ಒಂಟಿ ಸೀನುವಿನ ವಿವಿಧ sceneಗಳು
ಹಾಸ್ಯ ಲೇಖನ - ಅಣಕು ರಾಮನಾಥ್
ಸೀನು ಮತ್ತು ಸುಬ್ಬು ಶುದ್ಧ ತರಳೆ ಗೆಳೆಯರು. ಅವಿವಾಹಿತನಾದ ಸೀನುವನ್ನು ಸುಬ್ಬುವು ಒಂಟಿ ಸೀನು, ಅಪಶಕುನ ಒಂಟಿ ಸೀನು ಎಂದು ಕರೆಯುತ್ತಿದ್ದ. ಇವರಿಬ್ಬರ ನಡುಗೆ ಆಗಾಗ್ಗೆ ನಡೆದ ಮಾತುಗಳ ಝಲಕ್ ನೋಡೋಣ ಬನ್ನಿ.
ಸುಬ್ಬು: ಅಪಶಕುನಾ, ಒಂಟಿ ಸೀನೂ, ಎಲ್ಲಾ ಗೊತ್ತು, ನಾನೇ ಸರ್ವಜ್ಞ ಅಂತ ಕೊಚ್ಕೋತೀಯಲ್ಲ, ಈ ಪ್ರಶ್ನೆಗೆ ಉತ್ತರ ಹೇಳು ನೋಡೋಣ.
ಸೀನು: ಕೇಳೋ ಸುಬ್ಬೂ.
ಸುಬ್ಬು: ಇಚ್ಛೆಯನ್ನರಿತು ನಡೆವ ಸತಿ ಇರಬೇಕು ಅಂತ ಸರ್ವಜ್ಞ ಹೇಳಿದಾನಲ್ಲಾ, ಇಚ್ಛೆಯನ್ನರಿತು ನಡೆವ ಪತಿಇರಬೇಕೂಂತ ಯಾಕೆ ಹೇಳ್ಲಿಲ್ಲಾ...?
ಸೀನು : ಕೈಕೇಯಿ ಹೇಳಿದ್ಹಾಗೆ ದಶರಥ ನಡ್ಕೊಂಡಿದ್ದಕ್ಕೇ ದೋÃಡ್ ರಾಮಾಯಣ ಆಗಿದ್ದು ಸರ್ವಜ್ಞನಿಗೆ ಗೊತ್ತಿತ್ತೋ.
ಸುಬ್ಬು: ಹೇ! ನೆನ್ನೆ ಟಿವಿಲಿ ರಾಮಪಟ್ಟಾಭಿಷೇಕ ತೋರಿಸ್ತಿದ್ರು. ರಾಮನ ವಿಗ್ರಹ ಏನು ಲಕ್ಷಣ, ಏನು ಚಂದ... ಅಬ್ಬಬ್ಬ!
ಸೀನು: ಸುಬ್ಬೂ, ನನ್ನದೊಂದು ಪ್ರಶ್ನೆ.
ಸುಬ್ಬು: ಏನು?
ಸೀನು: ಅಷ್ಟು ಲಕ್ಷಣವಾದ, ಸುಂದರವಾದ ದೇವರ ವಿಗ್ರಹಾನ ನೋಡ್ಕೊಂಡು ಪ್ರಾರ್ಥನೆ ಮಾಡೋದ್ಬಿಟ್ಟು ಕಣ್ಮುಚ್ಕೊಂಡು ಪ್ರಾರ್ಥನೆ ಮಾಡ್ತಾರಲ್ಲ, ಯಾಕೆ?
ಸುಬ್ಬು: ನಮ್ಮಿಬ್ಬರ ಪೈಕಿ ನೀನೇ ಸರ್ವಜ್ಞ. ಹೇಳಿಬಿಡು.
ಸೀನು: ಕಣ್ಬಿಟ್ಕೊಂಡಿದ್ರೆ ದೇವರನ್ನ ನೋಡೋ ಬದಲು ದೇವಸ್ಥಾನಕ್ಕೆ ಬಂದ ದೇವಿಯರನ್ನ ನೋಡ್ತಾ ಕೂತ್ಬಿಡ್ತಾರೆ ಅಂತ ಕಣೋ!
***
ಸೀನು: ಏನೋ ಸುಬ್ಬು ಮಾವಿನಹಣ್ಣು ತಿನ್ತಾ ಇದೀಯಾ... ಎಲ್ಲಿ ಕೊಂಡ್ಕೊAಡ್ಯೋ?
ಸುಬ್ಬು: ಹುಷ್! ಅಪಶಕುನಾ, ಒಂಟಿ ಸೀನೂ, ಇದು ಕೊಂಡ್ಕೊAಡಿದ್ದಲ್ವೋ.
ಸೀನು: ಮತ್ತೆ?
ಸುಬ್ಬು: ಪಕ್ಕದ ತೋಟದಿಂದ ಕದ್ಕೊಂಡ್ಬAದೆ ಕಣೋ.
ಸೀನು: ಸುಬ್ಬೂ, ಕಳ್ಳತನ ಮಹಾಪಾಪ. ನಿನ್ನ ಈ ಪಾಪಕಾರ್ಯವನ್ನು ನಿನ್ನ ಭುಜದ ಮೇಲೆ ಕುಳಿತಿರುವ ಚಿತ್ರಗುಪ್ತನು ರೆಕಾರ್ಡ್ ಮಾಡಿಕೊಳ್ಳುತ್ತಾನೆ.
ಸುಬ್ಬು: ಸೀನೂ, ಆ ಚಿತ್ರಗುಪ್ತ ನಾನು ಹುಟ್ಟಿದಾಗಿನಿಂದ ಈ ಪುಣ್ಯ, ಪಾಪ ಬರ್ಕೋತಾನೇ ಇದಾನೆ. ಅವನು ರಿಟೈರ್ ಆಗೋದು ಯಾವಾಗ್ಲೋ?
ಸೀನು: ಯಮ ತನ್ನ ಸಿಸ್ಟಮ್‌ನಲ್ಲಿ ಅಕೌಂಟ್ಸ್ (ಚಿತ್ರಗುಪ್ತ) ಆಪ್ ಡೌನ್‌ಲೋಡ್ ಮಾಡ್ಕೊಂಡ್ ತಕ್ಷಣ ಕಣೋ.
ಸುಬ್ಬು: ಸೀನೂ, ನಮ್ಮ ಮೇಷ್ಟç ಹೆಸರು ಯಮ ಕಣೋ. ಯದುವೀರ್‌ನ ಮಗ ಮಂಜಣ್ಣ – ಯ ಮ! ಅವರು ನೆನ್ನೆ ಏನು ಹೇಳಿದ್ರು ಗೊತ್ತಾ...
ಸೀನು: ಏನು?
ಸುಬ್ಬು: ಜೀವನ ಒಂದು ಪ್ರಯಾಣ ಅಂದ್ರು. ಸೀನೂ ಆ ಪ್ರಯಾಣದ ಅಂತ್ಯ ಯಾವುದೋ?
ಸೀನು: ಹಾರ ಹಾಕಿರುವ ಫೋಟೋ!
***
ಸುಬ್ಬು: ಅಪಶಕುನ ಒಂಟಿ ಸೀನೂ, ಓದಿದೆಯೇನೋ ಇದನ್ನಾ?
ಸೀನು: ಏನೋ ಸುಬ್ಬೂ?
ಸುಬ್ಬು: ಅತಿ ವೇಗವೇ ಸಾವಿನ ಮೊದಲ ಮೆಟ್ಟಿಲು ಅಂತ ಬರ್ದಿದಾರೆ ಕಣೋ. ಸೀನೂ, ಸಾವಿನದೇನೋ ಸರಿ, ಜೀವನದ ಮೊದಲ ಮೆಟ್ಟಿಲು ಯಾವುದು?
ಸೀನು: ತೊಟ್ಟಿಲು.
ಸುಬ್ಬು: ಹೌದಲ್ವಾ! ನೀನು ಬಿಡಪ್ಪ. ಪ್ರತಿ ಪ್ರಶ್ನೆಗೂ ನಿನ್ನಲ್ಲಿ ಉತ್ತರ ಕಟ್ಟಿಟ್ಟ ಬುತ್ತಿ. ಆದ್ರೂ... ಸೀನೂ, ಕಟ್ಟಿಟ್ಟ ಬುತ್ತಿ, ಹೇಳಿಕೊಟ್ಟ ಮಾತು ಬಹುದಿನ ಬರಲ್ಲ ಅಂತಾರಲ್ಲಾ...?
ಸೀನು: ಅದು ಆ ಕಾಲದ ಮಾತು. ಈಗ ಕಟ್ಟಿಟ್ಟ ಬುತ್ತಿ ಫ್ರಿಡ್ಜಲ್ಲಿ, ಹೇಳಿಕೊಟ್ಟ ಮಾತು ಸೀರಿಯಲ್ಲಲ್ಲಿ ತುಂಬ ದಿವಸ ಬರತ್ವೆ ಕಣೋ.
***
ಸೀನು: ಏನೋ ಸುಬ್ಬೂ, ಯಾಕೋ ಮೂಗು ಕಟ್ಟಿದೆ, ತಲೆಯೆಲ್ಲ ಕೆದರಿದೆ, ಏನಾಯ್ತೋ?
ಸುಬ್ಬು: ಅಪಶಕುನಾ ಒಂಟಿ ಸೀನೂ, ರಾತ್ರಿಯೆಲ್ಲ ಪಕ್ಕದ ಮನೆ ಅಂಕಲ್ ಆಂಟಿ ಜಗಳ ಆಡಿದ್ದೂ ಆಡಿದ್ದೇ. ಫುಲ್ ನೈಟ್ ನಿದ್ರೆ ಇಲ್ಲ ಕಣೊ.
ಸೀನು: ಅವರು ಜಗಳ ಆಡಿದ್ರೆ ನಿನಗೆ ಯಾಕೋ ಮೂಗು ಕಟ್ಟತ್ತೆ?
ಸುಬ್ಬು: ಹಾಳಾದವ್ರು ತುಂಬ ಮೆತ್ತಗೆ ಜಗಳ ಆಡ್ತಿದ್ರು ಕಣೋ. ಕೇಳಿಸ್ಕೊಳಕ್ಕೇಂತ ಕಾಂಪೌAಡಲ್ಲಿ ಚಳೀಲಿ ನಿಂತೂ ನಿಂತೂ ಥಂಡಿ ಆಗ್ಬಿಡ್ತು.
ಸೀನು: ನೀನೋ, ನಿನ್ಬುದ್ಧೀನೋ! ಅಲ್ವೋ, ಈ ಚಳೀಲಿ, ರಗ್ ಹೊದ್ದು, ಸಕ್ಕರೆ, ಸಕ್ಕರೆ ನಿದ್ದೆ ಮಾಡೋದು ಬಿಟ್ಟೂ...
ಸುಬ್ಬು: ಸೀನೂ, ಒಂದು ಡೌಟು
ಸೀನು: ಏನು?
ಸುಬ್ಬು: ಸಕ್ಕರೆ ನಿದ್ದೆ ಎಂದರೆ ಏನು?
ಸೀನು: ಇರುವೆ, ಗೊದ್ದ, ನೊಣ ಬಂದು ಮುತ್ಕೊಂಡ್ರೂ ಎಚ್ಚರ ಆಗ್ದೇಯಿರೋ ನಿದ್ರೆ ಕಣೋ.
***
ಸುಬ್ಬು: ಒಂಟಿ ಸೀನೂ, ಬ್ರಹ್ಮ ಸರಸ್ವತಿ ಗಂಡ ಹೆಂಡತಿ ಅಲ್ವಾ?
ಸೀನು: ಹೌದು. ಯಾಕೆ?
ಸುಬ್ಬು: ಮತ್ತೆ... ಅವರ ಮಧ್ಯ ಇವತ್ತಿನ ವರೆಗೂ ಒಂದು ಸಣ್ಣ ಪುಟ್ಟ ಜಗಳಾನೂ ಆಗಿಲ್ವಲ್ಲಾ, ಯಾಕೆ?
ಸೀನು: ಹುಶ್; ಸುಮ್ಮನಿರೋ. ಯಾರಾದ್ರೂ ಸೀರಿಯಲ್ ಸ್ಕಿçಪ್ಟ್ ರೈಟರ್ ಕೇಳಿಸ್ಕೊಂಡ್ಬಿಟ್ಟಾರು!
ಸುಬ್ಬು: ಕೇಳಿಸ್ಕೊಂಡ್ರೆ ಏನಾಗತ್ತೆ?
ಸೀನು: ಅವರಿಬ್ಬರ ಮಧ್ಯಾನೂ ಜಗಳ ತಂದ್ಹಾಕ್ಬಿಟ್ಟು, ಬ್ರಹ್ಮನ ಹಣೆಬರಹಾನೇ ಚೇಂಜ್ ಆಗ್ಬಿಡತ್ತೆ!
ಸುಬ್ಬು: ಹ್ಹಿಹ್ಹಿಹ್ಹಿ. ಸೀನೂ, ಪ್ರತಿಯೊಬ್ಬ ಯಶಸ್ವಿ ಪುರುಷನ ಹಿಂದೆ ಒಬ್ಬ ಮಹಿಳೆ ಇರುತ್ತಾಳಂತೆ. ಹಿಂದೆ ಯಾಕೆ?
ಸೀನು: ಮುಂದೆ ಬಂದರೆ ಅವಳನ್ನೇ ನೋಡುತ್ತಾ ಕುಳಿತು ಇವನು ಸಾಧನೆಯನ್ನೇ ಮರೆತುಬಿಡುತ್ತಾನಲ್ಲಾ!
***
ಸೀನು: ಸುಬ್ಬೂ, ಆ ದೇವರು ಒಂದು ಚೂರೂ ಸರಿಯಿಲ್ಲ ಕಣೋ.
ಸುಬ್ಬು: ಅಪಶಕುನಾ ಒಂಟಿ ಸೀನೂ, ನೀನು ವಕ್ರಿಸಿದ್ರೆ ಮಾತ್ರ ಎಡವಟ್ಟೂ ಅನ್ಕೊಂಡಿದ್ದೆ. ಈಗ ಮಾತೂ ಎಡವಟ್ಟಾ?
ಏನಾಯ್ತು?
ಸೀನು: ಈಶ್ವರ.... ತಾನು ಮಾತ್ರ ಮೂರು ಕಣ್ಣು ಇಟ್ಕೊಂಡಿದಾನೆ. ನಮಗೂ ಮೂರು ಕೊಡಬಾರದಾಗಿತ್ತಾ...
ಸುಬ್ಬು: ಯಾಕೆ? ನಿನಗ್ಯಾಕೆ ಮೂರು ಕಣ್ಣು ಬೇಕಾಗಿತ್ತು?
ಸೀನು: ಪುಸ್ತಕದ ಮೇಲೊಂದ್ಕಣ್ಣು, ಸೀರಿಯಲ್ ಮೇಲೊಂದ್ಕಣ್ಣು, ಹುಡುಗಿಯರ ಮೇಲೊಂದು ಕಣ್ಣು ಇಡ್ಬೋದಾಗಿತ್ತಾ!
ಸುಬ್ಬು: ಸೀನೂ, ಶಿವ ಅಂದಾಗ ಹಿಮಾಲಯ, ಥಂಡಿ, ಎ.ಸಿ. ರೂಮು ಎಲ್ಲ ಜ್ಞಾಪಕ ಬಂತು. ನನಗೊಂದು ಡೌಟು.
ಸೀನು: ಏನು?
ಸುಬ್ಬು: ಎ.ಸಿ. ರೂಮಲ್ಲಿ ಕೂತು ಕೆಲಸ ಮಾಡೋವ್ರು ಬೆವರು ಸುರಿಸೋದು ಯಾವಾಗ?
ಸೀನು: ರೈಡ್ ಆದಾಗ, ಕರೆಂಟ್ ಹೋದಾಗ ಕಣೋ.
***
ಸೀನು: ಎಮ್ಮ ಮನೆಯಂಗಳದಿ ಬೆಳೆದೊಂದು ಹೂವೊಂದ ನಿಮ್ಮ ಮಡಿಲೊಳಗಿಡಲು ತಂದಿರುವೆವು....
ಸುಬ್ಬು: ಒಂಟಿ ಸೀನೂ, ಯಾವ ಹಾಡೋ ಅದು?
ಸೀನು: ನೆನ್ನೆ ಮಂಜಣ್ಣನ ಮಗ ತಿಮ್ಮರಾಯಿ ಮದುವೇಲಿ ಹಾಡ್ತಿದ್ರು ಕಣೋ, ಗಂಡೊಪ್ಸೋವಾಗ...
ಸುಬ್ಬು: ಹೆಣ್ಣೊಪ್ಸೋದು ಗೊತ್ತು. ಇದೇನು ಗಂಡೊಪ್ಸೋದು?
ಸೀನು: ಮನೆ ಅಳಿಯ ಅಲ್ವೇನೋ... ಮಗನ್ನ ಮನೆಯಿಂದ ಮಾವನ ಮನೆಗೆ ಕಳಿಸೋದೇ ಗಂಡೊಪ್ಸೋದು! ವಿಚಿತ್ರ ಏನ್ಗೊತ್ತಾ...
ಸುಬ್ಬು: ಏನು?
ಸೀನು: ಹೆತ್ತ ಅಮ್ಮಅಪ್ಪನ್ನ ಬಿಟ್ಹೋಗ್ಬೇಕಲ್ಲಾಂತ ತಿಮ್ಮರಾಯಿ ಗೊಳೋ ಅಂತ ಅಳ್ತಿದ್ದ. ಪಾಪ!
ಸುಬ್ಬು: ಆ! ಈಗಿನ ಹುಡುಗಿಯರೇ ಗಂಡನ ಮನೆಗೆ ಹೋಗೋವಾಗ ಅಳೋದಿಲ್ವಲ್ಲೋ...
ಸೀನು: ಚೆನ್ನಾಯಿತು! ಮುಂದೆ ಇವನದೇ ಅಡಿಗೆ. ದೊಡ್ಡ ಮನೆ, ಮನೆ ಭರ್ತಿ ಜನ...
ಸುಬ್ಬು: ಮನೆ ಅಂದತಕ್ಷಣ ಜ್ಞಾಪಕ ಬಂತು ನೋಡು. ಮನೆನಾಯಿಗೂ, ಬೀದಿನಾಯಿಗೂ ಏನು ವ್ಯತ್ಯಾಸ?
ಸೀನು: ಮನೆನಾಯಿ ಬಡಪಾಯಿ. ಗಂಡನAತೆಯೇ ಅದಕ್ಕೂ ಬಯಸಿದಾಗ ಬೊಗಳುವ ಸ್ವಾತಂತ್ರ್ಯವಿಲ್ಲ ಕಣೋ
***
ಸೀನು: ಏನು ಯೋಚನೆ ಮಾಡ್ತಾ ಕೂತಿದೀಯೋ ಸುಬ್ಬೂ?
ಸುಬ್ಬು: ಅಪಶಕುನಾ, ಒಂಟಿ ಸೀನೂ, ಅಧ್ಯಾತ್ಮ ಮಾತಾಡೋ ಗುರುಗಳೂ ಬುಧ, ಗುರು, ಶುಕ್ರ ಗ್ರಹ ಅಂತಾರೆ.
ಸೀನು: ಹೌದು.
ಸುಬ್ಬು: ವಿಜ್ಞಾನಿಗಳೂ ಬುಧ, ಗುರು, ಶುಕ್ರ ಗ್ರಹ ಅಂತಾರೆ.
ಸೀನು: ಹೌದು.
ಸುಬ್ಬು: ಹಾಗಾದರೆ ಅಧ್ಯಾತ್ಮಕ್ಕೂ, ವಿಜ್ಞಾನಕ್ಕೂ ಏನು ವ್ಯತ್ಯಾಸ?
ಸೀನು: ಅಧ್ಯಾತ್ಮದಲ್ಲಿ ಇರುವುದು ಒಂದೇ ಜನಕ - ಜಗಜನಕ; ವಿಜ್ಞಾನದಲ್ಲಿ ಆಮ್ಲಜನಕ, ಜಲಜನಕ, ಸಾರಜನಕ...
ಸುಬ್ಬು: ಇನ್ನೊಂದು ಡೌಟು.
ಸೀನು: ಏನು?
ಸುಬ್ಬು: ಎಲ್ಲ ಗ್ರಹಗಳಿಗೂ ಒಂದೊAದು ವಾರ ಇದೆ. ಆದರೆ ರಾಹು-ಕೇತುಗೆ ಮಾತ್ರ ಯಾಕೆ ವಾರ ಇಲ್ಲ?
ಸೀನು: ಅವಕ್ಕೆ ವಾರ ಯಾಕೋ, ದೇಶಾನೇ ಅವುಗಳದಲ್ವೇನೋ...
ಸುಬ್ಬು: ಹೇಗೆ?
ಸೀನು: ದೇಹವಿಲ್ಲದ ತಲೆಯೇ ಮತದಾರರು; ತಲೆಯಿಲ್ಲದ ದೇಹವೇ ಮಂತ್ರಿಗಳು!
***
ಸುಬ್ಬು: ಅಪಶಕುನಾ ಒಂಟಿ ಸೀನು, ಎಷ್ಟು ಚೆನ್ನಾಗಿದೆ ಅಲ್ಲವಾ ಈ ಪಾರ್ಕು! ಏಯ್ ಅಲ್ನೋಡೋ ಇಬ್ಬರು ಲವರ್ಸ್ ಹೇಗೆ ಕೂತಿದಾರೆ!
ಸೀನು: ಏಯ್ ಸುಬ್ಬು, ನಾಚಿಕೆ ಇಲ್ವ ನಿನ್ಗೆ? ಪಾರ್ಕಿಗೆ ಬಂದು ಹಾಗೆಲ್ಲ ಪ್ರೇಮಿಗಳನ್ನ ದುರುಗುಟ್ಟಿ ನೋಡಬಾರದು. ತಿರುಗೋ ಈ ಕಡೆ...
ಸುಬ್ಬು: ಸೀನೂ, ಒಂದು ಡೌಟು
ಸೀನು: ಏನು?
ಸುಬ್ಬು: ಪ್ರೇಮಿಗಳು ಚುಂಬಿಸೋವಾಗ ಯಾಕೆ ಕಣ್ಣು ಮುಚ್ಕೋತಾರೆ?
ಸೀನು: ಕಣ್ಣುಮುಚ್ಚುವ ಕಾಲ ಬರುವವರೆಗೂ ಹೀಗೇ ಪ್ರೀತಿಸೋಣ ಅಂತ ಸೂಚಿಸಕ್ಕೋ.
ಸುಬ್ಬು: ಸೀನೂ, ಹುಡುಗಿಯರ ಮನಸ್ಸು ಚಂಚಲ ಅಂತಾರೆ. ಹುಡುಗರ ಮನಸ್ಸು?
ಸೀನು: ಚಂಚಲೆಯರ ಕಡೆ ನೋಡೋದ್ರಲ್ಲಿ ಅಚಲ!
***
ಸುಬ್ಬು: ಸೀನೂ, ನೆನ್ನೆ ರಾತ್ರಿ ಒಂದು ಡೌಟು ಶುರು ಆಗಿ ರಾತ್ರಿಯೆಲ್ಲ ನಿದ್ರೆ ಇಲ್ಲ ಕಣೋ.
ಸೀನು: ಏನು ಡೌಟೋ?
ಸುಬ್ಬು: ದೇವರು ಮತ್ಸ್ಯಾವತಾರವನ್ನೂ ತಾಳಿದ್ದಾನೆ. ಹಾಗಾದರೆ ನಾವು ಮೀನು ತಿನ್ನುವುದು ತಪ್ಪು ಅಲ್ವೇನೋ?
ಸೀನು: ಅಯ್ಯೋ ನಿನ್ನ! ದೇವರನ್ನೇ ಹುರಿದುಮುಕ್ಕುವ ಬುದ್ಧಿಜೀವಿಗಳಿರೋ ಈ ಕಾಲದಲ್ಲಿ ಇದಕ್ಕೇನೂ ಮೀನಮೇಷ ಎಣಿಸಬೇಕಿಲ್ಲವಂತೆ.
ಸುಬ್ಬು: ಮೀನಮೇಷ ಅಂದಿಯಲ್ಲಾ, ನಮ್ಮ ಪಾಲಿಕೇನೂ ಕಸ ಎತ್ತೋದೋ ಬಿಡೋದೋ ಅನ್ನೋದರಲ್ಲೇ ದಿನ ಕಳೀತು. ಸೀನೂ, ನಿಜಕ್ಕೂ ನಮ್ಮ ಬೀಬೀಎಂಪಿ ಅಭಿವೃದ್ಧಿ ಆಗೋದು ಯಾವಾಗಲೋ
ಸೀನು: ಪ್ರತಿ ದಿನ, ಪ್ರತಿ ಕ್ಷಣ ಆಗ್ತಾನೇ ಇದೆಯಲ್ಲೋ... ಅಧಿಕಾರಿಗಳ ಬೀಬೀಗಳು, ಕ್ಷೇತ್ರಗಳ ಎಂಪಿಗಳು ಉದ್ಧಾರ
ಆಗ್ತಾನೇ ಇದಾರಲ್ಲೋ.
Comments
Post a Comment