜನ್ಮದಾತಾ ನಿನಗೊಂದು ನಮನಾ,

ನನ್ನ ಉಸಿರಿನೊಳಗೆ ಉಳಿದಿರುವೆ ಚಿರಸ್ಮರಣಾ !!

ನನ್ನ ಏಳಿಗೆಯನ್ನು ಹರುಷದ ಸಂಭ್ರಮವನ್ನಾಗಿಸಿದ್ದೆ ನೀನು,

ಸತಿಗೆ ಸಿಹಿಯನ್ನೇ ಮಾಡೆಂದು ಹಂಚಿದ ಸಂತಸದ ಮನ ನೀನು !

ನಿನ್ನ ತ್ಯಾಗವೇ ನನ್ನ ತಲೆಮೇಲಿನ ಕಿರೀಟ,

ನಿನ್ನ ಆಶೀರ್ವಾದವೇ ನನ್ನ ಬದುಕಿನ ಗೀತ !!

ಹೇ ಜನ್ಮದಾತಾ ನಿನಗೊಂದು ನಮನಾ,

ನನ್ನ ಉಸಿರಿನೊಳಗೆ ಉಳಿದಿರುವೆ ಚಿರಸ್ಮರಣಾ !!

ಸಂಜೆಯ ನೆರಳಾಗಿ ದೂರ ನಡೆದರೂ ನೀನು,

ಸ್ಮೃತಿಯ ಸೂರ್ಯನಾಗಿ ಹೃದಯದಲ್ಲಿ ಹೊಳೆಯುವೆ ನೀನು !

ನಿನ್ನ ನೆರಳು ನನ್ನೊಳಗೆ ನಿತ್ಯವಾಸ,

ನಿನ್ನ ಪ್ರೀತಿಗೆ ನನ್ನ ಜೀವನವೇ ಪ್ರಣಾಮ. !!

ಮುಸುಕಿದೀ ಮುಪ್ಪಿನಲಿ…

 ರಚನೆ - ಆದಿತ್ಯ ಕುಲಕರ್ಣಿ (ಸಿಡ್ನಿ, ಆಸ್ಟ್ರೇಲಿಯಾ)

ಮುದ್ದಾದ ಕುಡಿಗಳ ಮುದ್ದಾಡಿರುವ ಕೈಗಳು

ಬಿದ್ದು ಎದ್ದಾಗ ಜೋಪಾನ ಮಾಡಿರುವ ಕಣ್ಣುಗಳು

ಬೆಳೆದು ನೆಲೆಯೂರಲೆಂದು ತೊರೆದ ತ್ಯಾಗಗಳು ಹಲವು

ನಿಂತು ನೆರಳಾಗಲೆಂದು ಪ್ರೀತಿಯಿಂದ ಆಶಿಸಿರುವ ಒಲವು

ಅಪಾರ ವಿದ್ಯೆ-ಬುದ್ಧಿಗಳ ಕಲಿಸಿರುವ ಕಲ್ಪತರುವಾಗಿರಲು

ಸಂದ ಯಶಸ್ಸುಗಳ ಕನ್ನಡಿಯಲ್ಲಿ ತನ್ನನ್ನು ಕಂಡಿರಲು

ಕಷ್ಟಗಳ ಮರೆಮಾಚಿ ಬಲು ಪ್ರೀತಿಯಿಂದ ಸಾಕಿ ಬೆಳೆಸಿರಲು

ದುಷ್ಟ ಚಟಗಳಿಂದ ದೂರವಿಡಲು, ಬದುಕಿನ ಜವಾಬ್ದಾರಿಗಳ ತಿಳಿಸಿರಲು

ಬಾಳ ಸಂಜೆಯಾದಂತೆ ಮಂಜಾಗುತಿರಲು ದೃಷ್ಟಿ

ಸೂಕ್ಷ್ಮಕಾಯವಾದಂತೆ  ಕುಂದುತಿರಲು ಪುಷ್ಟಿ

ಆಸರೆಗಳ ಅಧೀನದಲ್ಲಿ ಜೀವನದ ಬಂಡಿಚಕ್ರಗಳು

ಅಕ್ಕರೆಯ ಮೆಲುಕಿನಲ್ಲಿ ಸಾರ್ಥಕ ಬದುಕಿನ ಪುಟಗಳು

ನಾನೊಲ್ಲೆ ನನಗೊಲ್ಲೆ ಎಂದರೂ ತಗಲುವ ಮುಪ್ಪು

ಏನಿಲ್ಲದಿದ್ದರೂ ಧೈರ್ಯದಿ ಸಜ್ಜಾಗಬೇಕು ಇದ ಒಪ್ಪು

ನಡೆದಾಡುತ ವ್ಯಾಯಾಮಗಳಿಂದಲೇ ಒಳಿತು ಕಾಲು ಮಂಡಿಯ ಚಿಪ್ಪು

ನಡೆಸುವಾತನ ಆಯಾಮದಲಿ ಪ್ರಾರ್ಥನೆಯೊಂದೇ ಉಳಿತು, ಭರವಸೆಯ ಕಪ್ಪೆಚಿಪ್ಪು

       ಹೋಳಿ

ಕವನ - ವಿ.ಎಂ.ಎಸ್.ಗೋಪಿ ✍

ಹೋಳಿಯ ಬಣ್ಣಗಳು

ಹಳದಿ ಸಂಭ್ರಮದ ಬಣ್ಣಗಳು

ಹಸಿರು ಸಮೃದ್ದಿಯ ಬಣ್ಣಗಳು

ಕೇಸರಿ ನೇರಳೆ ಕೆಂಪು ನೀಲಿ ಬಣ್ಣಗಳು

ಈ ರಂಗು ರಂಗಿನ ಬಣ್ಣಗಳು 

ರಂಗು ರಂಗಿನ ರಂಗೋಲಿಯಂತೆ 

ರಂಗು ರಂಗಿನ ಕಾಮನಬಿಲ್ಲಿನಂತೆ

ಈ ಎಲ್ಲಾ ಬಣ್ಣ ಬಣ್ಣಗಳ ಹಬ್ಬ ಹೋಳಿ

ಬಣ್ಣ ತುಂಬುವ ಹಬ್ಬ ಹೋಳಿ 

ಬಕೇಟ್ ನೀರಲಿ ಬಣ್ಣವು ತುಂಬಿಸಿ

ಬಣ್ಣದ ಹೋಳಿಯ ರಂಗು ಎರಚಿ

ರಂಗು ರಂಗಿನ ಬಣ್ಣಗಳಲ್ಲಿ

ನಮ್ಮ ಜೀವನ ರಂಗಾಗಿರಲ್ಲಿ

ಈ ಬಣ್ಣದ ಹೋಳಿಯ ಹಬ್ಬ 

ಹೊಸ ಚೈತನ್ಯ ತುಂಬಿ ಬರಲ್ಲಿ 

ಬಣ್ಣ ಬಣ್ಣದ ಕನಸುಗಳು ಹೊತ್ತು ತರಲ್ಲಿ 

           

ಗಂಗೆ ಮಂಗಳ ತರಂಗೆ 

ರಚನೆ - ಶ್ರೀಮತಿ ಅನು ಶಿವರಾಂ , ಸಿಡ್ನಿ 

ಬರುವಿರಾ ನನ್ನೊಡನೆ  ನೀವೆಲ್ಲ  ಉತ್ತರದ ಆ ದೇವ ಭೂಮಿಗೆ ?

ನಾಲ್ಕು ಧಾಮಗಳಲ್ಲೂ ಹರಿವ ಪುಣ್ಯ ನದಿಗಳ ತವರಿಗೆ?

ಹಿಮವಂತನ  ಭವ್ಯ, ಶ್ವೇತ   ಅರಮನೆಯಲಿ ಬೆಳೆಯುತಿಹ 

ಸುಂದರ ಬಾಲಿಕೆಯರ ಕತೆ ಹೇಳುವೆ  ಇಂದು  ನಾ ನಿಮಗೆ . 

ಅರಮನೆಯ ಬಲ ಕೋಣೆಯಲ್ಲಿ  ಅಕ್ಕ ಭಾಗೀರಥಿ, ಎಡಬದಿಯಲ್ಲಿ ತಂಗಿ ಯಮುನೆ 

ಮಧ್ಯದ ಅಂಗಳದಲ್ಲಿ ನಲಿದಿಹರು ಮಂದಾಕಿನಿ, ಸರಸ್ವತಿ, ಅಲಕನಂದೆಯರು 

ಅರಮನೆಯ ತುಂಬೆಲ್ಲ ಇವರ ಕಾಲ್ಗೆಜ್ಜೆಯ  ಝೇಂಕಾರ, ನಗುವಿನ ಕಲಕಲ ನಿನಾದ.  

2.ಋತು ಚಕ್ರ  ಉರುಳಿ, ಬೆಳೆದಿಹರು  ಈ ಎಳೆ ಬಾಲೆಯರು, 

ಹಿಮವಂತ  – ಮೈನೆಯರ  ಮಮತೆ    ಮೈದುಂಬಿ 

ಕಣ್ಣಿಗೆ ಸೊಗಸು, ಮನಕ್ಕೆ ಮುದ ನೋಡಲು ಇವರ ಆಟ ಪಾಟ 

ಬಂಡೆಯಿಂದ ಬಂಡೆಗೆ ಹಾರಿ,  ಧುಮುಕ್ಕುತ್ತಾ ಭೋರ್ಗರೆದು

ಮುಗಿಲ ಮುಟ್ಟುವ ಮರಗಳ  ನಡುವೆ ನುಸುಳಿ

ಗುಹೆಗಳ ಕೊರೆದು, ಕಂದರಗಳ  ದಾಟಿ, ಗವಿಯೊಳು  ಹೊಕ್ಕು 

ಆಡಿದ  ಕಣ್ಣಾಮುಚ್ಚಾಲೆ ಆಟದಲಿ ಕಳದೇ ಹೋದಳು  ಸರಸ್ವತಿ 

ಮುಂದೆ,  ಬಹು ದೂರ, ಪ್ರಯಾಗದಲಿ, ಗಂಗ ಯಮುನೆಯರ ಅವಳು ಸೇರಿದಾಗ  

ಹಿಮರಾಜನಂತೆ ನಮ್ಮ ಮನಕ್ಕೂ  ಮುದ, ನೆಮ್ಮದಿಯ ನಿಟ್ಟುಸಿರು.  

ತರುಣಿ  ಭಾಗೀರಥಿಯೋ  ಬಲು ಜೋರು ಹುಡುಗಿ

ಯಾರಿಗೂ ಬಗ್ಗದ  ಹಟಮಾರಿ ಬೆಡಗಿ;

ದುಡುಕಿ ಓಡುವಳು, ರಭಸದಿಂ  ಮುನ್ನುಗಿ ,

ಗಿರಿ ಶಿಖರಗಳ ಮೇಲಿನಿಂದ ಬೀಳುವಳು  ಜಲಪಾತವಾಗಿ.  

ಇವಳ  ಹಟ್ಟದ  ಸ್ವಭಾವಕ್ಕೆ   ಹೆದರಿ,ಕರೆಸಿದರು  ಶಿವನನ್ನು 

ಮಹಾದೇವನೊಬ್ಬನೇ  ಮಣಿಸಬಲ್ಲ  ಈ ತುಂಟಿಯನ್ನು 

ತನ್ನ  ಜಟೆಯೊಳಗೆ ಕಟ್ಟಿ  ಹಿಡಿದಿಟ್ಟನು  ಶಿವ 

ಅಲುಗಾಡದಂತೆ ಚಂಚಲೆ ಭಾಗೀರಥಿಯನ್ನು. 

ಪ್ರಕೃತಿ, ಪುರುಷರ ಸಮಾಗಮ, ಹೊಸ  ಸೃಷ್ಟಿಯ ಸಂಭ್ರಮ. 

ಶಿವನ ಸ್ಪರ್ಷಕೆ ಕರಗಿದಳು ನವ ಯುವತಿ  ಭಾಗೀರತಿ. 

ನಾಚಿ, ನಗುತ್ತಾ, ಮೆಲ್ಲನೆ  ಇಳಿದಳು ಹರನ  ಮುಡಿಯಿಂದ,

ಸಂಭ್ರಮದಿ  ಸಾಗಿದಳು ಸೇರುತ್ತಾ  ತನ್ನ ಸೋದರಿಯರ ,

ಪ್ರತಿ ಪ್ರಯಾಗದಲ್ಲೂ ಮತ್ತಷ್ಟು ಹಿರಿದಾಗಿ  ಬೆಳೆದು; 

ಎಳೆತನದ ತುಂಟಾಟ ಮೀರಿ ಭಾಗೀರಥಿ--ಗೃಹಿಣಿ  ಗಂಗೆಯಾದಳು, ಹರಿದ್ವಾರದಲ್ಲಿ .

ರಭಸ ಕಳೆದು ಶಾಂತಳಾಗಿ , ಹರಸಿ ಜನರ   ಹರಿದಳು, 

ಪುಣ್ಯ ಕ್ಷೇತ್ರ ಕಾಶಿಯಲ್ಲಿ, ಜನರ ಪಾಪ ತೊಳೆದಳು. 

ಬಡವ, ಬಲ್ಲಿದ  ಭೇದವಿಲ್ಲದೆ ಎಲ್ಲರಿಗೂ ಒಲಿದಳು, 

ನೆಲವ ಹನಿಸಿ, ಫಸಲ ಬೆಳಸಿ  ಅನ್ನದಾತೆಯಾದಳು, 

ಕೋಟಿ ಜನರ ತಾಪ  ಕಳೆದು ಗಂಗಾ  ಮಾತೆಯಾದಳು .

ಬಾ ತಾಯಿ ಎನ್ನೊಳಗೂ, ಎನ್ನ ಅಂತರಂಗದ ಗಂಗೆಯಾಗು  

ತೊಳೆ ಮನದ ಕಲ್ಮಶವ , ಕಳೆ  ಅದರ ಸಂತಾಪವ. 

ಹರಸು ತಾಯೇ ನಿನ್ನಂತೆಯೇ ಸಮಚಿತ್ತ ಪ್ರವೃತಿಯ, 

ಬಂಧ ಕಳಚಿ ,  ಪಡೆಯಲಿ ಜೀವ ನಿನ್ನ ಸಾಯುಜ್ಯವ .

**************

ನಾನ್ಯಾವಾಗ ಹಾರುತಿರುವೆ

ರಚನೆ - ಆದಿತ್ಯ ಕುಲಕರ್ಣಿ (ಸಿಡ್ನಿ, ಆಸ್ಟ್ರೇಲಿಯ) 

ಬಾನಂಗಳದಿ ಹಾರುತಿಹುದು ಹಕ್ಕಿಯ ಹಿಂಡು

ಮನೆಯಂಗಳದಿ ಸಾಗುತಿಹುದು ಸಾಲಾಗಿ ಇರುವೆಯ ದಂಡು

ಮನದಾಳದಿ ತೇಲಿಬಂದ ಯೋಚನೆ ಅದ ಕಂಡು

ಜಗದೊಳದಿ ಎಲ್ಲಿ ಕಲಿತರಬಹುದು ಶಿಸ್ತು-ಸಂಯಮವನ್ನು ಓದಿಕೊಂಡು

ಹೊರಟಿವೆ ಹುಡುಕಲು ತಮ್ಮ ಅನುದಿನದ ಕೂಳು

ತೊರೆದಿವೆ ಎಲ್ಲರ ಹಂಗಿನ ದೈನಂದಿನ ಗೀಳು

ಗುಂಪು ಜೀವನದಿಂದ ಬೆಳೆದಿರುವ ಪ್ರೀತಿ-ಸಹನೆ

ಕೆಂಪು ಇರುವೆಗಳಿಂದ ನಡೆಯುತ್ತಿರುವ ಸದ್ದಿಲ್ಲದ ಸಂವಹನೆ

ಜೀವಿಗಳಲ್ಲಿರುವುದು ಎರಡೇ ಜಾತಿ ಒಂದು ಹೆಣ್ಣು- ಒಂದು ಗಂಡು

ಮನುಜನೇಕೆ ಮಾಡಿಕೊಂಡಿರುವನು ಹತ್ತು ಹಲವು

ಪೈಪೋಟಿಯಲ್ಲಿ ನಡೆಸಿರಲು ತನ್ನ ಎಂದಿನ ಜೀವನ

ಹತೋಟಿಯಲ್ಲಿಡಲಿ ತನ್ನ ಸುತ್ತಲಿನ ಜಲ-ಚರ-ವನ

ನಾನಗಬಾರದಿತ್ತೇ ಆ ಹಗುರವಾದ ಹಕ್ಕಿ

ನಾನಿರಬಾರದಿತ್ತೇ ಇರುವೆಯಾಗಿ ಸಿಹಿತಿಂಡಿಗಳ ಒಳ ಹೊಕ್ಕಿ 

ಇರುವೆಯ ಭಾರ ಇರುವೆಗಾದರೆ ಆನೆಯ ಭಾರ ಆನೆಯದ್ದೇ

ಇನ್ನು ನಾನ್ಯಾವಾಗ ಹಾರುತಾ ಇರುವೆ ಎಂದು ಕಾತುರದಿ ಕುಳಿತಿದ್ದೆ

************************

"ಜಲಪಾತ  ಹೇಳಿದ  ಆತ್ಮಕಥೆ"

 ಕವನ  - ಜೆ. ಎಸ್. ಗಾಂಜೇಕರ, ಕುಮಟಾ (ಉ. ಕನ್ನಡ)

ಕೇಳು  ಮಾನವಾ,   ನನ್ನಯ  ಆತ್ಮಕಥೆ.

ನಾನು  ಜಲರೂಪದಲ್ಲಿ  ಮಗುವಾಗಿ  ಜನಿಸಿದೆ.

ಅಂಬೆಗಾಲಿಕ್ಕುತ್ತಾ  ಝರಿಯಾದೆ.

ಹೊಳೆಯಾಗಿ ಹರಿಯುತ್ತಾ  ನದಿಯಾದೆ.

ನನ್ನ  ಜತೆ  ನನ್ನ  ಬಂಧು - ಬಾಂಧವರೂ  ಜೊತೆಯಾದರು.

ನನ್ನ   ಕುಟುಂಬ  ವಿಸ್ತಾರವಾಗಿ ಮಹಾನದಿಯಾದೆ.

ನನ್ನ  ಎರಡೂ  ಬದಿಯಲ್ಲಿದ್ದ  ಹೊಲ - ಗದ್ದೆಗೆ ಜಲ  ಉಣಿಸಿದೆ.

ಅದರಿಂದಾಗಿ ಭೂಮಾತೆಯನ್ನು ಫಲವತ್ತಾಗಿರಿಸಿ  ವಿಪುಲ

ಬೆಳೆ - ಕಾಳು - ಪೈರು ನೀಡುವಂತೆ  ಮಾಡಿದೆ.

ಹೀಗೆ , ನಾನು  ಸಾಗುತ್ತಿರಲು, ಎದುರಿಗೆ  ಕಲ್ಲು ಬಂಡೆ,  ಗುಡ್ಡ ಬೆಟ್ಟ  ಅಡ್ಡ  ಬಂದರೂ ಲೆಕ್ಕಿಸದೇ  ನಾ  ಮುನ್ನುಗ್ಗಿದೆ.

ಕಂಡೆ  ನಾ  ಆಳವಾದ  ಕಂದಕ - ಕಣಿವೆ

ಧುಮುಕಿದೆ,   ದೈರ್ಯದಿಂದ  ಭೋರ್ಗರೆಯುತ್ತಾ.

ಪಾತಾಳಕ್ಕೆ  ಬಿದ್ದೇನೆಂದೆನಿಸಿತು.

ಆಗ  " ಜಲಪಾತ " ಎಂದು  ನಾಮಕರಣ  ಮಾಡಲಾಯಿತು.

ನನ್ನ  ಸೊಬಗನ್ನು  ಬಣ್ಣಿಸದ  ಕವಿ / ಕವಿತ್ರಿಯರಿಲ್ಲ  ಈ  ಜಗದಲಿ.

ನನ್ನ  ಸೌoದರ್ಯವನ್ನು  ಕಣ್ಣು  ತುಂಬಿಸಿಕೊಳ್ಳಲು ದೇಶ - ವಿದೇಶಗಳಿಂದ  ಬರುವವರ  ಸಂಖ್ಯೆ ಕಡಿಮೆಯೇನಿಲ್ಲ  ಈ  ವಿಶ್ವದಲಿ.

ನನ್ನ  ಮುಂದಿನ  ಪಯಣ  ಶಾಂತವಾಗಿ  ಸಾಗಿ

ಕಡಲನ್ನು  ಸೇರುವುದೇ  ಆಗಿದೆ.

ಮಾನವಾ,

ನೀನೂ  ಕೂಡ  ಜೀವನದ  ಪಯಣ ದಲ್ಲಿ  ಎಂಥಹದ್ದೇ ಎಡರು - ತೊಡರು  ಬಂದರೂ   ದೈರ್ಯದಿಂದ

ಎದುರಿಸಿ  ಮುನ್ನುಗ್ಗಿ  ಗುರಿ  ಮುಟ್ಟಬೇಕು.

******************

ದಿಬ್ಬ

- ರಚನೆ ,  ಆದಿತ್ಯ ಕುಲಕರ್ಣಿ, Sydney

ಎಲ್ಲೆಡೆ ಬೇಸಿಗೆ ರಜೆಯ ಮೋಜು

ಕಿರಿಯರ-ಹಿರಿಯರ ಮಸ್ತಿಯ ಮೋಜು

ಹಾಗೇ ಇಣುಕಿದೆ ಆಜು-ಬಾಜು

ನಾ ಮರೆತೆ ದೈನಂದಿನದ ಗೋಜು

ಅಲ್ಲೊಂದಿತ್ತು ದಿಬ್ಬ

ಮರೆಯಲ್ಲಿದ್ದ ಸುಬ್ಬ

ಅವ ನೋಡಿದ ಏರಿಸಿ ಹುಬ್ಬ

ಕಂಡಿತು ಸಡಗರದ ಹಬ್ಬ

ಸರ್ರನೇ ಉರುಳಿದನು ಇಳಿಜಾರು

ಗಿರ್ರೆಂದ ಆತನ ತಲೆ ಬಲು ಜೋರು

ತಿರುಗಿ-ಮುರಗಿ ಜಾರಿದನು

ನೆಗೆದು ಕುಣಿದು ಹೌಹಾರಿದನು

ಮಣ್ಣಿನ ದಿಬ್ಬ, ಮಂಜಿನ ದಿಬ್ಬ

(ಬಂಡೆ)ಕಲ್ಲಿನ ದಿಬ್ಬ, ಹುಲ್ಲಿನ ದಿಬ್ಬ

ಬಗೆಬಗೆಯ ದಿಬ್ಬಗಳು ಅಬ್ಬಬ್ಬಾ!

ಎಲ್ಲರ ಮನದಲ್ಲಿರುವನೊಬ್ಬ, ದಿಬ್ಬದ ಸುಬ್ಬ

***************************

 ಸ್ಪರ್ಶ

ಜೆ. ಎಸ್. ಗಾಂಜೇಕರ, ಕುಮಟಾ (ಉ. ಕನ್ನಡ)

ಶಾಪಗ್ರಸ್ತಳಾಗಿ  ಕಲ್ಲಾಗಿದ್ದ  ಅಹಲ್ಯೆ , ಜೀವಂತವಾಗಲು, 

ಶ್ರೀ ರಾಮನ ಪಾದಸ್ಪರ್ಶವೇ  ಕಾರಣ. 

ಮೊಗ್ಗೆಯಾಗಿದ್ದ  ಕಮಲ  ಪುಷ್ಪವು  ಸುಂದರವಾಗಿ ಅರಳಲು,  ರವಿಯ  ಕಿರಣದ  ಸ್ಪರ್ಶವೇ  ಕಾರಣ. 

ಹೂವುಗಳಲ್ಲಿದ್ದ  ಮಕರಂದವು  ಜೇನಿನ  ಹನಿಯಾಗಲು  ದುಂಬಿಯ  ಪರಾಗ ಸ್ಪರ್ಶವೇ  ಕಾರಣ. 

ಹುಣ್ಣಿಮೆಯ  ದಿನ  ಸಾಗರದ  ಅಲೆಗಳು  ಎತ್ತರಕ್ಕೆ  ಪುಟಿಯಲು ಚಂದಿರನ  ಹೊಂಬೆಳಕಿನ  ಸ್ಪರ್ಶವೇ  ಕಾರಣ.

ಹೇ  ಪ್ರಿಯೇ , 

ಕಲ್ಲು  ಹೃದಯದವನಾಗಿದ್ದ  ನನ್ನನ್ನು , ಕರುಣಾಮಯಿ ಯಾಗಲು ನಿನ್ನ  ಪ್ರೇಮ  ಭರಿತ  ನೋಟದ ಸ್ಪರ್ಶವೇ  ಕಾರಣ. 

ನನ್ನೊಳಗೆ  ಹುದುಗಿದ್ದ  ಪ್ರತಿಭೆ  ಹೊರಹೊಮ್ಮಲು ನಿನ್ನ  ಸ್ಫೂರ್ತಿದಾಯಕ  ಮಾತಿನ ಸ್ಪರ್ಶವೇ  ಕಾರಣ. 

ನನ್ನೊಳಗೆ  ಅಡಗಿದ್ದ ಅಪಾರ  ಪ್ರೀತಿ  ಸಾಗರದ  ಸಿಹಿ  

ಹoಚಲು  ನಿನ್ನ  ವಿಶಾಲ  ಹೃದಯದ  ನುಡಿಗಳ  ಸ್ಪರ್ಶವೇ  ಕಾರಣ. 

ನನ್ನೊಳಗೆ ವಾಸವಾಗಿದ್ದ  ಉನ್ನತ  ವಿಚಾರಗಳನ್ನು ಆಗಾಗ್ಗೆ  ವ್ಯಕ್ತ ಪಡಿಸಲು ನಿನ್ನ  ಸ್ನೇಹ ಸ್ಪರ್ಶವೇ  ಕಾರಣ. 

**********************

  ದಸರಾ  - ವಿ.ಎಂ.ಎಸ್.ಗೋಪಿ   ಬೆಂಗಳೂರು.

     ನವ ರ್ರಾತಿಗಳು

ಮೈಸೂರ ದಸರಾಗಳು

ನವರಾತ್ರಿ ಉತ್ಸವಗಳು

ಎಷೊಂದು ಸುಂದರವು

ಹಬ್ಬದ ಸಡಗರವು

ನವ ಅವಾತರಗಳು 

ನವ ಬಣ್ಣಗಳು

ಹಳದಿ ಬಣ್ಣಗಳು

ಶೈಲಪುತ್ರಿ ದುರ್ಗೆ 

ಹಸಿರು ಬಣ್ಣಗಳು

ಬ್ರಹ್ಮಚಾರಿಣಿ  ದುರ್ಗೆ

ಬೂದು ಬಣ್ಣಗಳು

ಚಂದ್ರಘಂಟಾ  ದುರ್ಗೆ

ಕೇಸರಿ ಬಣ್ಣಗಳು

ಕೂಷ್ಮಾಂಡದೇವಿ  ದುರ್ಗೆ

ಬಿಳಿ ಬಣ್ಣಗಳು

ಸ್ಕಂದಾ ಮಾತಾ  ದುರ್ಗೆ

ಕೆಂಪು ಬಣ್ಣಗಳು

ಕಾತ್ಯಾಯಿನಿ  ದುರ್ಗೆ

ನೀಲಿ ಬಣ್ಣಗಳು

ಕಾಳರಾತ್ರಿ ಮಹಾಮಾಯೇ 

ಗುಲಾಬಿ ಬಣ್ಣಗಳು

ಮಹಾ ಗೌರಿ  ತಾಯಿ

ನೇರಳೆ ಬಣ್ಣಗಳು

ಸಿದ್ಧಿಧಾತ್ರಿ ತಾಯಿ 

ದೇವಿಯ ಅವತಾರಗಳು 

ನವರಾತ್ರಿಯ ದಿನಗಳು

ಆಯುಧ ಪೂಜೆಗಳು 

ವಿಜಯದಶಮಿ ಹಬ್ಬಗಳು 

ದಸಾರ ಹಬ್ಬದ ಸಂಭ್ರಮಗಳು. 

          

ವಿಶೇಷ ಕೀಲಿ ಕೈ 

ಜೆ. ಎಸ್. ಗಾಂಜೇಕರ, ಕುಮಟಾ (ಉ. ಕನ್ನಡ)

ಮಿದುಳೆoಬ  ಭಂಡಾರದಲ್ಲಿ ದೇವ ನಿಟ್ಟಿಹನು

ಸುವಿಚಾರವೆಂಬ ಸಂಪತ್ತನ್ನು.

ಮನವೆಂಬ  ಖಜಾನೆಯಲ್ಲಿ ಪರಮಾತ್ಮ ಇಟ್ಟಿಹನು

ಮಧುರ ಭಾವವೆಂಬ ಭಾಗ್ಯವನ್ನು .

ಅoತರಂಗವೆಂಬ ಕೋಶದಲ್ಲಿ ದೇವರು ಇಟ್ಟಿಹನು.

ದಯೆ - ಕರುಣೆ ವೆಂಬ ಐಶ್ವರ್ಯವನ್ನು.

ಹೃದಯವೆಂಬ ಟಿಜೋರಿಯಲ್ಲಿ ಭಗವಂತ ಇಟ್ಟಿಹನು.

ಪ್ರೀತಿ, ಪ್ರೇಮ, ಮಮತೆ, ವಾತ್ಸಲ್ಯವೆಂಬ ಮುತ್ತು  ರತ್ನ , ವಜ್ರ ವೈಡೂರ್ಯ ವನ್ನು.

              ಹೀಗಾಗಿ,

ಭಂಡಾರದ,ಖಜಾನೆಯ,ಕೋಶದ,ಟಿಜೋರಿಯ

ಬಾಗಿಲು ತೆರೆಯಲು ಬುದ್ಧಿ -ವಿವೇಕವೆಂಬ ಕೀಲಿ ಕೈ ನಮ್ಮ ಕೈಯಲ್ಲಿಯೇ ಕೊಟ್ಟಿಹನು.

********************

ಮನಸ್ಸೆಂಬ  ಪುಸ್ತಕ

ಜಗವೇ  ಗ್ರಂಥಾಲಯ.

ಒಬೊಬ್ಬರ ಮನಸ್ಸೇ ಬಗೆ ಬಗೆಯ ಪುಸ್ತಕ .

ದಿನವೆoಬ  ಪುಟದಲ್ಲಿ ,

ರೋಮಾಂಚನ ,  ಟ್ರೆಜೆಡಿ , ಹಾಸ್ಯ , ಗಂಭೀರ

ನಾನಾ  ಬಗೆಯ  ಭಾವನೆಗಳ  ಪಾಠ .

ಕ್ಷಣ ಕ್ಷಣಕ್ಕೂ  ಬದಲಾಗುವ ಪೂರ್ಣವಿರಾಮ,ಅಲ್ಪವಿರಾಮ  ಚಿನ್ಹೆ !

ಯೋಚನೆಗಳೇ  ವಿಚಾರಗಳೇ  ವಾಕ್ಯಗಳು.

ಬಾಲ್ಯ ,ಯೌವನ , ವೃಧ್ಯಾಪ್ಯ ಗಳೇ ಅಧ್ಯಾಯಗಳು.

ಮರಣ  ಕೊನೆಯ ಅಧ್ಯಾಯದ  ಸಮಾಪ್ತಿ.

ಇದೊಂದು  ಅಚ್ಚರಿಯ ಪುಸ್ತಕ ,

ಯಾಕಂದರೆ , ಅವರವರ  ಮನಸ್ಸೆಂಬ  ಪುಸ್ತಕ , ಅವರವರೇ  ಓದಬೇಕು.

   -ಜೆ.ಎಸ್.ಗಾಂಜೇಕರ.ಕುಮಟಾ, ಉ. ಕನ್ನಡ (ಕರ್ನಾಟಕ )

         ಯುಗಾದಿ

- ವಿ.ಎಂ.ಎಸ್.ಗೋಪಿ, ಬೆಂಗಳೂರು.

ಬಂತೋ.. ಬಂತೋ.. ಯುಗಾದಿ ಬಂತೋ.. 

ತಂತೋ.. ತಂತೋ.. ಸಡಗರ ತಂತೋ.. 

ಸಿರಿ ತಂದಿತಪ್ಪ ಈ ಯುಗಾದಿ ಹಬ್ಬ 

ಸಂತಸದ ರೂಪ ಈ ಯುಗಾದಿ ಹಬ್ಬ 

ಮನೆಯ ಅಂಗಳದಿ ಬಣ್ಣದ ರಂಗೋಲಿ 

ಮನೆಯ ಬಾಗಿಲು ಮಾವಿನ ತೋರಣ 

ಊರ ತುಂಬೇಲ್ಲಾ ಹೊಸತು ನೋಡಾ 

ನಾಡಿನ ಜನದ ಹಿಗ್ಗು ನೋಡಾ 

ಹಬ್ಬದ ಸಿರಿಗೆ ತುಪ್ಪದ ಘಮ ಘಮ 

ಹಸಿರಿನ ಗರಿಗೆ ಸಂಭ್ರಮದ ಸಮ ಸಮ 

ಹರಿಯುವ ನೀರಲ್ಲಿ ತಲೆ ಎಣ್ಣೆ ಸ್ನಾನ 

ನಾರಿಯರ ಮುಡಿ ತುಂಬ ಮಲ್ಲಿಗೆ 

ನಾಡ ತುಂಬಾ ಸಂತಸ 

ಎಲ್ಲೆಲ್ಲೂ ಹಬ್ಬದ ಸಡಗರ 

ಸಿಹಿಯಾಗಿರೋ ಮನಸ್ಸಿಗೆ ಬೇವು ಬೆರಸಿ 

ಹೋಳಿಗೆ ತಿಂದು ಬಾಳಿಗೆ ಸಿಹಿ ಬೆರಸಿ. 

 

*********************************************   

 -----ದೈವ ಲೀಲೆ----- 

ಅವಸರದಲ್ಲಿದ್ದೆ ಊರಿಗೆ ಹೋಗಲು 

ಹತ್ತಿದೆ ಬಸ್ , ಬೇಗ ತಲುಪಲು 

ಯಾಕಂದರೆ ವಧು ನೋಡಲು

ಎಲ್ಲಿಲ್ಲದ   ಕಾತುರ

ಕಾಣಲು ಹೇಗಿದ್ದಾಳೆಂಬ   ಆತುರ 

ಆಕೆಗೂ ಇರಬಹುದು ನನ್ನನ್ನೋಡುವ ಅವಸರ

ಬಸ್ ನಿಧಾನವಾಗಿ ಸಾಗುತಿರಲು

ಚಾಲಕನನ್ನು ಮನದಲ್ಲಿ ಶಪಿಸುತಿರಲು 

ಎಂದು ಊರಿಗೆ ತಲುಪುವೆನೆಂದು ಯೋಚಿಸುತಿರಲು

ಅಡ್ಡ ಬಂತು ದನಗಳ ಹಿಂಡು 

ಚಾಲಕ ಗಾಬರಿಗೊಂಡು 

ಹಾಕಿದ ಬ್ರೆಕ್ ಭಯಗೊಂಡು

ಆಗಲೇ ಅರಿವಾಯಿತು ಬ್ರೆಕ್ ಫೆಲಾಗಿದೆಯೆಂದು 

ಇಳಿಸಿದ ಎಲ್ಲ ಪ್ರಯಣಿಕರನ್ನು ರಕ್ಷಿಸಲೆಂದು 

ಯಾವ ಅಪಘಾತ ಆಗದಿರಲೆಂದು

ಅನತಿದೂರಲ್ಲಿತ್ತು ಇಳಿಜಾರದ ಮಾರ್ಗ

ವೇಗವಾಗಿ ಚಲಿಸಿದ್ದರೆ  ನಾವು  ಸೇರುತ್ತಿದ್ದೆವು ಸ್ವರ್ಗ

ದೈವ ಸ್ವರೂಪಿಯಾಗಿ ಕಂಡವು ದನಗಳು ನನ್ನ ಕಣ್ಣಿಗೆ 

ಅವುಗಳು ಬರದಿದ್ದರೆ ಬೀಳುತಿತ್ತು ನಮ್ಮ ಬಸ್ ಕಂದರಕ್ಕೆ

ಇದಲ್ಲವೇ  ದೇವರ ಪವಾಡ 

ತಪ್ಪಿಸಿದನಲ್ಲ ಜರುಗಲಿರುವ ಅವಗಡ

ಇನ್ನೊಂದು ಬಸ್ ಹತ್ತಿ ಊರಿಗೆ ತಲುಪಿದೆ 

ಅಕೆಯನು ಕಾಣಲು ಹಂಬಲಿಸಿದೆ

ಹೊರೆಟೆನು ನಾನು ಮಾತಾ-ಪಿತರೊಂದಿಗೆ 

ಹುಡುಗಿಯನು ನೋಡಲು ವಧು ಮನೆಗೆ

ಬಳಿಕ ಬಂದಳು ಚಹ ತೆಗೆದುಕೊಂಡು ನಾಚಿಕೆಯಿಂದ 

ಅವಳ ಸೌಜನ್ಯತೆ ನೋಡಿದೆ ಮುದದಿಂದ

ಆಕೆಯ ದೈವಸ್ವರೂಪ ಕಂಡು ಬೆರಗಾದೆ

ಇವಳೇ ಸರಿಯಾದ ಜೋಡಿ ಅಂದುಕೊಂಡೆ

ನಾ ಸಮ್ಮತಿಸಿದೆ ಅವಳನು ವಿವಾಹವಾಗಲು 

ಆಕೆಗೂ ಖುಷಿಯಾಯಿತು ನನ್ನ ಬಾಳ- ಸಂಗಾತಿಯಾಗಲು

-----ಜೆ.ಎಸ್.ಗಾಂಜೇಕರ.

****************************

ಜಗವೆಲ್ಲಾ  ಸಂಭ್ರಮಿಸುತ್ತಿರುವ ಪರಿ

-ಜೆ.ಎಸ್.ಗಾಂಜೇಕರ,ಕುಮಟಾ (ಉ.ಕನ್ನಡ)

ಜಗವೆಲ್ಲಾ  ಸಂಭ್ರಮಿಸುತ್ತಿರುವ ಪರಿ

ಹುದೋಟಗಳಲಿ  ದುಂಬಿ-ಹುವುಗಳ   ಝೆಂಕಾರದ  ಸಂಭ್ರಮ.

ಗಿದ-ಮರಗಳಲ್ಲಿ ಹಕ್ಕಿ-ಗುಬ್ಬಿಗಳ ಚಿಲಿಪಿಲಿ ಸಂಭ್ರಮ.

ಹಳ್ಳ-ಕೊಳ್ಳ ಗಳಲ್ಲಿ ಮೀನು ರಾಶಿಗಳ  ಕಲರವ ಸಂಭ್ರಮ.

ಹೊಲ-ಗದ್ದೆ ಗಳಲ್ಲಿ ತೆನೆ-ಪೈರುಗಳ  ಹೊಐಡಾಟದ  ಸಂಭ್ರಮ.

ಆಗಸದಲ್ಲಿ ಚಂದ್ರ - ತಾರೆಗಳ  ಬೆಳದಿಂಗಳ ಸಂಭ್ರಮ.

ಹೀಗೆ  ಜಗವೆಲ್ಲಾ  ಸಂಭ್ರಮಿಸುತ್ತಿರಲು,

ಮಾನವಾ,

ಅವರವರ  ಸಡಗರದಲಿ    ನೀನೂ  ಪಡು  ಸಂಭ್ರಮ  ಪ್ರತೀ ಕ್ಷಣ.

ಅಂದರೆ  ಮಾತ್ರ ಜೀವನವು  ಉಲ್ಲಾಸ ಭರಿತ ಅನು ದಿನ.

     ---- ಜೆ. ಎಸ್. ಗಾಂಜೇಕರ ಕುಮಟಾ (ಉ. ಕನ್ನಡ )

 " ನದಿ ಹೇಳಿದ ಆತ್ಮ ಕಥನ "

-ಜೆ.ಎಸ್.ಗಾಂಜೇಕರ,ಕುಮಟಾ (ಉ.ಕನ್ನಡ)

ಮೊದಲು ಪುಟ್ಟ  ಝರಿಯಾಗಿ ಹರಿದೆ.

ಕಾಲ ಕ್ರಮೇಣ  ಹಳ್ಳ- ಕೊಳ್ಳಾಗಿ  ಸಾಗಿದೆ .

ಮುಂದೆ ಗುಡ್ಡ - ಬೆಟ್ಟವ ಸುತ್ತಿ  ಪ್ರಕೃತಿ ತಾಯಿಯ ಸೌ0ದರ್ಯ ಹೆಚ್ಚಿಸಿದೆ.

ತದನಂತರ  ನನ್ನ  ಬಳಗವ  ಸೇರಿ  ನದಿಯಾಗಿ ಹರಿದೆ . 

ಅಲ್ಲಿಗೆ ನಿಲ್ಲಲಿಲ್ಲ ಪಯಣ , ಕಂದರಕೆ  ಧುಮುಕಿದೆ .

ಮನ ಸೆಳೆವ  ಜಲಪಾತ ನಾದೆ .

ಸೌoದರ್ಯೊಪಾಸಕರ ನೆಚ್ಚಿನವನಾದೆ .

ಸಾಹಿತ್ಯ ಪ್ರೇಮಿಗಳಿಗೆ ಸ್ಪೂರ್ತಿದಾಯಕನಾದೆ .

ಸಾಗಿದು  ಗಿರಿ  - ಕಾನನ ನಡುವೆ  ನನ್ನಯ  ಪಯಣ 

ಜೀವಿಗಳ  ಸಂಕುಲಕೆ  ನಾನಾದೆ ಆಶ್ರಯದ  ತಾಣ .

ನನ್ನ  ದಡದ ಎರಡೂ  ಮಗ್ಗಲೂ ವಿಪುಲ ಪೈರು  ತಂದೆ.

ಸಹಸ್ರಾರು ರೈತರ ಮೊಗದಲಿ  ಸಂತಸ ನೀಡಿದೆ .

ಕೊನೆಯಲ್ಲಿ  ನಾ  ಶಾಂತವಾಗಿ ಸಾಗರವ  ಸೇರಿದೆ .

ಬದುಕಿನಲಿ  ನಾ  ಸಾರ್ಥಕತೆ  ಪಡೆದೆ.

ಹಾಗೆಯೇ  ಮನುಜಾ,

ಬಾಳಲಿ  ನೀನೂ ಕೂಡ  ಎಂಥಹ  ಕಷ್ಟ - ಕಾರ್ಪಣ್ಯ ನಡುವೆಯೂ  ಎದೆಗುಂದದಿರು .

ಎಲ್ಲರ  ಪ್ರೀತಿಗೆ ಪಾತ್ರನಾಗಿ ಸಾರ್ಥಕತೆಯ  ಬದುಕು  ಬದುಕುತಿರು.

*******************

ವಿದೇಶಿ  ಹೆಣ್ಣು 

ಜೆ. ಎಸ್. ಗಾಂಜೇಕರ, ಕುಮಟಾ (ಉ.ಕನ್ನಡ) 

ಪ್ರಯಾಣಿಕಳಾಗಿ   ಬಂದ ವಿದೇಶಿ  ಹೆಣ್ಣಿನ  ಮೇಲೆ  ಬಿತ್ತು  ತಿಮ್ಮನ  ಕಣ್ಣು. 

ನೋಡಿರಲಿಲ್ಲ  ಅವಳಂಥ  ತ್ರಿಪುರ ಸುಂದರಿ  ಹೆಣ್ಣು. 

ಕೇಳಿದಳು  ವಿದೇಶಿ ಹುಡುಗಿ  " ಓಂ  ಬೀಚಿಗೆ ಹೋಗುವ  ಹಾದಿ  ಯಾವದು? " ಎಂದು. 

ಖುಷಿ ಯಾಯಿತು ತಿಮ್ಮನಿಗೆ  ತನ್ನನ್ನೇ  ವಿಚಾರಿಸಿದಳೆಂದು. 

ತೋರಿಸುವೆ  " come " ಎಂದು  ಕರೆದ ಸಮೀಪ  ಭಯ  ಪಡದೇ. 

ಹಿಡಿದಳು  ಆಕೆ ತಿಮ್ಮನ  ಕೈ ಯಾವುದೇ  ಸಂಕೋಚ  ಪಡದೇ. 

ರೋಮಾಂಚನಗೊಂಡ  ತಿಮ್ಮ  ಅವಳ  ಬೆಳ್ಳಗಿನ ಕರ  ಸ್ಪರ್ಶಕೆ.

ಆಗಿರಲಿಲ್ಲ  ಅಂತಹ  ಅನುಭವ  ಎಂದೂ ಅವನ  ಜನುಮಕೆ. 

" What  a  beautiful  place " ಅಂದಳು ವಿದೇಶಿ ಹುಡುಗಿ  ಓಂ  ಬೀಚ್  ನೋಡಿ. 

" Yes ,  you  also  beautiful " ಎಂದ ತಿಮ್ಮ  ಹರುಕು - ಮುರುಕು  ಆoಗ್ಲ  ಭಾಷೆಯಾಡಿ. 

ಖುಷಿ  ಪಟ್ಟಳೆಂದು  ತಿಳಿದ,   ವಿದೇಶಿ  ಹುಡುಗಿ  ತನ್ನ  ಮಾತಿಗೆ. 

" I  love  you " ಎಂದ  ತಿಮ್ಮ  ಮೆಲ್ಲಗೆ. 

ಹೊಡೆದಳು  ತಿಮ್ಮನ  ಕೆನ್ನೆಗೆ  ಜೋರಾಗಿ . 

" ಅಯ್ಯೋ " ಎಂದು  ಕೂಗಿದ  ಗಟ್ಟಿಯಾಗಿ. 

ತಿಮ್ಮ  ಹಾಸಿಗೆಯಿಂದ  ಎದ್ದು  ಕುಳಿತ. 

" ಏನಾಯಿತಣ್ಣಾ " ಎಂದು  ಕೇಳಿದಳು  ತಂಗಿ  ಕವಿತ. 

" ತಂಗಿ , ನಾ  ಕಂಡೆ  ಕೆಟ್ಟ  ಕನಸು  "  ಎಂದು. 

ಅರಿವಾಯಿತು  ತಿಮ್ಮನಿಗೆ ವಿದೇಶಿ  ಹುಡುಗಿಯರಿಂದ ದೂರ ಇರುವುದು  ವಾಸಿಯೆoದು.

ಹೆಂಡತಿ

ಭೀಮರಾಯ ಬಡಿಯಲ್

ನೀನು ನನ್ನ ಹೆಂಡತಿ

 ಯಾಕೆ ಪ್ರಾಣ ಹಿಂಡೋತಿ

 ಯಾಕೆ ದ್ವೇಷಿಸುತ್ತಿ 

 ನೀ ಎಷ್ಟೇ ದ್ವೇಷಿಸಿದರು ನೀ ನನ್ನ ಹೆಂಡತಿ 

 ಊಟ ಮಾಡುತ್ತಿ ಮಾಡಿದ್ಮೇಲೆ ನನ್ನ ಬಯ್ಯುತ್ತೆ 

 ಯಾಕೆ ಇಂಗಾಡ್ತಿ 

  ನನ್ನ ಮುದ್ದಿನ ಹೆಂಡತಿ  

 ನನ್ನ ಜೀವನ ಬೆಳಗುವ ಬಾಳ ಸಂಗಾತಿ 

 ಮುಟ್ಟಿದರೆ ಗುರ್ರನ್ತಿ

 ಮಾತಾಡಿಸಿದರೆ ಉರ್ ಅನ್ನುತ್ತಿ  

 ಎಷ್ಟೇ ಮಾಡಿದರೂ ನೀ ನನ್ನ ಹೆಂಡತಿ 

 ನಾನು ಸಾಯೋತನಕ ನೀ ನನ್ನ ಜೊತೆ ಇರುತಿ 

 ನೀ ನನ್ನ ಬಾಳ ಸಂಗಾತಿ 

*********************************************

ಹೋಳಿಯ  ಹುಣ್ಣಿಮೆ

ರಚನೆ - ಜಗದೀಶ ಚಂದ್ರ ಬಿ ಎಸ್

ಹೋಳಿಯ  ಹುಣ್ಣಿಮೆ ಬಂದಿಹುದು

            ಕೃಷ್ಣನು ಚಂದ್ರನ ಹಿಂದೆ ಅಡಗಿಹನೆ? //

ಸಖಿಯರೇ ಬನ್ನಿ, ಕೃಷ್ಣನ ಹುಡುಕಿ

ಓಕುಳಿಯಾಟವ ಸವಿಯುವ ಬನ್ನಿ  

ಕೃಷ್ಣನ ಜೊತೆಯಲಿ ಓಕುಳಿ ಆಡಿ

ಪಾವನ ರಾಗುವ ಬನ್ನಿರೆ ಎಲ್ಲರು //

            ನೇಮ ವೆಂಬ ಬಣ್ಣವ ತಂದು

            ನಿಷ್ಠೆ  ಎಂಬ ಸುಜಲಕೆ ಬೆರೆಸಿ

            ಭಕ್ತಿ ಭಾವದಿ ನರ್ತಿಸಿ ಅರ್ಪಿಸುತಾ  

            ಜಗದಾ ಒಡೆಯಗೆ ನಮಿಸುವ ಬನ್ನಿ  

*******************************************

ಹೋಳಿಯ ಬಣ್ಣ

ರಚನೆ - ಜಗದೀಶ ಚಂದ್ರ ಬಿ ಎಸ್

ಹಬ್ಬ ಬಂದಿತಣ್ಣ   ಹೋಳಿ ಹಬ್ಬ ಬಂದಿತಣ್ಣ

ಹೋಳಿ ಹಬ್ಬ ಬಂದಿತಣ್ಣ   ಬಣ್ಣ ಬಣ್ಣ ತಂದಿತಣ್ಣ

ಎಲ್ಲ ಬಣ್ಣ ಸೇರಿಕೊಂಡು  ರಂಗಿನಾಟ ಆಡಿತಣ್ಣ //

ಯಾವ ಬಣ್ಣ ಒಳ್ಳೆ ಬಣ್ಣ     ವರ್ಣನೆಯಾ ಕೇಳಿರಣ್ಣ

ಎಲ್ಲ ಬಣ್ಣಕದರದೇ     ಛಾಪು ಉಂಟು ನೋಡಿರಣ್ಣ //

ಉತ್ಸಾಹದ ಚಿಲುಮೆ ನಾನೆ     ಕೂಗಿತೀಗ ಕೆಂಪು ಬಣ್ಣ  

ವಿಶ್ವಾಸದ ಕುರುಹು ನಾನೆ    ಹೇಳಿತೀ ಕಿತ್ತಳೆ ಬಣ್ಣ //

ಶಾಂತಿಯ  ಸಂಕೇತ ನಾನೆ   ಹೇಳಿತಾ ನೀಲಿ ಬಣ್ಣ

ಸಂತಸವಾ ಮನಕೆ  ಕೊಡುವೆ   ಹೇಳಿತೀಗ ಹಸಿರು ಬಣ್ಣ //

ಉತ್ತೇಜನ ಕೊಡುವೆ ನಾನು   ಸಾರುತಿದೆ ಹಳದಿ ಬಣ್ಣ

ಮಹತ್ವಾಕಾಂಕ್ಷೆಗೆ    ಕುರುಹು ನಾನೆ ನೇರ್ಳೆ  ಬಣ್ಣ //

ಎಲ್ಲ ಬಣ್ಣ ಬಿಳಿ ಬಣ್ಣ   ಶುಭ್ರತೆ ಸಂಕೇತವಣ್ಣ

ಜೊತೆಗೆ ಕೊಂಚ ಕಪ್ಪು ಬಣ್ಣ   ಇನ್ನೂ ಚೆಂದ ಕಾಣ್ವೆನಣ್ಣ//

ನಿವೇದನೆ 

ಸೀತಾತನಯ

(ಜಿ.ಎಸ್. ಟಿ. ಪ್ರಭು)

ಮುಸ್ಸಂಜೆಯ ಮಸುಕಿನಲಿ ನಿನ್ನ ರೂಪವ ಕಂಡಾಗ

ಚಂದಿರನೂ ನಾಚಿ ಮೋಡಗಳ ಹಿಂದೆ ಸರಿದಾಗ

ನಕ್ಷತ್ರಗಳ ಮಿಣುಕಿನ ಬೆಳಕಿನಲ್ಲಿ ನಾ ಮೌನಕ್ಕೆ ಶರಣಾದಾಗ  

ಮಸ್ತಿಷ್ಕದೊಳು ಭಾವನೆಗಳ ತರಂಗಗಳು ಹುಚ್ಚೆದ್ದು ಕುಣಿದಾಗ 

ಮನಸಿನಾ ತುಮುಲುಗಳ ಸಹಿಸದಾದೆನು ನಾನಾಗ

ಅತಿ ಶೀಘ್ರದಿ ನಿದ್ರಾದೇವಿಯ ದಾಸನಾಗಿ ಕನಸಿನ  ವಶವಾಗಿರಲು

ನೀ ದರ್ಪಣದ ಮುಂದೆ ನಿಂತು ಮುದ್ದಾದ ಮುಂಗುರುಳ ತೀಡುತಿರಲು 

ಕಣ್ಣಲಿ ಪ್ರೀತಿಯ ಕಾಂತಿಯು ಇಮ್ಮಡಿಸಿ ಚಿಮ್ಮುತಿರಲು

ಇನಿಯನ ಸಂಗ ಬಯಸುವ ಗೆರೆಗಳು ಮಸ್ತಕದಿ ಮೂಡಿರಲು

ನೀರಸ ಮೌನವು ಕೊಣೆಯಲ್ಲ ಕಾರ್ಮೋಡಕವಿದಂತೆ ತುಂಬಿರಲು

ಹಿಂಬದಿಯಿಂದ ನಾ ನಿನ್ನ ಬರಸೆಳದು  ಅಪ್ಪಿ ಮುದ್ದಾಡಿದಂತೆ ಕನಸ ಕಂಡೆನು

ಇದು ಮನದ ಹಂಬಲವೊ ಯೌವ್ವನದ ಉನ್ಮಾದೊವೊ ಅರಿಯದಾಗಿಹೆನು

ಎಷ್ಟೋ ಹೆಣ್ಣುಗಳ ಈ ಮೊದಲು ನಾನು ಸಂಧಿಸಿರುವೆನು 

ಅವರುಗಳ ಮಂದಹಾಸದ ಹಿಂದಿನ ಮರ್ಮವ ಗ್ರಹಿಸಿರುವೆನು 

ಯಾರಿಗೂ ಮನಸೋಲದ ಮನವೇಕೆ ಚಡಪಡಿಸುತ್ತಿರುವುದಿಂದು ತಿಳಿಯೆನು

ಇದು ಕನಸಾಗಿಯೆ ಇರುವ ನನಸೊ ನನಸಂತೆ ಕಾಣುವ ಕನಸೋ ಅರಿಯದಾಗಿಹೆನು 

ಇರುಳ ಮಬ್ಬಿನಲಿ ಮಸುಕಾಗಿ ಕಂಡ ಸುಂದರಿ ನೀ ಹೇಗಾದರು ಇರು

ನನ್ನ ಎದೆಯಲಿ ಪ್ರೀತಿಯ ಕಿಡಿಯನು ಹಚ್ಚಿದ ಹೆಣ್ಣೆ ನೀ ಎಲ್ಲಾದರು ಇರು 

ನಮ್ಮಿಬ್ಬರ ನಡುವಿನ ಪ್ರೇಮ ಕಾಮನಬಿಲ್ಲಿನಂತೆ ವರ್ಣರಂಜಿತವಾಗಿರಲಿ

ಮಳೆಬಂದಾಗ ಭೂಮಿ ಪಸರಿಸುವ ಸುಗಂಧದಂತೆ ಹಿತಾನುಭವ ಬೀರಲಿ

ಎಲ್ಲ ಇನಿಯರು ತಮ್ಮ ಜೀವನದಿ ಪ್ರೇಮ ಕಾವ್ಯವ ಜೇನಿನಂತೆ ಸವಿಯಲಿ.

ಸೀತಾತನಯ

(ಜಿ.ಎಸ್. ಟಿ. ಪ್ರಭು)

****************************************

 "ಪ್ರೀತಿ ವ್ಯಕ್ತ ಪಡಿಸುವ  ನಾನಾ ಪರಿ "

ರಚನೆ : ಜೆ.ಎಸ್.ಗಾಂಜೇಕರ.ಕುಮಟಾ (ಉ.ಕನ್ನಡ) ಕರ್ನಾಟಕ.

ಪ್ರಿಯತಮೆ, 

ಪ್ರೀತಿ ,  ಪ್ರೇಮ ,  ವಾತ್ಸಲ್ಯ  ವ್ಯಕ್ತ  ಪಡಿಸುವ  ನಾನಾ ವಿಧಾನ :

ನೀನು  ಗಮನಿಸಿದೆಯಾ  ನಿಸರ್ಗ ಪ್ರೀತಿಸುವ   ಪರಿ ? 

ನೋಡು ಪ್ರಿಯೇ, 

ರವಿಯ ಪ್ರಥಮ  ಕಿರಣದ  ಚುಂಬನ ,  ಧರೆಗೆ. 

ಮಂದ  ಮಾರುತನ  ನಲ್ಮೆಯ ಚುಂಬನ,  ಗಿಡ -ಮರ ಗಳಿಗೆ.

ಪಾತ್ತರಗಿತ್ತಿಯ  ಒಲವಿನ  ಚುಂಬನ,  ಹೂವುಗಳಿಗೆ. 

ಜೇನುನೊಣದ ಸವಿಯ ಚುಂಬನ,ಬಗೆಬಗೆಯ  ಪುಷ್ಪ ಗಳಿಗೆ

ಧಾವಿಸಿ  ಬರುವ  ಸಾಗರದ ಅಲೆಗಳ  ಕಾತುರದ  ಚುಂಬನ,  ದಡಕೆ 

ಹಾಗೆಯೇ ,

ತಾಯಿಯ  ಪ್ರಥಮ  ಚುಂಬನ ,  ಮಗುವಿಗೆ .

ಪ್ರಿಯೇ , 

ಇದೆಲ್ಲವೂ   ಪ್ರಕೃತಿಯು ಪ್ರೀತಿ ವ್ಯಕ್ತಪಡಿಸುವ   ಪರಿ.  

ಪ್ರಿಯೇ , 

ನಿನ್ನ ಬೊಗಸೆಯಷ್ಟು  ಪ್ರೀತಿ  ಸಾಕು  

ನಮ್ಮ ಸುಖ ಬಾಳಿಗೆ ಇನ್ನೇನು  ಬೇಕು ?

**********************************************

ದಿವ್ಯ ದ್ವೀಪ - ಬಾಲಿ

- ಶ್ರೀಮತಿ ಅನು ಶಿವರಾಂ  

ಬಾಲಿಯ ಮುಂಜಾವಿನಲಿ ಕೋಳಿಯ ಕೂಗಿಗೆ ಕಣ್ ತೆರೆಯುವ ಮುದ, 

ಮುಂಬಾಗಿಲಿನಲಿ  ಗರಿಕೆ ಹೂಗಳ ಸಿಂಗಾರ ನಿತ್ಯವೂ  ವಿಧ ವಿಧ;

ಕಪ್ಪಕ್ಕಿ- ಕೆಂಪಕ್ಕಿಗಳ ಬಿಸಿ ಗಂಜಿಗೆ  ಬೆರೆಸಿದ ಸಿಹಿ ಜೇನಿನ ಹದ ,

ಜಲತರಂಗದ ಅಲೆಯ ಹೊತ್ತು ತರುವ ತಿಳಿ ಗಾಳಿಯ ನಿನಾದ. 

ನಮ್ಮ ದೇವ- ದೇವತೆಗಳ ದಿಬ್ಬಣವೇ ಬಂದು ನೆರದಿದೆ ಇಲ್ಲಿ 

ಹೆಜ್ಜೆ, ಹೆಜ್ಜೆಗೂ ಅಲಂಕೃತ ಮೂರ್ತಿಗಳ ಮೆರವಣಿಗೆ ಇಲ್ಲಿ; 

ಭೀಷ್ಮ, ದ್ರೋಣ ಹನುಮಂತರ ಹೆಸರು ಹೊತ್ತಿವೆ ರಸ್ತೆಗಳಿಲ್ಲಿ, 

ರಾಮಾಯಣ, ಭಾರತಗಳು ಇಂದಿಗೂ ಜೀವಂತ  ನೃತ್ಯನಾಟಕದಲ್ಲಿ.

ಕಿರು ರಸ್ತೆಗಳ ತುಂಬ ಪ್ರವಾಸಿಗರ ಸಡಗರದ ಸಂಚಾರ,

ಓಣಿಗಳ ಇಕ್ಕೆಡೆಯಲೂ ಕಣ್ ಸೆಳೆವ ಚಿತ್ರ ಕಲಾ ಆಗರ;

ಬುದ್ಧ, ಬಾಟಿಕ್, ಬಾಳೆ ನಾರಿನ ಬುಟ್ಟಿಗಳೇ ಬಾಲಿಯ ವ್ಯಾಪಾರ 

ಸುಡು ಬಿಸಿಲಿನಲ್ಲೂ ಸಾಗುವುದು ನಗುಮೊಗದ ವ್ಯವಹಾರ 

 

ಯೋಗ, ಧ್ಯಾನ, ಅಭ್ಯಂಗಗಳ ಸಂಸ್ಕಾರ ಈ ಸುಂದರ ಲೋಕದಲ್ಲಿ 

ಪೋಲೀಸಿನವನೂ ಹೂವು ಮುಡಿಯುವ ಈ ದಿವ್ಯ ದ್ವೀಪದಲ್ಲಿ 

***********************************

ಚುಟುಕು/ಹನಿಗವನ

- ಶ್ರೀಮತಿ ಸವಿತಾ ಹಿಪ್ಪರಗಿ

ಚುಟುಕು

ಬದುಕೊಂದು ಸುಂದರ ಕನ್ನಡಿ

ಸರಿಯಾಗಿ ಬರೆ ನೀ ಮುನ್ನುಡಿ

ಜೀವನ ಚರಿತ್ರೆಯಡಿ

ಬಾಳು ಸುಂದರ ಚಾವಡಿ.

ಟಂಕಾ

ಬೆಲೆಯಿಲ್ಲದ

ಬಹುದಿನದ ಬಾಳು

ಬೇಡವೆನಗೆ 

ಮೌಲ್ಯದಿಂ ಬದುಕುವೆ.

ನಾ ಚಿರಾಯುವಾಗುವೆ.

ಚುಟುಕು

ಬದುಕಿನುದ್ದಕು ಹೋರಾಟ

ದಿನನಿತ್ಯದ ಗೋಳಾಟ

ಭಾವನೆಗಳ ತೊಳಲಾಟ

ಎಲ್ಲಿಹುದು ಚಿರಶಾಂತಿಯ ತಟ.

ಹನಿಗವನ

ಚಿತ್ರ ವಿಚಿತ್ರವಾದ ಕನಸು

ವಿಚಲಿತವಾಗಿದೆ ಮನಸು

ಭಯವಾಗುತಿದೆ ತುಸು

ಆಗಬಾರದದು ನನಸು

ದೇವರೆನ್ನ ಮೊರೆಯ ಆಲಿಸು

ಇದರಿಂದ ನನ್ನ ರಕ್ಷಿಸು.

ಕವಿಯ  ಕೋರಿಕೆ

- ಜೆ.ಎಸ್.ಗಾಂಜೇಕರ, ಕುಮಟಾ (ಉ.ಕನ್ನಡ.) 

ಸ್ವಪ್ನಗಳೇ, 

ನೀವು  ನನ್ನ  ನಿದ್ದೆಯಲ್ಲಿ  ಬರಲೇಬೇಕೆಂದಿದ್ದರೆ ಕಥೆಯರೂಪದಲ್ಲಿಯೋ, ಕವನ  ರೂಪದಲ್ಲಿಯೋ  ಬನ್ನಿರಿ.

ಸುವಿಚಾರಗಳೇ, 

ನೀವು  ನನ್ನ  ಧ್ಯಾನದಲ್ಲಿ ಬರಲೇಬೇಕಿಂದಿದ್ದರೆ 

ಭಜನೆಯ ರೂಪದಲ್ಲಿಯೋ,  ಕೀರ್ತನೆಯ  ರೂಪದಲ್ಲಿಯೋ ಬನ್ನಿರಿ.

ಕಲ್ಪನೆಗಳೇ,

ನೀವು  ನನ್ನ  ಏಕಾಂತದಲ್ಲಿ  ಬರಲೇಬೇಕೆಂದಿದ್ದರೆ

ಪತ್ತೆದಾರಿ ಕಾದಂಬರಿ ರೂಪದಲ್ಲಿಯೋ, ಕುತೂಹಲ  ಬರಹ  ರೂಪದಲ್ಲಿಯೋ ಬನ್ನಿರಿ

ಆಧ್ಯಾತ್ಮಿಕ  ತತ್ವಗಳೇ, 

ನೀವು  ನನ್ನ  ಮೌನದಲ್ಲಿ  ಬರಲೇಬೇಕೆಂದಿದ್ದರೆ

ಮಹಾಪುರುಷರರ  ಕಥನ  ರೂಪದಲ್ಲಿಯೋ, ಧಾರ್ಮಿಕ  ಜ್ಞಾನ ರೂಪದಲ್ಲಿಯೋ  ಬನ್ನಿರಿ.

ನಿಮ್ಮನ್ನೆಲ್ಲಾ ನನ್ನ  ಹೃದಯದಲ್ಲಿ  ಸೆರೆಹಿಡಿದು   ಲೇಖನಿಯ  ಮೂಲಕ  ಸಹೃದಯ  ಓದುಗರಿಗೆ  ಉಣಬಡಿಸುವೆ.

ಇದರಿಂದಾಗಿ  ಸಾಹಿತ್ಯ ರಂಗದಲ್ಲಿ   ಅಂಬೆಗಾಲಿಕ್ಕುವ    ಬಯಕೆ. ಇದುವೇ  ಕವಿಯ  ಕೋರಿಕೆ.

ರಾಮನಾಥ್ ಅವರಿಗೊಂದು ಶಾಲು 

ರಚನೆ:  ದತ್ತು ಕುಲಕರ್ಣಿ, ಸಿಡ್ನಿ 

ಎನ್  ಸರ್  ರಾಮನಾಥ ಅವರೆ

ನೀವೊಬ್ರು ಫೂಟಿ ಆಟಗಾರರೇ ಖರೆ 

ಶಬ್ದಗಳ ನಡುವಿನ ಅಕ್ಷರಗಳನ್ನು ಒಂದೊಂದು ಸಲ ವದಿತೀರಿ 

ಮತ್ತೊಂದು ಸಲ ಕೈಯಿಂದ ತಳ್ಳತಿರಿ 

ಹೆಂಗರ ಮಾಡಿ ಅರ್ಥ ಮತ್ತು ಹಾಸ್ಯ 

ಎಂಬೊ ಪೋಸ್ಟ್ ನಡುವೆ ಹೊಡೆದು ಗೋಲ್ ಮಾಡೇಬಿಡ್ತೀರಿ. 

ಅದಕ್ಕೆ 

ತಗೊಳ್ಳಿ ಸರ್ ಈ ಶಾಲು 

ಕೊಡತಾ ಇದ್ದೀವಿ ನಾವು ಆಸಿ ಕನ್ನಡಿಗರು 

ನಿಂತಗೊಂಡು ಸಾಲು-ಸಾಲು 

(ಹಾಗೆ ಅದರೊಳಗಡೆ ಇವೆ ಬೀರ್ ಬಾಟಲು)

ಮತ್ತ ಇನ್ನೊಂದು ಕಡೆ ನೋಡಿದರೆ 

ನೀವು ಪಕ್ಕಾ  ಪೇಯಿಂಟರ್ ಖರೆ 

ಎಲ್ಲ ಶಬ್ದಕ್ಕೂ ಇತಿಹಾಸದ್ದು ಪುರಾಣದ್ದು ಮತ್ತು ಈಗಿಂದು ಸೇರಿ 

ಬಣ್ಣ ಬಳದು  ಮಿಸಳಬಾಜಿ ಮಾಡಿ 

ಚಿಲುಮ್ಯಾಗ ತೂಗಹಾಕ್ತೀರಿ 

ಅದಕ್ಕೆ 

ತಗೊಳ್ಳಿ ಸರ್ ಈ ಶಾಲು 

ಕೊಡತಾ ಇದ್ದೀವಿ ನಾವು ಆಸಿ ಕನ್ನಡಿಗರು 

ನಿಂತಗೊಂಡು ಸಾಲು-ಸಾಲು 

(ಹಾಗೆ ಅದರೊಳಗಡೆ ಇವೆ ಬೀರ್ ಬಾಟಲು)

ಇಷ್ಟ ಅಲ್ಲ ಒಮ್ಮೊಮ್ಮೆ 

ಶಬ್ದ ಕೊಯ್ದು ಕತ್ತರಿಸಿ ಕೂಡಿಸಿ 

ಇದ್ದ ಅರ್ಥ ಇಲ್ಲದಂಗ ಮತ್ತ ಇಲ್ಲದ ಅರ್ಥ ಬರೂ ಹಂಗ  

ಮಾಡೊ ಸರ್ಜನ ಅನಸ್ತೀರಿ 

ಯಾವ-ಯಾವಾದೊ ಭಾಷಾದ್ದು 

ಶಬ್ದಗಳನ್ನು ಕೊಳ್ಳಪಟ್ಟಿ ಹಿಡಿದು ಕೊಂಡು ಬಂದು 

ದುಡಿಸಿ ಗುಂಡಾ ಗರ್ದಿ ಮಾಡತಿರಿ 

ಇದನ್ನೆಲ್ಲಾ ನಾವು ಪಬ್ಲಿಕ್ ನಾಗ  ಓದಿ 

ಖೋಕಾಡಿಸಿ ನಕ್ಕು ಮಂಗ್ಯಾ ಆಗುವಂಗ ಮಾಡತಿರಿ 

ಆದರೂ ನಮಗ ನೀವು ಒಂತಾರಾ  ಸಂತನ ತರಾ ಅನಸ್ತೀರಿ

ಅದಕ್ಕೆ 

ತಗೊಳ್ಳಿ ಸರ್ ಈ ಶಾಲು 

ಕೊಡತಾ ಇದ್ದೀವಿ ನಾವು ಆಸಿ ಕನ್ನಡಿಗರು 

ನಿಂತಗೊಂಡು ಸಾಲು-ಸಾಲು 

(ಹಾಗೆ ಅದರೊಳಗಡೆ ಇವೆ ಬೀರ್ ಬಾಟಲು)

ನಾ ಕಂಡ ಆಸ್ಟ್ರೇಲಿಯಾ 

ರಚನೆ: ಜೆ. ಎಸ್. ಗಾಂಜೇಕರ, ಕುಮಟಾ (ಉ. ಕನ್ನಡ.)

ನೋಡಲೇ ಬೇಕಾದ ದೇಶ ಆಸ್ಟ್ರೇಲಿಯಾ

ಅಚ್ಚ ಹಸಿರಿನಿಂದ ಕಂಗೊಳಿಸುತಲಿದೆ ಈ ಏರಿಯಾ

ಸಾಗರದ ಮಧ್ಯದಲಿ ನೆಲೆಸಿಹುದು ಈ ದೇಶ

ಸಾರುತಲಿದೆ ವಿಶ್ವದಲಿ ಸೌಂದರ್ಯದ ಸಂದೇಶ

ನಿಸರ್ಗದ ರಾಶಿಯೇ ತಾನೆನ್ನುತಿದೆ ಈ ನಾಡು

ಕೈ ಬೀಸಿ ಕರೆಯುತಿದೆ ಪ್ರಕೃತಿಯ ಬೀಡು

ಎತ್ತ ನೋಡಿದರತ್ತ ಸುಂದರ ಮನೆಗಳ ಸಾಲುಗಳು

ಆಧುನಿಕತೆಯ ವಿನ್ಯಾಸದ ಅಂದದ ರಸ್ತೆಗಳು

ಕಣ್ಣಿಗೆ ಹಬ್ಬವ ನೀಡುವ ಚಂದದ ಹೂದೋಟ

ಮರೆಯಲಾಗದು ಅಲ್ಲಿಯ ರಮ್ಯ ನೋಟ

ಸ್ವರ್ಗವೇ ಧರೆಗಿಳಿದು ಬಂದಂತಿದೆ ಈ ಪ್ರದೇಶ

ಬಣ್ಣಿಸಲಾಗದು ಅಲ್ಲಿಯ ವೈವಿಧ್ಯಮಯ ಶಿಲಾಕೃತಿಯ ವಿಶೇಷ

ಕವಿಯ ಕಲ್ಪನೆಗೂ ನಿಲುಕದ ಭವ್ಯ ವಿನ್ಯಾಸ

ವರ್ಣಿಸಲಾಗದು ಅಲ್ಲಿಯ ವಿನೂತನ ಆಧುನಿಕತೆಯ ಆಭಾಸ

ಸಮಸ್ತ ವಿಜ್ಞಾನಿಗಳ ಕರಕುಶಲತೆಯ ಸಾಕಾರ

ಊಹಿಸಲಾಗದು ಅಲ್ಲಿಯ ತಾಂತ್ರಿಕತೆಯ ಚಮತ್ಕಾರ

ಸ್ವಚ್ಛತೆಯೇ ಸ್ವರ್ಗವೆಂದು ಸಾರುತಿಹುದು ಈ ಜಗದಲಿ

ಹುಡುಕಿದರೂ ಸಿಗದು ಕಸ-ಕಡ್ಡಿ ರಸ್ತೆಯ ಬದಿಯಲಿ

ಪುರಾಣೇತಿಹಾಸದಲಿ ವರ್ಣಿಸಲಾದ ಬೃಂದಾವನದಂತಿದೆ ಈ ಊರು

ಪ್ರತಿಸ್ಠಾಪಿಸಲಾಗಿದೆ ಇಲ್ಲಿ ದೇವಿ -ದೇವತೆಯರ ಮೂರುತಿ ಸಾವಿರಾರು

ದ್ವಾಪರ ಯುಗದ ನಂದಗೋಕುಲದಂತಿದೆ ಇಲ್ಲಿಯ ನೋಟ

ಗಮನಕ್ಕೆ ಬಾರದೇ ಇರದು ಇಲ್ಲಿಯ ನಾರಿಯರ ಅಂದ-ಚಂದದ ಮೈಮಾಟ

ನನಗನಿಸಿತು ನಮ್ಮಲ್ಲಿಯ ಅಪ್ಸರೆಯರ ಪುನಜನ್ಮವೆಂದು

ಅವರ ನಯನಮನೋಹರ ರೂಪರಾಶಿ ನೆನೆದು

 

  ಬೆಳಗು

 - ವಿ.ಎಂ.ಎಸ್. ಗೋಪಿ,  ಬೆಂಗಳೂರು. 

ಬೆಳಗು ಬಾ ಬೆಳಕು

ಬೆಳದಿಂಗಳ ಬೆಳಕು ಚೆಲ್ಲುತ

ರಂಗು ರಂಗಿನ ಕಾಮನಬಿಲ್ಲಿನಂತೆ

ಮಿನು ಮಿನುಗುವ ಬೆಳ್ಳಿಚುಕ್ಕಿಯಂತೆ

ರಂಗು ರಂಗಿನ ರಂಗೋಲಿಯಂತೆ

ನೆನಪಿನಂಗಳದಿ ನಗು ನಗುತ

ನೀ ಬೆಳಗು ಬಾ ಬೆಳಕು... 

ಈ ಬಾಳ್ ಕತ್ತಲೆಯ ಬದುಕು 

ಹೊಸ ಜ್ಯೋತಿಯ  ಹೊಂಬೆಳಕಲಿ 

ಸೂರ್ಯನ ಬೆಳಕು ಚೆಲ್ಲುತ 

ದ್ಯಿವ ಜ್ಯೋತಿಯ ಉದಯಿಸುತ 

ಬೆಳಗು  ಬಾ ಬೆಳಕು...

 

 

ಪ್ರೀತಿ ಸೆರಗು 

- ಉಮಾ ಕಟ್ಟಿ, ಸಿಡ್ನಿ 

ಯಾರ ದೃಷ್ಟಿ ತಾಗಿತೆನ್ನ

ನಿನ್ನ ಪ್ರೀತಿಗೆ

ಅತ್ತು ಕರೆದು ನಕ್ಕು ನಲಿದ

ಎಮ್ಮ ಬಾಳಿಗೆ

ಬಂದಿತೆಂತೋ ವಿಷದ ಗಾಳಿ

ಪ್ರೀತಿ ಸೆರಗು ಮುಳ್ಳು ಬೇಲಿ -

ಗಂಟಿಕೊಂಡಿತು

ಎಳೆದರೆನಗೆ ಹರಿದ ಸೆರಗು

ಬಿಚ್ಚಲಾರೆ ದಾರಿ ಮಧ್ಯೆ

ತಿರುಗಬೇಕು ತಾಳ್ಮೆ ಬೇಕು

ತಗ್ಗಿ ಬಗ್ಗಿ ಬಿಡಿಸಬೇಕು

ಒಂದೊಂದೇ ಮುಳ್ಳಿನಿಂದ 

ಪ್ರೀತಿ ಸೆರಗನು

ಎನಗಿಂತ ದಿಟ್ಟ ಧೀರ 

ಎತ್ತರದ ನಿಲುವು ನಿನದು

ಕೊನೆಯ ಎರಡು ಮುಳ್ಳ

ನೀನು ಬಿಡಿಸಲಾರೆಯಾ

ಎನ್ನ ಸೆರಗು ಎನ್ನ ಮಾನ

ಉಳಿಸಲಾರೆಯಾ

ಮೌನ

ಕವನ - ಶ್ರೀಮತಿ ಅನು ಶಿವರಾಂ, ಸಿಡ್ನಿ 

ಜ್ಞಾನ ಕೊಡುವ ಗುರುವನರೆಸುತ ನಾ ಊರೂರು ಅಲೆದೆ,

ಗುಡಿ, ಆಶ್ರಮಗಳಲ್ಲಿ ಸಿಗಲಿಲ್ಲ ಮನವೊಪ್ಪುವ ಗುರುವು ಎನಗೆ.

ಸುಡು ಬಿಸಿಲಲಿ ಬೆವರಿ, ಬೆಂಡಾಗಿ ನಾ ತಿರುತಿರುಗಿ ಬಳಲಿದೆ

ತನು-ಮನ ನೊಂದ ತಾಪದಲ್ಲಿ ನೀರಡಿಸಿ ನದಿಯೆಡೆಗೆ ನಡೆದೆ.

ಝುಳು ಝುಳು ನಲಿಯುತ್ತ ನದಿ ತುಂಬಿ ಹರಿದಿತ್ತು

ತನ್ನಲ್ಲಿ ಉಗಿದವರ, ತೊಳೆದವರ ಕೊಳೆಯ ಕ್ಷಮಿಸಿತ್ತು.

ಬಡವ, ಬಲ್ಲಿದ ಬೇಧವಿಲ್ಲದೆ ಎಲ್ಲರಿಗು ನೀರಿತ್ತು ಸಲಹಿತ್ತು

ಮೌನದಲಿ ಗುರಿಯೆಡೆಗೆ ಸಾಗುವ ಪಾಠವ ಅದು ಸಾರಿತ್ತು.

ನದಿಯ ದಡದಲೇ ಹರಡಿತ್ತು, ಹಸಿರು ಮರದ ತಂಪು ವಿಸ್ತಾರ

ಹೂ,ಹಣ್ಣು ಹೊತ್ತು ನಗುವ ಮರದಲ್ಲಿ ಕೇಳಿತು ಹಕ್ಕಿಗಳ ಇಂಚರ.

ಜೀವಿಗಳ ಪೊರೆವ ಹೆಮ್ಮರ, ನೀಡಿದೆ ನಮಗೆ ತನ್ನೆದೆಯ ಉಸಿರ,

ಮೌನದಲಿ ನೆಲೆನಿಂತ ಮರ ಯಾರಿಂದಲೂ ಕೇಳಲಿಲ್ಲ ಪ್ರತ್ಯುಪಕಾರ.

ಚೆಂದದ ಕರಿ ಹಸುವು ಅಲ್ಲೇ ಮರದಡಿಯಲಿ ಮಲಗಿತ್ತು

ಬಿಳಿನೊರೆಯ ಹಾಲು ಅದರ ಒಡಲಲಿ ತುಂಬಿ ಹರಿದಿತ್ತು.

ಗೋಮಾತೆಯ ಪ್ರತಿ ಅಂಗದಲೂ ಸಾರ್ಥಕತೆಯ ಸೆಲೆಯಿತ್ತು

ಮೌನದಲಿ ಮನುಜನಿಗೆ ಮಾಡುವ ಉಪಕಾರವ ಸಾವಿರವಾಗಿತ್ತು.

ನಿಸರ್ಗದ ತಂಪಿನ ನೆರಳಲ್ಲಿ ಕೊನೆಗೂ ದೊರೆಯಿತು ಉಪದೇಶ ಸಾರ

ಆಯಿತು ಪ್ರಕೃತಿಯ ನಿಜ ಶಕ್ತಿದರ್ಶನ, ಕೇಳಿಸಿತು ಗುರುವಿನ ಮೌನ ವ್ಯಾಖ್ಯಾನ.

ಹೊರನಾಡವರು 

ಕವನ - ಉಮಾ ಕಟ್ಟಿ , ಸಿಡ್ನಿ 

ದೇಶ ಬಿಟ್ಟವರು ನಾವು

ಭಾಷೆ ಬಿಟ್ಟವರಲ್ಲ

ನಾಡ ಬಿಟ್ಟರೂ ನಾವು

ನುಡಿಯ ಬಿಡಲಿಲ್ಲ

ಹೊಟ್ಟೆಪಾಡಿಗಾಗೋ

ಉನ್ನತ ವ್ಯಾಸಂಗಕ್ಕಾಗೋ

ವಿದೇಶ ಭ್ರಮಣ ಸಾಹಸಕ್ಕಾಗೋ

ಬಿಟ್ಟು ಬಂದೆವು ನಾವು ಬಂಧುಬಾಂಧವರ

ಹೊರಡುತ್ತೇವೆ ದಿನ ಬೆಳಗು

ಇಲ್ಲಿಯ ವೇಷ ಭೂಷ ಧರಿಸಿ

ಅವರಂತೆ ನಡೆ-ನುಡಿಯುತ್ತೇವೆ

ಎಲ್ಲರೊಳು ನಾವು ಸಮ್ಮಿಳಿತವಾಗಿ

ಮರಳುತ್ತೇವೆ ಮನೆಗೆ

ನಮ್ಮ ಅಡಿ ಗಡಿಯೊಳಗೆ

ನಮ್ಮದೇ ಊಟ ಉಣಿಸು

ವೇಷ ಭೂಷ ಚಿತ್ತ ಕೋಶಕ್ಕೆ

ನಮ್ಮದೇ ಹಬ್ಬ ಹರಿದಿನಗಳು

ನಮ್ಮದೇ ಹಾಡು ಹಸೆ ಶೃಂಗಾರವು

ಹಾಡಿ ಕುಣಿಯುತ್ತೇವೆ ನೋಡಿ ನಲಿಯುತ್ತೇವೆ

ನಮ್ಮದೇ ತಾಳಕ್ಕೆ ನಮ್ಮ ಹೆಜ್ಜೆ

ಭಾಷೆ ಕಲಿಸುವವರಿಹರು

ಹಾಡ ಹಾಡುವವರಿಹರು

ನಮ್ಮದೇ ಸಾಹಿತ್ಯ ಸಂಸ್ಕೃತಿ ಕಲೆ

ಮೆರೆಸುವವರಿಹರು

ಊರಲ್ಲಿ ನಮ್ಮ ಧರ್ಮ ಮತಗಳ

ಗುಡಿ ದೇಗುಲ ಮಠಗಳಿಹವು

ಕುಳಿತು ಕೇಳಲು ನಮ್ಮದೇ ವಾಣಿಯ

ವಿಶಿಷ್ಟ ಬಾನುಲಿಯೂ ಇಹುದು

ವಿಶ್ವಮಾತೆಯ ದಶ ದಿಕ್ಕುಗಳಲ್ಲೂ

ನಮ್ಮ ನಾಡ ಗುಡಿ*ಯನ್ನು

ಏರಿಸಿ ಮೆರೆಸುವವರು ನಾವು

ಹೊರನಾಡ ಕನ್ನಡಿಗರು ನಾವು

*ಗುಡಿ - ಇಲ್ಲಿ ಈ ಶಬ್ದಕ್ಕೆ ಬಾವುಟ ಅಥವಾ ಧ್ವಜ ಎಂಬ ಅರ್ಥ

ಚುಟುಕುಗಳು

1) 

ನನ್ನೀ ಅಕ್ಷರಗಳ ಬದುಕು

ನಿನ್ನ ಕಂಗಳ ತಲುಪಿ ಸಾರ್ಥಕ ವಾಯಿತು

2)

ಮಾತಿಗೆ ಮಾತು 

ಬೆಳೆದು 

ಕಡೆಗೆ 

ನಿಲ್ಲುವುದು 

ಮಾತೇ

3)

ಹಲವಾರು 

ಮುಖವಾಡಗಳಲ್ಲಿ 

ನನಗಿಷ್ಟ 

ಈ ನಗುವಿನ 

ಮುಖವಾಡ 

ಮುಚ್ಚಿಡುವುದು 

ಸುಲಭವಾಗಿ 

ಮನದ 

ನೋವುಗಳ 

ಸಿಡುಬು

ವಿನೋದ್ ಕುಮಾರ್ ಬೆಂಗಳೂರು  

 

1

ಏಕೀ ಬೇಕು 

ಈ ವೇದನೆ 

ನೀ ನನ್ನ 

ತಿದ್ದದೇ 

ನಾ ನಿನ್ನ 

ತಿದ್ದದೇ

2

ರಾತ್ರಿ ನಿನಗಾಗಿ

ಸುರಿಸಿದ್ದ ಕಂಬನಿಯ

ಮುಂಜಾನೆಯಲಿ

ಎಲೆಗಳು ಹೊತ್ತಿದ್ದವು

3

ವಿರಹಿಯ ಕವನದ

ಅಳಿದುಳಿದ 

ಕೊನೆಯ ಸಾಲುಗಳಂತಿದ್ದವು

ಬೀಳ್ಕೊಡುವಾಗ 

ಅವಳ 

ಹೆಜ್ಜೆಗಳು

 4)

 ಕೇಳುತ್ತಿರಲಿಲ್ಲ

ನಾ ಮಾತನಾಡುವುದನ್ನು

ನನ್ನ ಕಂಗಳಲ್ಲಿ

ನಿಜವ ಹುಡುಕುತ್ತಿದ್ದಳು

*****

5)

ಹೆದರಿಕೆಯೆಂಬ

ಹೆಣವ

ಭುಜದಿಂದಿಳಿಸಿ

ಹಾರಲು ಬಯಸಿದೆ

ರೆಕ್ಕೆಗಳು 

ಮೂಡತೊಡಗಿದವು

*****

6)

ಎಷ್ಟು ಚೆನ್ನ 

ಕಡಲೊಳು ನದಿ 

ಮಾಯವಾದಂತೆ 

ಅಳು 

ನಗೆಗಡಲಲ್ಲಿ 

ಕಣ್ಮರೆಯಾದೊಡೆ

****

7)

ಪೆದ್ದುತನದ 

ಗಡಿಯ ದಾಟಿ 

ನೋಡತೊಡಗೆ

ಕಾಣ ಹತ್ತಿತು 

ಹುಸಿಯ 

ಉಡುಗೆ ತೊಡುಗೆ

 

5)

ಅವನು 

ಖಿನ್ನನಾಗಿ 

ಕತ್ತಲಾಗತೊಡಗಿದನು

ಅವಳು

 ಅವನಿಗಾಗಿ 

ಬೆಳದಿಂಗಳಾಗತೊಡಗಿದಳು

*****

6)

ಮರುಭೂಮಿ ಮನ

ಇಲ್ಲವೆಂದುಕೊಂಡರೆ  ಏನೂ ಇಲ್ಲ 

ಏನಾದರೂ ಇದೆಯೆಂದರೆ 

ಇವೆ 

ಓಯಸಿಸ್ 

ಒಂಟೆ 

ಖರ್ಜೂರದ ಮರ

******

7)

ನಿನ್ನ 

ಮರೆಯದೇ ಇರುವುದು

ನನಗಿಷ್ಟವಾದ 

ಯಾತನೆಗಳಲ್ಲೊಂದು

*****

8)

ಅಡವಿಡಲು ಹೋದೆ ಈ ದಿನವ 

ನೆಮ್ಮದಿಯ ನಾಳೆಗಾಗಿ

ಮನಸ್ಸಾಕ್ಷಿಯೆಂಬ ಗಿರಿವಿ ಅಂಗಡಿಯವ 

ಹೇಳಿದ ಖಾರವಾಗಿ

ಸರಿಯಾಗಿ ದುಡಿಸಿಕೋ ಈ ದಿನವ

ನೆಮ್ಮದಿಯ ನಾಳೆ ನಿನ್ನದಾಗುವುದು

***

ಪುನರಾವರ್ತನೆ 

- ಹೇಮಾ  ಸದಾನಂದ್ ,  ಮುಂಬಯಿ  

ಬದುಕಿನ ಬಾಗಿಲಿನ ಬಳಿ  ಬಂದು ನಿಂತು 

ನೀನು ನನ್ನ ಕರೆದಾಗ  ಸಂಜೆಯಾಗುವ ಸೂಚನೆ 

ಕನ್ನಡಿಯಲ್ಲಿ ಕಂಡ ಕನಸಿನ ಬಣ್ಣ ಬೆರಳ ತುದಿಯಲ್ಲಿ 

ಅಳಿದುಳಿದು  ನಿನ್ನ ಬರುವಿಕೆಯ  ದಾರಿ ಕಾಯುತ್ತಲಿತ್ತು 

ಅಂದು ನಿನ್ನ ನಗುವಿನಲ್ಲೂ ಸುತ್ತಿ ತಂದ  ಉಡುಗೊರೆಯ

ಭಾರ ಎದೆಯೊಳಗೆ  ಉಸಿರಾಗಿ ಇಳಿದರೂ 

ಕೆನ್ನೆಯಲ್ಲಿ  ಕೆಂಪು  ಕಣ್ಣಲ್ಲಿ ತಂಪು ಮೌನಗಳು 

ಮಿಸುಕಾಡಿ ತುಟಿಯಂಚಿನ  ಕಂಪನವನ್ನು ತಡೆದ 

ರಾತ್ರಿಯ ಮೈಯೆಲ್ಲಾ ಹಗಲಿನ ಪ್ರಭೆ 

ಕಾಡಿಗೆಯಲ್ಲಿ ಕರಗಿದ ಕವಿತೆಯಲ್ಲಿ  ಬೆರೆತ 

ನಿಟ್ಟುಸಿರಿನಲಿ  ಕಾಣೆಯಾದ ನಿನ್ನ ಹೆಸರನ್ನು ತಡಕಾಡಿದಿದ್ದೆ  

ಮೌನ ಹೆಜ್ಜೆಗಳ ದೂರದ  ಗಮ್ಯ  

ಸುಸ್ತಾದ ನೆರಳಿನ  ಏಕಾಂಗಿ ಪಯಣ 

ಕರ್ಕಶ ದನಿಗಳ ನಡುವೆ ಕ್ಷೀಣವಾದ 

ಅಳಲೊಂದು ಕೇಳಸಿದಾಗ ಚೇತರಿಸಿತು  ಜೀವ 

ಭಾವದೊಡಲಲ್ಲಿ ಕೆನೆಗಟ್ಟಿದ ಆಸೆಗಳ ಅಲಂಕಾರ 

ಗುನುಗುಟ್ಟುವ ತೊದಲು ಮಾತಿನ ಝೇಂಕಾರ 

ಹಸಿಯಾಗಿದೆ ಹಸುರಾಗಿದೆ  ಮನಸ್ಸು 

ಭೂಮಿ ಭಾರದ ಸಂಭ್ರಮ ನಮ್ಮೊಳಗೀಗ 

ಬರುವೆಯಾದರೆ ಬಾ ತೆರೆದಿದೆ ಬಾಗಿಲು 

ಸರಿ ತಪ್ಪುಗಳ ಲೆಕ್ಕವಿಲ್ಲದ ಹಿತವಾಗಿ ಮಾತಾಡು 

ತಾಳ್ಮೆಯಿಂದ   ಕೇಳಿಕೊಳ್ಳುವೆ  

ಆಕಾಶ ತಿಳಿಯಾಗಿದೆ ದೀಪ ಹಚ್ಚುವ ಹೊತ್ತು 

ಇನ್ನು  ಹೋರಾಡಬೇಕು ನೀನು 

ತೊಟ್ಟಿಲ ತೂಗಿ ಜೋಗುಳ ಹಾಡಬೇಕಿದೆ 

ಚುಟುಕುಗಳು

- ವಿನೋದ್ ಕುಮಾರ್ ಬೆಂಗಳೂರು 

ಶ್ರೀ ವಿನೋದ್ ಕುಮಾರ್

1)

ನನಗೆ ನಿನ್ನ ನೋಡಿದಾಗ 

ನೆನಪಾಗುವುದು 

ಅದೇ ಸಿಂಬಳ ತುಂಬಿದ 

ನಾಸಿಕ 

ಅದೇ ನಿಷ್ಕಲ್ಮಶ ನಗು 

ನಾವಿಬ್ಬರು 

ಎಷ್ಟು ದೂರವಿದ್ದರೇನು 

ನಮಗೆ ಎಷ್ಟು 

ವಯಸಾದರೇನು 

ನೀ ನನಗೆ ಇನ್ನೂ 

ಲಂಗ ತೊಡುವ ಸಹೋದರಿ 

ನಾ ನಿನಗೆ ಇನ್ನೂ 

ಚಡ್ಡಿ ಹಾಕಿರುವ ಸಹೋದರ

2)

ಹೊಟ್ಟೆಕಿಚ್ಚಿನ

ಕೆನ್ನಾಲಿಗೆಗಳು

ತಾಕಬಾರದೆಂದೇ 

ಸಂತೋಷದ ರೆಕ್ಕೆಗಳ ಅರಳಿಸಿದೆ

ತಾಳ್ಮೆಯ ಹಂಸದಂತೆ

ಎಲ್ಲೆ ಮೀರಿ

ಎಲ್ಲವನು ಮೀರಿ

ಗುರಿಯ ಕಡೆ ಸಾಗಿದೆ

3)

ಜೊತೆಗೆ ಬಂದವರೊಡನೆಲ್ಲ 

ಮನಸ ಹಂಚಿಕೊಳ್ಳಬೇಡ

ಅಂಬಿಗ

ನಿನ್ನೊಡನೆ ಅವರ 

ಸಂಬಂಧ ದಡ 

ತಲುಪಿಸುವವರೆಗಷ್ಟೆ 

ಆನ್ಲೈನ್ ತರಗತಿ 

- ಹೇಮಾ  ಸದಾನಂದ್ ,  ಮುಂಬಯಿ 

ಸೂರ್ಯನಿದ್ದಾನೋ  ಇಲ್ಲವೋ  

ಚಿಂತೆ ಕಾಡಲೇ ಇಲ್ಲ

೨೪× ೭  ನೆಟ್ ಇದೇಯೋ ಇಲ್ಲವೋ

ಯಾವಾಗ ಹೋದೀತೋ

ಆತಂಕದಲ್ಲೆ   ದಿನವೆಲ್ಲಾ  

ಗಡಿಬಿಡಿಯಲ್ಲಿ ಟ್ರೇನ್ಹತ್ತಿ ಬಿದ್ದೇನೆಂಬ ಆತಂಕ

 ಬಸ್  ಗದ್ದಲಗಳಲ್ಲಿ 

ಕೂದಲು ಕೆದರುವ 

ತೊಟ್ಟಿದ್ದು  ಸುಕ್ಕಾಗುವ

ಎಲ್ಲಿ ವಿದ್ಯಾರ್ಥಿಗಳ ನೋಟ್ಸ್ ಮರೆತು ಬಂದೆನೇನೋ...  

 ಸಂಘರ್ಷಣೆಯ ಹಿತಾನುಭವ.....

ಈಗ ಅದ್ಯಾವ ಭಯವಿಲ್ಲ 

ಇದು ೨೦೨೦ರ  ವೆಬಿನಾರ್  ಶಾಲೆ 

ಗಂಟೆ ಎಂಟಾಗಿದೆ  ಆಲಸ್ಯದ  ಮೋಡಗಳನ್ನು  

ಆಕಳಿಕೆ ಒಡಮುರಿಕೆ 

ಮೆಲ್ಲನೆ ಆಚೆಗೆ ದೂಡಿ ಆನ್ಲೈನ್ ಪಾಠಕ್ಕೆ ಕೂತಿದ್ದೇನೆ

ತೊಟ್ಟ ಮನೆ ಬಟ್ಟೆಕಾಣದಂತೆ

ಮೆಕಪ್ಪ್ ಗಳ ಚಿಂತೆ ಸರಿಸಿ

ನಿದ್ದೆತುಂಬಿದ  ಆ  ಪುಟ್ಟ ಕವಡೆಗಳ 

ಮೇಲೆ ನಗುವಿನ ನೀರು  ಚುಮುಕಿಸಿ  

ಗುಂಡಿಯೊಂದನ್ನು ಒತ್ತಿ 

ತೆರೆದ ಬಾಗಿಲಲಿ ನಿಂತ ಒಬ್ಬೊಬ್ಬರ ಹಾಜರಿ ಹಾಕುತ್ತಲೇ

"ಗುಡ್ ಮಾರ್ನಿಂಗ್ ಚಿಲ್ಡ್ರನ್" ಎನ್ನುತ್ತೇನೆ 

ಅತ್ತ  ಬಾಣಲೆಯಲ್ಲಿ ಸಾಸಿವೆ ಸಿಡಿಯುತ 

ಕುಕ್ಕರ್ ಸೀಳ್ಳೆಗೂ ಬಂದೆ ಇರು ಎನ್ನುತ್ತಾ    

ಪಕ್ಕದ ಕೋಣೆಯ ಫ್ಯಾನಿನ ಕೀರಲು 

ಅಳುವಿನ  ಬಾಯಿಯಿಂದ  ತಪ್ಪಿದ ಮೊಲೆಯನು 

ಹುಡುಕುವ  ಹಸು ಕೂಸಿನ ಕೂಗಿಗೆ 

ಕಿವಿಗಳು ಮಂದವಾದ ಅನುಭವ 

ಶೂನ್ಯವನ್ನೇ ಹಾಸಿ ಹೊದ್ದ ಮುದಿ  ಜೀವದ 

ಬಿಕ್ಕಳಿಕೆಗಳು  ಅನುಮತಿಯಿಲ್ಲದೇ 

ತರಗತಿಯಲ್ಲಿ ಹಾಜರಾಗಿವೆ. 

ಭಾಷಾ  ಪಾಠದ ಮಧ್ಯ ತೂರಿಬಂತು 

ತಿಂಗಳ ಖರ್ಚಿನ ಪಟ್ಟಿ 

ವಿಜ್ಞಾನದ ಪಾಠವನ್ನೂ ಆವರಿಸಿ

ಮೆಥೆಮೆಟ್ಕ್ಸನ್ನೇ ಸಂಪೂರ್ಣ ತಪ್ಪಿಸಿತ್ತು

ಮಗನಿಗೆ ಹೇಳಿದಾಗ ತಲೆ

ಹೊಟ್ಟೆ ಸಹಿತ ತೊಳಸಿದಂತಾಗಿತ್ತು

ಅಮ್ಮ ಬ್ಯಾಲೆನ್ಸ್ ಶಿಟ್ ನೋಡು

ಹೌದು ನೋಡಲಾಗದೇ 

ಕೇಳಿದ್ದು..

ಸೂತಕದಲಿದ್ದ ಆದಾಯದ ರೋದನ ಮುಗಿಲವರೆಗೆ 

ಗಂಡ,ಮುಗಿಲು ಮಾರಿಗೆ ಹಿಡಿದ ನಂಜು ತೆಗೆಯಲಾದೀತೇ..

ನೋಡುತ್ತಲೇ ಇದ್ದರು

ಅಂಗೈಯಲ್ಲಿ ನಾಲ್ಕಾರು

ಹಸಿದ ಹೃದಯಗಳನ್ನು ಜಾರದಂತೆ ಹಿಡಿವ ಪ್ರಯತ್ನ ಪಡುತ್ತ....

ಓ!!!!

೨೫ ಕ್ಕೂ ಹೆಚ್ಙಿನ ಬಾಗಿಲುಗಳು ತೆರೆದಿವೆ

ಮುಪ್ಪಿನಲಿ ಸುಕ್ಕು ಗಟ್ಟಿದ ನಗೆ

ಪಿಸಿದ ನೈಟಿ ಬರ್ಮೂಡಾಗಳ ಹೊಲಿಗೆಯಲಿ ತಲ್ಲೀನತೆ

ಮಿಕ್ಕೆಲ್ಲ ನಮ್ಮದೇ ...ಥೇಟ್

ನಮ್ಮದೇ

ಮಧ್ಯೆ ಮಧ್ಯೆ ಅಮ್ಮಂದಿರ ಕ್ಷೀಣ ದನಿ 

"ಚೆನ್ನಾಗಿ ಪಾಠ ಕೇಳು"

"ಗುರುಗಳಿಗೆ ವಿಶ್ ಮಾಡಿ....."

"ಟೀಚರ್ ನೋಡಿ ಟೀವಿ ಯಲ್ಲಿ"

ಪುಟಾಣಿಗೆ ಕಂಡದ್ದು ನನಗೆ ಕಂಡಿರಲಿಲ್ಲ

ಜೋತಿಷಿ ವಾರ ಭವಿಷ್ಯ ಹೇಳುತ್ತಿದ್ದ

ಗ್ರಹಗಳು ವಕ್ರವಾಗಿವೆ

ಆದಾಯ ಚೆನ್ನಾಗಿದೆ

ಶನಿ ಶಾಂತಿ ಮಾಡಿಸಿ ಮಂಗಳನಿಗೆ ಪೂಜೆ ಮಾಡಿ

ರಾಹೂ ಜಪ ಕೇತೂ ಸ್ಮರಣೆಯಿಂದ ಮನಃ ಶಾಂತಿ

ಶೀತ ಬಾಧೆ..ಒಣ ಕೆಮ್ಮೂ ಜ್ವರ ಬಂದಾವು ಜೋಕೆ....

ಖರ್ಚು ಜಾಸ್ತಿ...

ಹುಡುಗಿಯೊಂದು ಕೇಳಿತು

ಮೇ ಆಯ್ ಕಮೀನ್ ಟೀಚರ್ !!!

ಸ್ವಾರಿ ಫಾರ್ ಟೂ ಲೇಟ್ ಟೀಚರ್.

ತೆರದದ್ದೇ ಬಾಗಿಲಲಿ ಬಂದಿದ್ದಳಾ ವಿದ್ಯಾರ್ಥಿ

ಆಗಲೇ ಎಲ್ಲ ಮಕ್ಕಳಿಗೆ ಹೇಳಿದೆ

ಇಂದಿನ ಕ್ಲಾಸ್ ಮುಗಿಯಿತು.

ನಾಳೆ ಸಮಯಕ್ಕೆ  ಸರಿಯಾಗಿ ಬನ್ನಿ........."

ಗೋಡೆ ಗಡಿಯಾರ ಮುಸಿ ಮುಸಿ ನಗುತ್ತಿತ್ತು.

ಚುಟುಕುಗಳು

- ವಿನೋದ್ ಕುಮಾರ್ ಬೆಂಗಳೂರು

ಮುನಿಸಿನ ಬಿರುಕುಗಳು

ಕಾಣತೊಡಗಿದವು

ನಾ ಮುಗುಳುನಗೆಯ

ಮಲ್ಲಿಗೆ ಗಿಡಗಳ

ನೆಡತೊಡಗಿದೆ ಅಲ್ಲೆಲ್ಲಾ

*******

ಬಾ

ಒಬ್ಬರಿಗೊಬ್ಬರ

ವ್ಯಸನಿಗಳಾಗೋಣ

*******

ಕಳೆದುಕೊಂಡೆ 

ನನ್ನೆರಡು ಮುತ್ತುಗಳ 

ನಿನ್ನೊದೊಂದು ಮುತ್ತ 

ಕದಿಯುವ ದೆಸೆಯಿಂದ

*******

ಅಭಯ ಹಸ್ತ ನೀಡಲಾಗದೆ 

ಬರೀ ವ್ಯಥೆ ಕೇಳುವ  ಕಿವಿಯಾದೆ

******

ಕಥೆ

- ದೀಪಿಕ  Sydney 

ಎಷ್ಟು ಬರೆದರೂ ಮುಗಿಯದ ಕಥೆ
ಸಾಲುಗಳ ಸರಮಾಲೆಯಾಗಿ
ಪುಟಗಳ ತಿರುವಂತಾಗಿದೆ

ಪುಟಗಳಿಗೆ ಎಣೆಯಿರದೆ
ಕೊನೆಗೊಂದು ಮುಕ್ತಾಯವಿಟ್ಟು
ಸುಮಾರಾದ ಪುಸ್ತಕವಾಗಿದೆ

ಆ ಕಥೆಗೊಂದು ಶೀರ್ಷಿಕೆ
ಅದ ನೋಡಿ ಅರಿಯಬೇಕು
ಕಥೆಯ ಒಳಅರ್ಥ

ಪಾತ್ರಗಳು ಕಾಲ್ಪನಿಕ 
ನೀಡಿವೆ ನಿಜ ಜೀವನದ
ಹಲವು ಕುರುಹ

ಇದು ಎಲ್ಲರ ಜೀವನದ ಕಥೆ
ಮುಗಿವುದು ಪುಟಗಳ ತಿರುವಿದಂತೆ
ಓದುಗರು ಓದುವರು ನಾವು  ಬರೆದಾಗ
ಮಾತ್ರ ಅವರು ಮೆಚ್ಚುವಂತೆ.

ಪಶ್ಚಿಮ ಮುಖಿ 

- ಶ್ರೀಮತಿ ಉಮಾ ಕಟ್ಟಿ, ಸಿಡ್ನಿ 

ನಮ್ಮವರನ್ನು
ನಮ್ಮೂರನ್ನು
ದೇಶವನ್ನೂ ಬಿಟ್ಟು
ಬಹುದಿನವಾಯ್ತು
ಭಾಷೆಯೇ ಬೇರೆ

ವೇಷ ಭೂಷವೂ ಬೇರೆ
ಬಂದಿದ್ದಾಯ್ತು ಬಿಡಿ
ಆ ಮಾತು ಬೇರೆ

ಅನ್ನಿಗರಾದರು
ನಮ್ಮವರು
ಸನ್ಮಿತ್ರರೂ
ಇನ್ನಿಹರು
ಮನೆ ಮಠ
ಮಕ್ಕಳು ಮರಿ
ಸಂಸಾರವೇ
ಇಲ್ಲಿಹುದೀಗ
ಆದರೂ
ಎದೆಯೊಳಗಿನ
ದಿಕ್ಸೂಚಿ ಏಕೋ
ಇನ್ನೂ ಪಶ್ಚಿಮ ಮುಖಿ

 ದಿಕ್ಸೂಚಿ 

- ಶ್ರೀಮತಿ ಸಿಂಧುಶ್ರೀ ಸಂದೇಶ್

ಸಿಹಿ ಕಹಿ ನೋವು ನಲಿವುಗಳನ್ನು ಒಳಗೊಂಡ ಪಯಣ
ಸಿಹಿ ಕಹಿ ನೋವು ನಲಿವುಗಳನ್ನು ಒಳಗೊಂಡ ಪಯಣ
ನೌಕೆಯ ನಾವಿಕನಾರೋ ತಿಳಿಯಬೇಕೆಂಬ ತಲ್ಲಣ
ಕಣ್ಣಾಡಿಸದಷ್ಟೂ ದೂರ ಕಾಣುವ ಅಲೆಗಳು ಮತ್ತವುಗಳ ರಿಂಗಣ
ದೊರೆತಿರೆ ಮಾರ್ಗಸೂಚಿ ಸಾಗಲಿದೆ ನಿರಂತರ ಯಾನ
ತೋರಲು ದಿಕ್ಸೂಚಿ ಇನ್ನೀಗ ಆದೀತು ಅಡೆತಡೆಗಳ ನಿರ್ಗಮನ

 

ನವಗ್ರಹಗಳ ನಾಗಾಲೋಟ

-ಶ್ರೀಮತಿ ಸಿಂಧುಶ್ರೀ ಸಂದೇಶ್

ಸೂರ್ಯಗ್ರಹ ತಾ ತಂದನು ಕಾಂತಿಯನು

ಚಂದ್ರನಿಂದ ಪಡೆದದ್ದು ಮನಃಶಾಂತಿಯನು

ಮಂಗಳಕರವಾಗಿರಲೆಂದು ಹರಸಿರಲು ಅಂಗಾರಕನು

ಬುಧನಿಂದ ಪಡೆದದ್ದು ಯುಕ್ತಿಯನು

ಗುರು ತಾ ಹರಸಿರಲು ಅಪರಮಿತ ಜ್ಞಾನವನು

ಶುಕ್ರನಿಂದ ಲಭಿಸಿದ ಕೀರುತಿಯನು

ಶನಿಯಿಂದ ಪಡೆಯಲ್ಪಟ್ಟೆವು ಸಂಕಷ್ಟಗಳಿಂದ ಮುಕ್ತಿಯನು

ರಾಹುವಿನಿಂದ ಪಡೆಯಲು ಅಧಿಕಾರವನು

ಕೇತುವಿನಿಂದ ಹರಸಿರುವೆವು ಆಯುಷ್ಯವನು

ಹೀಗಿರಲು ಗ್ರಹಗತಿಗಳ ಚಲನವಲನ

ಧನ್ಯವಾಯಿತಲ್ಲ ಮನುಜರಿಗೆ ಮಾಡಿರಲು ಭಕ್ತಿಯ ನಮನ

                    

 ಹೆಣ್ಣು

- ದೀಪಿಕ  Sydney

ಹೆಣ್ಣನ್ನು ಹೆಣ್ಣಾಗಿ ಬದುಕಲು ಬಿಡು 

ತಿಳಿ ನೀನು
ಹೆಣ್ಣೆ ಸೃಷ್ಟಿಯ ಮೂಲ
ದೇವರ ರೂಪ
ಸಂಸಾರದ ಕಣ್ಣು
ಜನ್ಮ ನೀಡಿದ ತಾಯಿ
ಒಡ ಹುಟ್ಟಿದ ಸಹೋದರಿ
ಪ್ರೀತಿಯ ಸ್ವರೂಪದ ಮಗಳು
ಈ ಎಲ್ಲಾ ರೂಪವ ಹೊತ್ತು
ಗಂಡಿನ ಸಮನಾಗಿ ಬದುಕುವವಳು

ಈ ದೇವತಾ ಸ್ವರೂಪದ ಹೆಣ್ಣನ್ನು
ಬಲತ್ಕರಿಸಿ ನೀನು ಉಳಿಯುವೆಯ
ಅಪ್ರಾಪ್ಥೆಯೆನ್ನದೆ ಅರಳುವ ಹೂವನ್ನು
ಹೊಸಕಿ ಕೊಲ್ಲುವೆಯಾದರೆ
ನಿನ್ನ ಇರಹುಗೆ ಬೆಲೆಯಿಲ್ಲ
ನಿನ್ನ ವಿನಾಶ ನಿಸ್ಸಂಶಯ

ಹೆಣ್ಣನ್ನು ನಿನ್ನ ತಾಯಿಯಾಗಿ ಆದರಿಸು
ಸಹೋದರಿಯಂತೆ ರಕ್ಷಿಸು
ಮಗಳಂತೆ ಪ್ರೀತಿಸು
ನಿನ್ನ ಕಾಮದ ಕಣ್ಣನ್ನು ಸುಟ್ಟು ಬಿಡು
ಹೆಣ್ಣನ್ನು ಸಮಾಜದ ಶಕ್ತಿಯಾಗಿ ನೋಡು
ಎಲ್ಲರಂತೆ ಸಮನಾಗಿ ಸ್ವೀಕರಿಸು
ಇನ್ನಾದರೂ
ಹೆಣ್ಣನ್ನು ಹೆಣ್ಣಾಗಿ ಬದುಕಲು ಬಿಡು

ಮರೀಚಿಕೆ

-ಶ್ರೀಮತಿ ಸಿಂಧುಶ್ರೀ ಸಂದೇಶ್  Sydney 

ಸಮಯವೊಂದೇ ತಾನೇ ನಿಜದಲ್ಲಿ ಮರೀಚಿಕೆ
ಸಮಯವೊಂದೇ ತಾನೇ ನಿಜದಲ್ಲಿ ಮರೀಚಿಕೆ

ಭೌಗೋಳಿಕ ಸೂಚ್ಯಾಂಕ ಯಾವುದಿದ್ದರೇನು
ಪ್ರಾಂತ ಜಾತಿ ಭಾಷೆ ಬಣ್ಣ ಭಾವ ಯಾವುದಾದರೇನು

ಹಸಿರನ್ನು ಸಂಭ್ರಮಿಸುವ ಮಲೆನಾಡಿನಲ್ಲೂ
ಬಿರು ಶಾಖವನ್ನುಣಿಸುವ ಬಯಲುಸೀಮೆಯಲ್ಲೂ

ಜಾರಿ ಹೋದ ಈ ಕ್ಷಣ ಮತ್ತೆ ಕಾಣದಾಯಿತಲ್ಲ ನಿನ್ನೀ ವೀಕ್ಷಣ
ಸದುಪಯೋಗದಿಂದ ತಾನೇ ಸಮಯದ ನಿಶ್ಚಿತ ಪರಿಪೂರ್ಣ

ಸಮಯವೊಂದೇ ತಾನೇ ನಿಜ ಅರ್ಥದಲಿ ಮರೀಚಿಕೆ!!!

ಕಾಲನ ಪಯಣ

-ಶ್ರೀಮತಿ ಸಿಂಧುಶ್ರೀ ಸಂದೇಶ್  Sydney

ಕಾಲ ಹೀಗಿತ್ತು !! 
ಪ್ರಬಲನಾದ ಪೃಥ್ವಿರಾಜನ ಶೌರ್ಯ ದೇಶಪ್ರೇಮಗಳು ಕ್ಷೀಣಿಸಿತ್ತು

ಧೀರನಾಗಿ ಶತ್ರುಗಳ ನಾಶಪಡಿಸಿದ 
ಸಮರಸಿಂಹನ ಧೈರ್ಯ ನಿಶ್ಕ್ರಿಯವಾಗಿತ್ತು
ಪ್ರಾತಸ್ಮರಿತನೂ ಆದ ವೀರಪ್ರತಾಪನ
ಪರಾಕ್ರಮಗಳೂ ಲುಪ್ತವಾಗಿತ್ತು
ಕಾಲ ಮರುಗಿತ್ತು!!

ಕಾಲ ಜರುಗಿತ್ತು!!
ಪಶ್ಚಿಮ ಮಹಾರಾಷ್ಟ್ರದಲ್ಲಿ 
ಉದಯಿಸಿತೊಂದು ಬೆಳಕು
ವಿಂಧ್ಯೆಯಿಂದ ಕನ್ಯಾಕುಮಾರಿಯ ತನಕ
ಹರಡಿರಲು ಹಿಂದೂ ಸಾಮ್ರಾಜ್ಯದ ಧ್ಯೋತಕ
ಆರ್ಯ ಕೀರ್ತಿ ಎಂದೇ ಮೂಡಿಸಿತು ಪ್ರಖ್ಯಾತಿ
ಶಿವಾಜಿ ಮಹಾರಾಜರೇ ನಿಮಗಲ್ಲದೇ ಮತ್ತಾರಿಗಿದೆ ಇಂತಹ ಕೀರುತಿ
ಕಾಲ ಹರ್ಷಿಸಿತ್ತು!!

ತಿಂಡಿ ಚಿಂತೆ

- ದೀಪಿಕ  Sydney

ಎಲ್ಲ ಗೃಹಿಣಿಯರ ಒಂದೇ ಚಿಂತೆ

ನಾಳೆಗೆ ತಿಂಡಿ ಏನಂತೆ?

ಅವಲಕ್ಕಿಯಂದರೆ! ಮಗಳಿಗೆ ಒಲ್ಲೆಯಂತೆ

ಉಪ್ಪಿಟ್ಟೆಂದರೆ!  ಗಂಡ ಮೂಸಲ್ಲವಂತೆ

ಚಿತ್ರನ್ನ ಮಾಡ್ಲ ಅಂದರೆ ಬೆರೇಬರಲ್ವಾ ನಿಂಗೆ ಅಂತ ಅತ್ತೆ ಅಂದ್ರಂತೆ 

ಪುಳಿಯೋಗರೆ! ತನಗೇ  ಸೇರಲ್ವಂತೆ

ಇಡ್ಲಿ, ದೋಸೆಗೆ ನೆನೆನೆಹಾಕಿಲ್ವಂತೆ

ಚಪಾತಿ ಒತ್ಲ ಅಂದ್ರೆ ಅಜ್ಜಿಗೆ ಅಗಿಯೋಕಾಗಲ್ವಂತೆ

ಯಾವುದಾದರು ಬಾತ್ ಅಂದ್ರೆ ಮಾವಂಗೆ ಅರಗಲ್ವಂತೆ

ಮತ್ತೆ  ಇನ್ನೇನು ಅಂತೆ 

ಅದೇ ನಾಳೆಗೆ ತಿಂಡಿ ಏನಂತೆ?

ಬದಲಾವಣೆ 

-ಶ್ರೀಮತಿ ಸಿಂಧುಶ್ರೀ ಸಂದೇಶ್  Sydney

ಬದಲಾವಣೆ ಎಂಬೋದು ಪ್ರಕೃತಿಯ ಪ್ರಕೃತಿ

ಅಷ್ಟಿಲ್ಲದೇ ನೆನೆವುದೇ ಪ್ರಕೃತಿ ತಾ ವರ್ಷ ಋತುವಿನಲ್ಲಿ
ಒಣಗುವುದು ಬೇಸಿಗೆಯಲ್ಲಿ ಮತ್ತೆ ತಾ
ಚಿಗುರುವುದು ಚೈತ್ರಮಾಸದಲ್ಲಿ
ಸರಿಸಾಟಿಯೇನಿದೆ ಪ್ರಕೃತಿಯ ಓಕುಳಿಗೆ

ಹರಸಿಹನು ದೈವನು
ಕೃತಯುಗದಲ್ಲಿ ವಾಮನನಾಗಿ
ತ್ರೇತಾಯುಗದಲ್ಲೇನೋ ರಾಮನಾಗಿ
ದ್ವಾಪರದಲ್ಲಿ ಶ್ರೀಕೃಷ್ಣನಾಗಿ
ಸರಿಸಾಟಿಯಿದೆಯೇ ಪ್ರಕೃತಿಯ ಅವತಾರಕ್ಕೆ

ಮತ್ತೆ ಬದಲಾವಣೆ ಯಾಕಿನ್ನು ಕಂಡಿಲ್ಲ ಈ ಮನುಜನಲ್ಲಿ
ಇನ್ನೆಷ್ಟು ದೃಷ್ಟಾಂತಗಳು ಬೇಕು ನಿನಗೆ ತಿಳಿಯಲು
ಸ್ಥಾವರಕ್ಕಳಿವುಂಟು 

ಜಂಗಮಕ್ಕಳಿವಿಲ್ಲವೆಂದು??

ಬದಲಾವಣೆ ಎಂಬೋದೇ ಪ್ರಕೃತಿಯ ಪ್ರಕೃತಿ

ಪಂಚೇಂದ್ರಿಯಗಳು

-ಶ್ರೀಮತಿ ಸಿಂಧುಶ್ರೀ ಸಂದೇಶ್ Sydney

ಪಂಚೇಂದ್ರಿಯಗಳು ಐದು
ಶಬ್ದ ಸ್ಪರ್ಶ ರೂಪ ರಸ ಗಂಧಗಳ
ಸಂವಹನ ವಾಹಿನಿ

ಮನಸ್ಸಿಗೆ ಗ್ರಹಿಸಲ್ಪಡುವ ಆಲೋಚನೆಗಳ
ಮುಖ್ಯವಾಹಿನಿ

ಬಹುರ್ಮುಖಿಯಾಗಿರುವ ಮನಸ್ಸನ್ನು
ಅಂತರ್ಮುಖಿಯಾಗಿಸಲು

ಆಲೋಚನೆಗಳನ್ನು ಏಕಾಂತದೆಡೆಗೆ
ನಾಟಿಸಲು ಇರುವ ಸಾಧನ

ಇರಲಿ ಸದಾ ಸಭ್ಯ ಸದಭಿರುಚಿ
ಶಾಂತ ತೃಪ್ತವಾದ ಜೀವನ

ಕೃತಜ್ಞತೆ 

- ಶ್ರೀಮತಿ ಸಿಂಧುಶ್ರೀ ಸಂದೇಶ್ Sydney

ಸಲ್ಲಬೇಕು ಕೃತಜ್ಞತೆ ಇಂತೀರ್ವರಿಗೆ
ಸಲ್ಲಬೇಕು ಕೃತಜ್ಞತೆ ಇಂತೀರ್ವರಿಗೆ

ಜನುಮದಾತರಾದ ತಂದೆತಾಯಿಗೆ
ಸಂಸ್ಕಾರವಿತ್ತು ಪೋಷಿಸಿದ ಗುರುವೃಂದಕ್ಕೆ

ಔದರ್ಯ ತೋರಿದ ಕುಟುಂಬಕ್ಕೆ
ಆಶ್ರಯ ಮತ್ತು ಆಶಯಗಳೊಂದಿಗೆ
ಅಪ್ಪಿಕೊಂಡಿರುವ ಸಮಾಜಕ್ಕೆ

ಇತಿ ಹೇಳಲು ಅಸಾಧ್ಯ ಇಷ್ಟಕ್ಕೆ
ಸಲ್ಲಬೇಕಲ್ಲವೇ ಕೃತಜ್ಞತೆ ಸ್ವ ಆತ್ಮಕ್ಕೆ
ಸಹಪಯಣಿಗನಾಗಿರಲು ಸದಾ ಜೀವನಯಾನಕ್ಕೆ

ಮಳೆ

- ದೀಪಿಕ  Sydney

 

ಸುರಿವ ಮಳೆಯೇ

ನೀ ಇಳಿದು ಇಳೆಯ ಮೇಲೆ

ತಂಪನ್ನು  ತಂದಿರುವೆ

ಚಿಟಪಟದ ಸದ್ದಲ್ಲೇ

ನಿನ್ನ ಬರುವಿಕೆಯ ತಿಳಿಸಿರುವೆ

ಹಸಿರ ಮೇಲೆ ಸುರಿದು

ಮುತ್ತಿನ ರಾಶಿಯಾಗಿರುವೆ

ಹಿರಿಯ ಕಿರಿಯರೆನ್ನದೆ

ಎಲ್ಲರನು ನಿನ್ನ ಆಟಕೆ ಕುಣಿಸಿರುವೆ

ಒಮ್ಮಮ್ಮೆ ಬಂದು ಅಬ್ಬರಿಸಿ ಬೊಬ್ಬಿಡಿದು

ಮಗದೊಮ್ಮೆ ಬಂದದ್ದು ತಿಳಿಯದಂತೆ ಹೊರಡುವೆ

ನೀ ರವಿಯ ಜೊತೆಯಾದಗ

ಆಗಸದಿ ಏಳು ಬಣ್ಣಗಳ ಚಿತ್ರಿಸುವೆ

ಹನಿ ಹನಿಯಾಗಿ ನೀನುದುರಿ

ನದಿಯಾಗಿ ಹರಿದಾಡುವೆ

ಓ ಮಳೆಯೇ ಸುರಿಯುವದೇ

ನಿನ್ನಯ ನಿರಂತರ ಕಾಯಕವಲ್ಲವೇ!

ಓ ಪ್ರಭುವೆ 

- ದೀಪಿಕ  Sydney

ನಿನ್ನ ಅರಸಿ ಬಂದಿರುವೆ

ನಿನ್ನ ಆಸರೆ ಬಯಸಿರುವೆ

ನನ್ನೀ ಕೋರಿಕೆಯ ಪೇಳುವೆ

ನೀ ಅರಿವೇ ಎಂದೆನಿಸಿರುವೆ

ಈ ಜಗದ ನೋವ ನೀನೆಂದಿಗೆ ಅಳಿವೆ

ಕಾಣದ ಜೀವಿಯ ಎಂದಿಗೆ ಕೋನೆಗಾಣಿಸುವೆ

ನೆಮ್ಮದಿಯ ಬದುಕನೆಂದು ಕೊಡುವೆ

ಎಲ್ಲವನರಿತು ಏನು ಅರಿಯದಂತೇಕಿರುವೆ

ನಿನ್ನ ಮಕ್ಕಳ ಮೇಲಿನ್ನು ಕೋಪವೇ

ನಮ್ಮೆಲ್ಲರ ಮೇಲೆ ಕರುಣೆ ತೋರು ಎನ್ನ ಪ್ರಭುವೆ

ಕೈ ಮುಗಿದು ಬೇಡುವೆ ಓ ನನ್ನ ದಿವ್ಯ ಪ್ರಭುವೆ.

_______________________________________________

ಹೊಸತು 

- ದೀಪಿಕ  Sydney

ಹೊಸತೇನು ಇಲ್ಲ ಈಗಿನ ಬದುಕಿನಲಿ 

ಕಲಿತೆ  ನಾ ಇರುವದರಲ್ಲೇ ಹೊಸದಾಗಿ ಬದುಕುವುದನ 

ನನ್ನ ಮನೆಯಲ್ಲಿಯೇ ಕಳೆಯುವೆ ಖುಷಿಯ ಕ್ಷಣ 

ಕಲಿತೆ ನಾ ಹೊಸ ರುಚಿಯನ್ನ 

ಬಡಿಸುವೆ ಮಾಡಿ ಮನೆಯವರಿಚ್ಛೆಯ ಅಡಿಗೆಯನ್ನ 

ಕಲಿತೆ ನಾ ಹೊಸ ಆಟಗಳನ್ನ 

ಮಕ್ಕಳೊಂದಿಗೆ ಆಡಿ ನಲಿದೆನ 

ಅರಿತೆ ನಾ ಹೆಚ್ಚು ನನ್ನ ಮನೆಯವರನ್ನ 

ಕಳೆದೆ ನಾ ಅವರಜೊತೆ ಹೆಚ್ಚು ಸಮಯವನ್ನ 

ಅರಿತೆ ನಾ ನನ್ನ ಹೊಸ ಕಲೆಯನ್ನ 

ಪಡೆದೆ ನಾ ಹೊಸ ಅನುಭವವನ್ನ 

_____________________________________________________________

ಗಜಲ್

-  ಅಂಬಮ್ಮ ಪ್ರತಾಪ್ ಸಿಂಗ್ ಮಾನ್ವಿ   ರಾಯಚೂರು

ಜಗತ್ತಿಗೆ ತಾನೇ ಜಗದ್ಗುರುವಾಗಿ ಬೆಳಗಲಿ ಭಾರತ

ಸ್ನೇಹ ಸೌಹಾರ್ದತೆಗೆ ಬೆಳಕಾಗಿ ಬೆಳಗಲಿ ಭಾರತ

ಸಾಧು-ಸಂತರು ತಪಗೈದ ತಪೋಭೂಮಿ ನನ್ನದು

ಧ್ಯಾನದ ಮಹತ್ವ ಸಾರುವಂತಾಗಿ ಬೆಳಗಲಿ ಭಾರತ

ಮಂದಿರ-ಮಸೀದಿ ಚರ್ಚುಗಳಿವೆ ಪುಣ್ಯ ಭೂಮಿಯಲ್ಲಿ

ಮನುಕುಲದ ಒಳಿತಿಗೆ ಪ್ರಾರ್ಥನೆಯೊಂದಾಗಿ ಬೆಳಗಲಿ ಭಾರತ

ವೈವಿಧ್ಯತೆಯಲ್ಲಿ ಏಕತೆ ಬಿಂಬಿಸುವ ಸಂಸ್ಕೃತಿಯಿದೆ ಇಲ್ಲಿ

ಸಾರ್ವಭೌಮತೆ ಸಾರುವ ರಾಷ್ಟ್ರವಾಗಿ ಬೆಳಗಲಿ ಭಾರತ

ವಿಜ್ಞಾನವು ಜನ್ಮ ತಾಳಿದೆ ಭರತನ ನೆಲದಲ್ಲಿ

ಪ್ರಪಂಚಕ್ಕೆ ದಾರಿ ದೀಪವಾಗಿ ಬೆಳಗಲಿ ಭಾರತ

ಅನ್ನದಾತನ ಬೆನ್ನೆಲುಬಾಗಿ ಹೊಂದಿದೆ ನನ್ನ ದೇಶ

ಹಸಿದ ಒಡಲಿಗೆ ಅನ್ನವಾಗಿ ಬೆಳಗಲಿ ಭಾರತ

ನಿನ್ನ ಪೂರ್ವ ಜನ್ಮದ ಸುಕೃತದ ಫಲವಿದು ವನಿತ

ಪ್ರತಿ ಜೀವಕ್ಕೆ ಜನನಿಯಾಗಿ ಬೆಳಗಲಿ ಭಾರತ

_____________________________________________________________

ನಾ ಕಂಡ ಕನಸು

- ದೀಪಿಕ Sydney

ನಾ ಕಂಡ ಕನಸು ನನಸಾಯಿತಂದು

ನಾ ತಿಳಿದಿದ್ದೆ ಆ ಕನಸು ನನ್ನದೇ ಎಂದು

ಆ ಭ್ರಮೆಯಲ್ಲೇ ಇದ್ದೆ ಆ ದಿನದಂದು

ಹತ್ತಿರಹೋದಂತೆಲ್ಲ ಮಾಯವಾಯಿತಂದು

ಕೊನೆಗೆ ನನಗೆ ತಿಳಿಯಿತು ಆ ಕನಸು ನನ್ನದಲ್ಲವೆಂದು

ನಾ ಕಂಡ ಕನಸು ನನದಲ್ಲವೆಂದು.

_____________________________________________________________

ಗಝಲ್ 

 - ಶಿವಶಂಕರ ಕಡದಿನ್ನಿ, ರಾಯಚೂರು 

ಬಿರು ಬಿಸಿಲಲ್ಲಿ ಕೈ ಹಿಡಿದು ನಡೆಸಿದಾಗಲೂ ನಾನು ಏನು ಮಾತನಾಡಲಿಲ್ಲ

ಉರಿ ಬೆಂಕಿಯಲಿ ಕೈ ಬೆರಳು ತಾಕಿಸಿದಾಗಲೂ ನಾನು ಏನು ಮಾತನಾಡಲಲ್ಲಿ

ಬಂಡಿಗಾಲಿಯಲ್ಲೇ ಮಣ್ಣಿನ ಮಡಿಕೆಯಾಗಿ ದಿನವಿಡೀ ದಾಹ ತಣಿಸುತ್ತಿದ್ದೆ

ನೋಡು ನೋಡುತ ನನ್ನ ಒಡಲ ಬಿಂದಿಗೆ ಹೊಡೆದಾಕಿದಾಗಲೂ ನಾನು ಏನು ಮಾತನಾಡಲಿಲ್ಲ

ಮನೆ ತುಂಬೆಲ್ಲ ಹರಡಿದ ಬೆಳಕು ಕಂಡು ಉಕ್ಕುನಗೆಯಲ್ಲಿದ್ದೆ

ಹಬ್ಬಿದ ಬೆಳಕಿಗೆ ಕತ್ತಲೆ ಬೀರಿದಾಗಲೂ ನಾನು ಏನು ಮಾತನಾಡಲಿಲ್ಲ

ಪಕಳೆ ಬೆನ್ನಿಗೆ  ಮುಳ್ಳುಗಳು ಚುಚ್ಚಿದರೂ ಅರಳುವ ಶಕ್ತಿ ನನ್ನಲ್ಲಿತ್ತು

ಸಹಿಸದಿರುವ ಕಾಣದ ಕೈಗಳು ಮುದುಡಿಸಿ ಕೆಳಗೆ ಬೀಸಾಡಿದಾಗಲೂ ನಾನು ಏನು ಮಾತನಾಡಲಿಲ್ಲ

ನಡು ಬೀದಿ ಹಗಲಲ್ಲೆ ದಾಳಿ ನಡೆಯಬಹುದು "ಶಂಕರ"ನ ಜೀವಕ್ಕೆ

ಕತ್ತು ಹಿಸುಕಿ ಮಣ್ಣಲ್ಲಿ ಹೂತು ಇಟ್ಟಾಗಲೂ ನಾನು ಏನು ಮಾತನಾಡಲಿಲ್ಲ...

_____________________________________________________________

ಎನ್ನ ಪಾಲಿಸೋ 

-  ಅಡಿಲೈಡ್ ಮಾಲು    Adelaide

ನಿನ್ನೆಡೆಗೆ ನಡೆಯುವೆನು 

ನಿನ್ನಡಿಗೆ ಎರಗುವೆನು 

ನನ್ನ ಚಿತ್ತದಲಿ ಬಂದು

ನೀನು ನೆಲೆಸೊ||

ನಿನ್ನ ಮುಂದಾಡುವೆನು 

ನಿನ್ನ ಕೊಂಡಾಡುವೆನು 

ಚೆನ್ನ ಮೂರುತಿ ಹರಿಯೆ

ಕಣ್ಣ ತೆರೆಸೊ||

ತರ ತರದಿ ಶ್ರಮಿಸುವೆನು 

ಶಿರ ಬಾಗಿ ನಮಿಸುವೆನು 

ಸಿರಿ ಲಕುಮಿಯ ಸಖನೆ

ನನ್ನ ಬಲಿಸೊ||

ಪಾಪ ಮಾಡಿದೆ ಆಗ 

ಪಾಪ ಮಾಡಿದೆ ಈಗ 

ಲೋಪವಿಲ್ಲದ ಶ್ರೀಶ 

ನನ್ನ ಉಳಿಸೊ||

ಭಕುತಿ ಮಾರ್ಗವ ತಿಳಿಸೊ

ಯುಕುತಿಗಳ ಒಳಗಿಳಿಸೊ

ಮುಕುತಿ ಪಡೆಯುವ ಬಗೆಯ 

ನನಗೆ ಕಲಿಸೊ||

ನಿನ್ನ ಕಂದನು ನಾನು

ನನ್ನ ತಂದೆಯು ನೀನು

ಘನ್ನ ಮೂರುತಿ ಕೃಷ್ಣ

ನನ್ನ ಬಳಸೊ||

ನಿನ್ನೆಡೆಗೆ ನಡೆಯುವೆನು

ನಿನ್ನಡಿಗೆ ಎರಗುವೆನು

ನನ್ನ ಹೃದಯದೊಳಗೆ 

ಬಂದು ನೆಲೆಸೊ||

         _____________________________________________________________

ಅಮ್ಮ  

- ಅಡಿಲೈಡ್ ಮಾಲು  Adelaide

‘ಅಮ್ಮ ನನ್ನ ಕೈಯಿ ಏಕೆ ಚಿಕ್ಕದು’

‘ದೊಡ್ಡ ಕೈಯಿ ಇದ್ದರೂ ಚಂದ್ರ ನಿನಗೆ ಸಿಕ್ಕದು’

‘ಅಮ್ಮ ನನ್ನ ಕೈಯಿ ಸ್ವಲ್ಪ ಕಪ್ಪಿದೆ’

‘ಕಪ್ಪು ಎಂದು ಹೇಳುವವರ ತಲೆಯಲೇನೊ ತಪ್ಪಿದೆ’

‘ಅಮ್ಮ ನನ್ನ ಬಳೆಗಳೇಕೆ ಹಸಿರಿದೆ’

‘ನನ್ನಂತೆಯೆ ನೀ ಕಣೆ, ನಿನ್ನಲೆನ್ನ ಉಸಿರಿದೆ’

‘ಅಮ್ಮ ನಿನ್ನ ಕೈಯಿ ಕೊಂಚ ಕೊಳೆಯಿದೆ’

‘ಹಾ, ನಿನ್ನೆ ಕೆನ್ನೆ ಒರೆಸಿದ ಕಣ್ಣನೀರ ಕಲೆಯಿದೆ’

‘ಅಮ್ಮ ಹೆಣ್ಣು ಜನ್ಮ ಏಕೆ ದೊಡ್ಡದು’

‘ಅವಳ ಮನಸು ಕೆಡಕುಗಳಿಗೆ ಅವಳನೆಂದು ಒಡ್ಡದು’

‘ಅಮ್ಮ ನಿನ್ನ ಮುಖದಲೇಕೆ ಸುಕ್ಕಿದೆ’

‘ನನ್ನ ಕಷ್ಟಗಳಿಗೆ ಈಗ ಬಹುಮಾನ ಸಿಕ್ಕಿದೆ’

‘ಅಮ್ಮ ಕೈಯ್ಯ ಏಕೆ ದೂರ ಸರಿಸಿದೆ’

‘ದೂರವಿದ್ದರೂ, ಕೈಗಳೆರಡು ನಿನ್ನ ಹರಸಿದೆ’

‘ಅಮ್ಮ ನೀ ಬಿಟ್ಟು ಹೋಗಬೇಡವೆ’

‘ಹಾಡಿಕೊಳ್ಳೆ, ನಾನು ಬರೆದ ಹಾಡಿವೆ’

‘ಅಮ್ಮ, ದುಃಖ ಉಕ್ಕಿ ಉಕ್ಕಿ ಬರುತಿದೆ’

‘ನಿನ್ನ ದುಃಖ ನನ್ನ ದುಃಖ ಬೆರೆತಿದೆ’

‘ಅಮ್ಮ, ನೀನೊಮ್ಮೆ ಬಂದು ಅಪ್ಪಿಕೊ’

‘ನಿನ್ನ ಹೃದಯದಲ್ಲಿ ಸದಾ ನಾನಿರುವೆನೆಂದು ಒಪ್ಪಿಕೊ’

_____________________________________________________________

ಸದ್ದು 

  -   ಶ್ರೀಮತಿ ಅನು  ಶಿವರಾಂ  Sydney

ದೂರದಲ್ಲಿ ಕೇಳಿದೊಡನೆ ಕೋಗಿಲೆಯ ಇಂಚರ

ಮರಗಳು ಎದ್ದವು ಮೈಕೊಡವಿ,ಆಯ್ತು ಹೊಸ  ಜೀವ ಸಂಚಾರ;

ಎಳೆ   ಹಸಿರುಟ್ಟು, ಚಿಗುರ  ಒಡವೆ ತೊಟ್ಟು ಸಂಭ್ರಮದಿ

ಬರುವ ವಸಂತನ  ಮಧುರ ಮಿಲನದ  ಕನಸಿನಲಿ

ಬಾನಂಚಿನಲಿ ಘನ ಮೋಡಗಳ ಗರ್ಜನೆ ಕೇಳಿ

ಮರಗಳು ನಲಿದವು  ತಮ್ಮನೀಳ  ರಂಬೆಗಳ  ಚಾಚಿ;

ತುಂತುರು ಮಳೆ ತರುವ ನವ ಚೇತನದ ಆಸೆಯಲಿ

ದಾಹ ಹಿಂಗಿಸುವ ವರ್ಷಋತುವಿನ ಪುಳಕದಲಿ 

ಮಂಜಿನ ರಥವೇರಿ ಬಂದ  ಶಿಶಿರನ ಕುಳಿಗಾಳಿಯ  ಸದ್ದ ಕೇಳಿ 

ಉದುರಿಸಿ ಎಲೆಗಳ, ಕುಗ್ಗಿಸಿ ಮೈಯ್ಯ, ಬೆತ್ತಲೆ ನಿಂತವು ಮರಗಳು;

ದಣಿದ ಮೈಮನಗಳಿಗೆ ವಿಶ್ರಾ ಮ  ತರುವ ಚಳಿಗಾಲದ ಹಿತದಲ್ಲಿ

ಮತ್ತೆ  ಮರಳಿ ಬರುವ ಚೈತ್ರನ ಬಿಸಿಯಪ್ಪುಗೆಯ ನಿರೀಕ್ಷೆಯಲಿ

ಗಾಡಿ ಚಕ್ರದ ಮೇಲೆ ಉರುಳಿ ಬಂತು ಕೊಡಲಿ ಮಸೆಯುವ ಸದ್ದು

ಮೌನದಲಿ ಸಿದ್ದವಾದವು ಮರಗಳು ತಮ್ಮೆಲ್ಲ ಕನಸುಗಳ ಗಂಟು ಕಟ್ಟಿ;

ತಾವು ಶ್ವಾಸವಿತ್ತು  ಸಲಹಿದ ಮನುಜನ   ದುರಾಶೆಗೆ  ತಲೆಬಾಗಿ

ಅವನ ಕುರುಡು  ಸ್ವಾರ್ಥದ  ಯಜ್ಞದಿ   ಅಂತಿಮ  ಆಹುತಿಯಾಗಿ

_____________________________________________________________

ಧ್ವನಿ 

-  ಶ್ರೀಮತಿ ಅನು  ಶಿವರಾಂ  Sydney

ಮಳೆ  ಹನಿ ತುಂಬಿದ ಮೋಡದ  ಬಸಿರು ನಿನ್ನ ದನಿ,

ಎದೆಯ  ಬಂಜರವ  ಹನಿಸಿ  ತಣಿಸುವುದು ನಿನ್ನ ದನಿ.

ಜೇನಿನ ಹನಿಯಲಿ ಅದ್ದಿದ ಎಳೆಯದು ನಿನ್ನ ದನಿ,

ವೀಣೆಯ ತಂತಿಯೊಳ್ ಅಡಗಿಹ ನಾದವು ನಿನ್ನ ದನಿ

ಮನಸಿಗೆ ಸ್ನೇಹದ ಬೆಚ್ಚನೆ ಹಿತವದು ನಿನ್ನ ದನಿ,

ದಣಿದ ತನುವಿಗೆ ಹೊಸ ಉಲ್ಲಾಸ ನಿನ್ನ ದನಿ

 ಕನಸಿನ ಲೋಕಕೆ  ಒಯ್ಯುವ ಕುದುರೆ  ನಿನ್ನ ದನಿ,

ವಾಸ್ತವ ಬದುಕಿಗೆ  ಕಟ್ಟುವ ತಂತಿಯೂ  ನಿನ್ನ ದನಿ

ಹೂವಿನ ಪರಿಮಳ ಬೀರುವ ಗಾಳಿಯು ನಿನ್ನ ದನಿ

ಭಾವದ ಹೂಗಳ  ಕಟ್ಟಿದ ಹಾರವು ನಿನ್ನ ದನಿ