ಜೀರಿಗೆ - ಆಹಾರವೇ ಔಷಧ

ಜೀರಿಗೆ 

ಆಹಾರವೇ ಔಷಧ
Article by Raji Jayadev
Accredited Practicing Dietitian

Sydney

ಹಲವಾರು ಮಾರಕ ರೋಗಗಳಿಗೆ ಉತ್ತಮ ಜೀವನಶೈಲಿಯೇ ಅತಿ ಪ್ರಭಾವಶಾಲಿಯಾದ ಔಷಧಿ ಎಂದು ನಮಗೆಲ್ಲ ತಿಳಿದಿದೆ. ಇದರಲ್ಲಿ ಅತಿ ಮುಖ್ಯವಾದದ್ದು ಆರೋಗ್ಯಕರವಾದ ಆಹಾರ ಸೇವನೆ. ಉತ್ತಮ ಆಹಾರ ಸೇವನೆಯಿಂದ ಹಲವಾರು ಮಾರಕ ರೋಗಗಳನ್ನು ನಿಯಂತ್ರಣದಲ್ಲಿಡಬಹುದೆಂದು ವೈಜ್ಞಾನಿಕ ಅಧ್ಯಯನಗಳಿಂದ ತಿಳಿದುಬಂದಿದೆ. ಈ ನಿಟ್ಟಿನಲ್ಲಿ ಜೀರಿಗೆಯನ್ನು ಔಷಧಿಯಾಗಿ ಬಳಸುವ ಬಗೆಯನ್ನು ತಿಳಿಯೋಣ.

ಹಲವಾರು ದೇಶಗಳಲ್ಲಿ ಜೀರಿಗೆಯನ್ನು ಸಾಂಪ್ರದಾಯಿಕ ಚಿಕಿತ್ಸೆಗೆ ಬಳಸುತ್ತಾರೆ. ಆದರೆ ಜೀರಿಗೆಯನ್ನು ರೋಗ ನಿವಾರಣೆಗೆ ಔಷಧಿಯಾಗಿ ಉಪಯೋಗಿಸಬಹುದು ಎನ್ನುವುದಕ್ಕೆ ಯಾವ ವೈಜ್ಞಾನಿಕ ಪುರಾವೆಯೂ ಇಲ್ಲ.  

ಆಸ್ಪಿರಿನ್ (Aspirin™) ಮಾತ್ರೆಗಳನ್ನು ನೂರಾರು ವರ್ಷಗಳಿಂದ ನೋವು ನಿವಾರಣೆಗೆ, ಜ್ವರ ಮತ್ತು ಉರಿಯೂತದ (inflammatory diseases e.g. heart disease) ಚಿಕಿತ್ಸೆಗೆ ಬಳಸಲ್ಪಟ್ಟಿದೆ. ಆಸ್ಪಿರಿನ್ ಮಾತ್ರೆಯಲ್ಲಿರುವ ಪ್ರಮುಖ ಘಟಕ ಸ್ಯಾಲಿಸಿಲಿಕ್ ಆಸಿಡ್ (salicylic acid). ಬಗೆಬಗೆಯ ಹಣ್ಣುಗಳು, ತರಕಾರಿಗಳು ಮತ್ತು ಸಾಂಬಾರ ಪದಾರ್ಥಗಳು ಸ್ಯಾಲಿಸಿಲಿಕ್ ಆಸಿಡ್ ಅನ್ನು ಹೊಂದಿವೆ. ಅಚ್ಚಕಾರದ ಪುಡಿಯಲ್ಲಿ ಮತ್ತು ಅರಶಿನದ ಪುಡಿಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿದೆ. ಆದರೆ ಅತ್ಯಂತ ಹೆಚ್ಚಿನ ಪ್ರಮಾಣದಲ್ಲಿ ಸ್ಯಾಲಿಸಿಲಿಕ್ ಆಸಿಡ್ ಇರುವುದು ಜೀರಿಗೆಯಲ್ಲಿ. ಒಂದು ಟೀ ಸ್ಪೂನ್ ಜೀರಿಗೆಯಲ್ಲಿ ಒಂದು ಸಣ್ಣ ಆಸ್ಪಿರಿನ್ ಮಾತ್ರೆಯಲ್ಲಿರುವಷ್ಟು ಸ್ಯಾಲಿಸಿಲಿಕ್ ಆಸಿಡ್ ಇದೆ. ಆದ್ದರಿಂದ ನಾವು ಪ್ರತಿದಿನ ಜೀರಿಗೆಯನ್ನು ಉಪಯೋಗಿಸಿದರೆ ನೋವು ನಿವಾರಿಸುವ ಸ್ಯಾಲಿಸಿಲಿಕ್ ಆಸಿಡ್ ನಮ್ಮ ದೇಹಕ್ಕೆ ದೊರೆಯಬಹುದು. ಭಾರತದ ಜನಪ್ರಿಯ ಪಾನೀಯಗಳಾದ ಜೀರಾಪಾನಿ ಮತ್ತು ಲಸ್ಸಿಗಳನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು.

ಜೀರಿಗೆ ನೀರು

ಅರ್ಧ ಟೀ ಚಮಚೆ ಜೀರಿಗೆ ಕಾಳನ್ನು ಒಂದು ಲೋಟ ಬಿಸಿ ನೀರಿಗೆ ಹಾಕಿ ರಾತ್ರಿಯಿಡೀ ನೆನೆಯಿಡಿ. ಮಾರನೆಯ ದಿನ ಶೋಧಿಸಿ, ಉಪಯೋಗಿಸಿ. ಇಷ್ಟವಿದ್ದಲ್ಲಿ ಕಾಲು ಚಮಚ ಅಜ್ವಾನವನ್ನು ಸೇರಿಸಬಹುದು.

ಅಥವಾ

ಅರ್ಧ ಟೀ ಚಮಚೆ ಜೀರಿಗೆಪುಡಿಯನ್ನು ಎರಡು ಲೋಟ ಬಿಸಿ ನೀರಿಗೆ ಹಾಕಿಡಿ. ತಣಿದ ಮೇಲೆ ಒಂದು ಟೀ ಸ್ಪೂನ್ ನಿಂಬೆ ರಸ ಮತ್ತು (ಇಷ್ಟವಿದ್ದಲ್ಲಿ) ಜೇನುತುಪ್ಪ ಸೇರಿಸಿ, ಕುಡಿಯಿರಿ.

ಲಸ್ಸಿ

1/2  ಲೋಟ ಕೊಬ್ಬು ರಹಿತ ಮೊಸರು

1/2 ಟೀಸ್ಪೂನ್ ಜೀರಿಗೆ ಪುಡಿ

1/4 ಟೀಸ್ಪೂನ್ ಉಪ್ಪು (ಇಷ್ಟವಿದ್ದಲ್ಲಿ)

1 ½ ಲೋಟ ನೀರು

ಒಂದು ಪಾತ್ರೆಯಲ್ಲಿ ಮೊಸರು, ಜೀರಿಗೆ ಪುಡಿ, ಉಪ್ಪು ಹಾಕಿ, ನೀರು ಸೇರಿಸುತ್ತಾ ಫೋರ್ಕ್ ಅಥವಾ ವಿಸ್ಕ್ ನಿಂದ (whisk) ಕಡೆಯಿರಿ.

ಜೀರಿಗೆ ಪುಡಿಯನ್ನು ತಯಾರಿಸುವ ಬಗೆ

ಒಂದು ದಪ್ಪ ತಳದ ಪಾತ್ರೆಯನ್ನು ಸ್ವಲ್ಪ ಬಿಸಿ ಮಾಡಿ ಜೀರಿಗೆಯನ್ನು ಹಾಕಿ, ಮಂದ ಸುವಾಸನೆ ಬರುವವರೆಗೆ ಹುರಿಯಿರಿ. ಸೀದು ಹೋಗದಂತೆ ಎಚ್ಚರ ವಹಿಸಿ. ತಣ್ಣಗಾದ ಮೇಲೆ ನುಣ್ಣಗೆ ಪುಡಿಮಾಡಿ, ಬಿಗಿಯಾದ ಮುಚ್ಚಳವಿರುವ ಒಂದು ಗಾಜಿನ ಜಾಡಿಯಲ್ಲಿ ಹಾಕಿಡಿ.   

ಎಚ್ಚರಿಕೆ: ವೈದ್ಯರು ನಿಮಗೆ ಆಸ್ಪಿರಿನ್ ಮಾತ್ರೆಗಳನ್ನು ತೆಗೆದುಕೊಳ್ಳಲು ಹೇಳಿದ್ದರೆ, ಅದನ್ನು ನಿಲ್ಲಿಸಬೇಡಿ.